«زەرەن-2019» رەسپۋبليكالىق تانىمدىق جاستار جازعى لاگەرى 4 شىلدەدە قر اقپارات جانە قوعامدىق دامۋ مينيسترلىگى جاستار جانە وتباسى ءىسى كوميتەتىنىڭ توراعاسى ماديار قوجاحمەتتىڭ جەتەكشىلىگىمەن سالتاناتتى تۇردە اشىلدى. سونىمەن قاتار, اشىلۋ سالتاناتىنا اقمولا وبلىسى اكىمىنىڭ ورىنباسارى اينا ءمۇسىرالىموۆا مەن زەرەندى اۋدانىنىڭ اكىمى بەرىكجان ءابۋتالiپوۆ قاتىستى. لاگەردىڭ ماقساتى – جاستاردى قازاقستاننىڭ بارلىق وڭىرىندە ناقتى ىسكە اساتىن, ورنىقتى, الەۋمەتتىك باعىتتاعى بيزنەس جوبالاردى جۇزەگە اسىرۋدى ۇيرەتۋ بولىپ تابىلادى. لاگەر جاستاردىڭ ءوزىن ءوزى كورسەتۋىنە كومەكتەسىپ, جاستاردىڭ, سونىڭ ىشىندە اۋىل جاستارىنىڭ ەكونوميكالىق جانە الەۋمەتتىك ساتىلارعا قول جەتكىزۋىنە كومەكتەسۋ ءۇشىن اشىلعان.
«بۇگىن ءبىز ەلىمىزدىڭ ەڭ كورىكتى جەرىندە كوپتەن كۇتكەن, ەڭ اۋقىمدى «زەرەن-2019» جوباسىن بىرگە باستاۋ ءۇشىن جينالدىق. سىزدەردى قىزىقتى وقۋ ۇدەرىسىنە تولى كۇندەر, ەڭ باستىسى – ءوز بولاشاقتارىڭىزعا قاراي قادام جاساۋ مۇمكىندىگى كۇتىپ تۇر! لاگەردە سىزدەرگە جول كورسەتىپ, قاي باعىتتا ارەكەت ەتۋ كەرەك ەكەنىنە جول سىلتەيتىن تالىمگەرلەرمەن, بيزنەس-سپيكەرلەرمەن ەمىن-ەركىن ارالاسا الۋلارىڭىز ءۇشىن بارلىق جاعداي جاسالعان. ساتتىلىك تىلەيمىن!», - دەپ ماديار قوجاحمەت العاشقى سوزىندە اتاپ ءوتتى.
ۇيىمداستىرۋشىلاردىڭ دەرەكتەرىنە سۇيەنسەك, لاگەرگە قاتىسۋ مۇمكىندىگى 18 بەن 29 جاس ارالىعىنداعى قازاقستاننىڭ كەز كەلگەن ازاماتىنا جانە تمد-نىڭ ءار ەلىنەن 5 قاتىسۋشىعا بەرىلگەن. لاگەر ءۇش ماۋسىمعا بولىنگەن. ءار ماۋسىمدا 200 قاتىسۋشىدان بولادى. «زەرەن-2019» لاگەرىندە تۇرۋ جانە ءبىلىم الۋ تەگىن. ءبىرىنشى اۋىسىم 3 – 11 شىلدە ارالىعىندا, ەكىنشى اۋىسىم 13 – 21 شىلدەدە; ءۇشىنشى اۋىسىم 23 – 31 شىلدە ارالىعىندا وتەدى. بارلىق قاتىسۋشى ءوز يدەياسىن جۇزەگە اسىرۋ مۇمكىندىگىنە قول جەتكىزەدى نەمەسە لاگەر تالىمگەرلەرىنىڭ جەتەكشىلىگىمەن مۇلدە جاڭا جوبا جاساي الادى. نەگىزگى باعىتتار: ازاماتتىق قوعامدى دامىتۋ, كاسىپكەرلىك داعدىلارى, جاسىل ەكونوميكا, كرەاتيۆتى ەكونوميكا جانە جاڭا مەديا سالالارى.
جوبانىڭ بىرەگەيلىگى – اشىق ديالوگ الاڭى بولاتىندىعىندا, وندا تانىمدىق ۇدەرىستىڭ بارلىق قاتىسۋشىسى ساراپشىلارمەن بىرگە ستارتاپتار جاسايدى, ورىندالعان جۇمىستار قورىتىندىسى بويىنشا ءوز بيزنەس-جوبالارىن تانىستىرادى.
بىلىكتى ساراپتامالىق قازىلار القاسى قاتىسۋشىلار جاساعان جوبالاردى ىرىكتەيدى. ۇزدىك 30 جوبا قارجىلاندىرىلادى, ال جالپى جۇلدە قورى – 15 ميلليون تەڭگە.
الماتى وبلىسىنان كەلگەن قاتىسۋشى اقبوتا جارىلقاسىننىڭ ايتۋى بويىنشا, وسىنداي اۋقىمدى, ءارى ماڭىزدى جوباعا قاتىسۋ شىن مانىندە بولاشاققا بەرىلگەن جولداما.
«مەن الماتى وبلىسىنان ءوز جوباممەن كەلدىم. قازىر ونى جاساپ جاتىرمىن جانە ماعان قازىر تاجىريبە مەن «جارق ەتە قالۋ ءۇشىن» ناقتى نە ىستەۋ كەرەك ەكەنىن بىلەتىن بىلىكتى ماماننىڭ كەڭەسى جەتپەي تۇر. زەرەنگە كەلگەن سوڭ, وزىمە تالىمگەر تاپتىم. جەڭىسكە جەتىپ, جوبامدى ەلىمە تانىستىرۋدى ارماندايمىن جانە وعان بارلىق مۇمكىندىگىم بار دەپ ويلايمىن. جاستاردى قولداۋعا ارنالعان «زەرەن-2019» ءتارىزدى جوبالار مەملەكەت تاراپىنان ۇلكەن قامقورلىق, ونىڭ ۇستىنە تەگىن قاتىسىپ, 9 كۇن بويى جەمىستى جۇمىس ىستەۋ مۇمكىندىگىڭ بار. جاستاردىڭ بارىنە ءوز كۇشىن بايقاپ كورۋگە, بايقاۋلارعا قاتىسۋعا قورىقپاۋعا, قاتىسۋعا ءوتىنىش بەرىپ, جارىپ شىعۋعا كەڭەس بەرەمىن, سەبەبى سولاي ەتسەك قانا ءبىز ءوزىمىزدى كورسەتە الامىز», - دەپ اقبوتا العان اسەرىمەن ءبولىستى.
9 كۇننەن كەيىن, ءبىرىنشى اۋىسىمنىڭ سوڭىندا 10 جەڭىمپازدىڭ اتى بەلگىلى بولادى, ولاردىڭ جوبالارىنا قارجى ءبولىنىپ, ىسكە اسۋ مۇمكىندىگىنە يە بولادى. وسى اۋىسىمدا ءوز ءىسىنىڭ ناعىز مايتالمانى سانالاتىن كەلەسى ساراپشىلار قاتىسۋشىلار الدىندا ءسوز سويلەپ, تاجىريبەسىمەن بولىسەدى: قازاقستاننىڭ مەملەكەتتىك جانە قوعام قايراتكەرى ءاليحان بايمەنوۆ, قازاقستاندىق تانىمال الپينيست ماقسۇت جۇماەۆ, «قازاقستان بارىسى» قازاق كۇرەسىن دامىتۋ قورى قامقورشىلىق كەڭەسىنىڭ توراعاسى ارمان شوراەۆ, «Bilim Media Group» كومپانياسىنىڭ نەگىزىن قالاۋشى جانە جەتەكشىسى راۋان كەنجەحان ۇلى, ساياساتتانۋشى دوس قوشىم جانە باسقالار.
ايتا كەتەرلىك ءبىر جايت, قاتىسۋشىلاردى ىرىكتەۋ 2019 جىلعى 27 مامىر مەن 30 ماۋسىم ارالىعىندا www.zerencamp.kz سايتىندا ءوتتى. «زەرەن-2019» جوباسىنا قاتىسۋعا 1000-نان استام ءوتىنىش كەلىپ ءتۇستى. جوباعا جاستاردىڭ وسىنشا قىزىعۋشىلىق تانىتۋى ونىڭ اۋقىمىنا, وعان دەگەن ماڭىزدى كوزقاراسقا جانە قازىرگى كەزدە زاماناۋي جاستاردى قاتتى قىزىقتىراتىن تاڭداۋلى تاقىرىپتىڭ وزەكتىلىگىنە بايلانىستى ورىن الىپ وتىر.
قوسىمشا اقپارات الۋ ءۇشىن كەلەسى تەلەفوندارعا حابارلاسۋعا بولادى: 8 (7172) 76 98 56, +7 702 293 39 63, e-mail: media@askredpoint.com.