ءيا, ستۋدەنتتىڭ تاڭداعان ماماندىعى بويىنشا بىرنەشە جىل تالماي-تىنباي وقىعاندىعىن, بىلىكتى مامان ەكەندىگىن كۋالاندىراتىن قۇجات ءدال وسى كۇنى ءجۇرەكتەرى تولقىعان تۇلەكتەردىڭ قولىنا تابىستالادى. ال ول دەگەنىمىز – جاس ماماننىڭ اۋديتوريامەن قوشتاسىپ, ءومىردىڭ جاڭا بەلەسىنە قادام باسقاندىعىنىڭ بىردەن-ءبىر ءدالەلى.
وتكەن اپتادا «استانا وپەرا» تەاترىنىڭ ءمارمار زالىندا قازاق ۇلتتىق حورەوگرافيا اكادەمياسى تۇلەكتەرى دە وسىنداي تاماشا كەشتىڭ جۇلدىزدارى اتاندى. كامەرالىق سيمفونيا وركەسترىنىڭ سۇيەمەلدەۋىندە ورىندالعان «جاستار ءۆالسىنىڭ» ىرعاعىندا مىڭ بۇرالا بيلەپ ورتاعا شىققان بالەتتىڭ بولاشاق ءبىلگىرلەرى سالتاناتتى كەشتىڭ ءسانىن كىرگىزدى.
مادەنيەت ءجانە سپورت مينيسترى اقتوتى رايىمقۇلوۆا جاس ماماندارعا ءوز قۇتتىقتاۋىن جەتكىزە كەلە, قازاقستان ءمادەنيەتىنە عانا ەمەس, كۇللى الەم مادەنيەتىنىڭ دامۋىنا ۇلەس قوسقىسى كەلەتىن ءاربىر تۇلەكتىڭ ەلىمىز ءۇشىن ماڭىزدىلىعىن اتاپ كورسەتتى. ايتۋلى جيىندى ءوزىنىڭ قۇتتىقتاۋ لەبىزىمەن جالعاعان قازاق ۇلتتىق حورەوگرافيا اكادەمياسىنىڭ رەكتورى, رەسەي حالىق ءارتىسى التىناي اسىلمۇراتوۆا ءبۇگىنگى شاكىرت, ەرتەڭگى ءارىپتەستەرىنە اق جول ءتىلەپ تۇرىپ, ديپلومدارىن تابىس ەتتى.
بيىل ءۇشىنشى تولقىن تۇلەكتەرىن ۇياسىنان ۇشىرعالى وتىرعان ءبىلىم ورداسىنىڭ وسى ۋاقىت ارالىعىندا اۋىز تولتىرىپ ايتارلىق جەتىستىگى مەن جەڭىسى جەتەرلىك. ونى اكادەميا پرورەكتورى بيبىگۇل ءنۇسىپجانوۆا زور ماقتانىشپەن اتاپ ءوتتى.
– بۇل كۇن قازاق ۇلتتىق حورەوگرافيا اكادەمياسى تاريحىنداعى ەڭ ماڭىزدى وقيعا بولىپ سانالادى. ويتكەنى ءبىزدىڭ ءتورت جىل بويى باپتاپ, ءبىلىم نارىمەن سۋسىنداتقان تۇلەكتەرىمىز ۇلكەن ساحناعا جولداما الىپ, قانات قاققالى تۇر. ءبىزدىڭ ءار ستۋدەنت – تالانتتى, سۇلۋ. سوندىقتان دا بالەت ونەرىنىڭ ەرتەڭى جارقىن بولادى دەپ سەنىممەن ايتا الامىن. ءبىزدىڭ بالالارىمىزدىڭ تەك كەرەمەت بالەت بيشىلەرى عانا ەمەس, ەڭ باستىسى, ەلىمىزدىڭ لايىقتى ازاماتتارى بولۋىن قالايمىن, – دەدى پرورەكتور ءوز سوزىندە. بيبىگۇل نۇرعاليقىزى اتاپ وتكەندەي, بيىلعى وقۋ جىلىندا قازاق ۇلتتىق حورەوگرافيا اكادەمياسىنىڭ 5 ماگيسترى, 17 باكالاۆر جانە 21 تەحنيكالىق ءجانە كاسىپتىك ءبىلىم بەرۋ ماماندىعىنىڭ ستۋدەنتتەرى كاسىبي مامان اتانىپ, ءبىلىم شاڭىراعىنا قيماستىقپەن قول بۇلعادى. تۇلەكتەردى ەرەسەك ومىرگە اتتاندىرعان ايتۋلى شارا يوگانن شتراۋستىڭ اسەم ۆالسىمەن ادەمى نوتادا ءوز مارەسىنە جەتتى. اينا الپىسباي, ل.ن.گۋميلەۆ اتىنداعى ەۇۋ-ءدىڭ ستۋدەنتى