فەستيۆالگە رەسەي مەن قازاقستانداعى جەتەكشى قولونەر ورتالىقتارى مەن كلۋبتارىنىڭ وكىلدەرى قاتىسىپ, ەجەلگى بابالار قولدانعان قارۋلاردى, قۇرالدار مەن تۇرمىستىق زاتتاردى, ەجەلگى داۋىردەگى تەرى مەن كيىزدەن جاسالعان كيىمدەردى جاساپ كورسەتتى. كورەرمەندەر ەجەلگى كيىمدەر دەفيلەسىن دە تاماشالادى. وندا ۇلى دالا تۇرعىندارى: اندرونوۆتىقتار, ساقتار, قىپشاقتار, التىنوردالىقتاردىڭ جاڭعىرتىلعان كيىمدەرى كورسەتىلدى.
«وركەنيەت بىردەن كەلە قالعان جوق. ءبىزدىڭ داۋىرىمىزگە دەيىنگى ەجەلگى بابالار جىلى ءارى تۇرمىسقا قولايلى زاتتاردى جاساي باستادى. ارحەولوگيالىق قازبالاردان ولار قولدانعان كيىمدەردىڭ جۇرناقتارى تابىلىپ جاتادى. ولاردان قالعان مۇرا جالپى ادامزاتقا ورتاق. مىسالى, قازاقستانداعى ۇلى دالا مەن ۋكراينا حالقىنىڭ مادەنيەتىندە ەجەلگى بابالاردان قالعان مۇرانىڭ ۇقساساتىعى تاڭقالدىرادى. پاۆلودار قالاسىنداعى «YMAI» عىلىمي-زەرتتەۋ لابوراتورياسى ەجەلگى بابالار مۇرالارىن جاڭعىرتۋدا ۇلكەن جۇمىستاردى قولعا الا باستادى» – دەيدى لابوراتوريا مەڭگەرۋشىسى تاتيانا كرۋپا. بۇل فەستيۆالدىڭ ۇيىمداستىرىلۋىنا ارحەولوگيا سالاسىنداعى عىلىمي جۇمىستار ناتيجەسى مەن كوزقاراستار توعىسى سەبەپ بولىپتى.
– ءاربىر ارحەولوگتى تابىلعان ولجادان كەيىن كوپ وي مازالايدى. ولار «تابىلعان سۇيەك ەجەلگى داۋىرلەردە قالاي كيىندى, قالاي تاماقتاندى, قالاي ءومىر ءسۇردى؟» دەگەن ويلارعا جاۋاپ ىزدەيدى. چەليابى وبلىسىنداعى وڭتۇستىك ۋرال ۋنيۆەرسيتەتىندەگى «ارحەوس» تاريحي جوبالار ورتالىعىنىڭ عالىمدارىمەن, حانتى-مانسيسكىدەگى «حالىق كوركەم قولونەرى مەن كاسىپشىلىگى» ورتالىعى ماماندارىمەن كەلىسىپ, وسىنداي فەستيۆال وتكىزۋدى ويلاستىرعانبىز. فەستيۆال قوستاناي وبلىسى وڭىرىندەگى ارحەولوگيالىق ەسكەرتكىشتەردى ناسيحاتتاۋدى دا ماقساتىنىڭ ءبىرى ەتىپ وتىر. مۇنى ۇرپاق ءبىلۋى ءتيىس, – دەيدى ارحەولوگ ەمما ۋسمانوۆا.
فەستيۆالدە قولونەرشىلەر ەجەلگى ادامدار قولدانعان قۇمىرالار, توقىما بۇيىمدارىن, تاستان قۇرالدار جاساپ كورسەتتى. سونىمەن قاتار فەستيۆال قوناقتارى نوۆويلين اۋىلىنداعى ارحەولوگيالىق قازبا ورنىنا ساياحات جاسادى.
قوستاناي