ەكسپەديتسيا باعىتى ەركىندىككە جىبەرىلگەن بۇركىتتەر مەكەندەيتىن الماتى وبلىسىنىڭ اۋماعىنداعى ارقارلى مەن مالايسارى, ۇلكەن جانە كىشى بۇعىتى, سوگەتى تاۋلارىن, تورايعىر مەن شارىننىڭ جوعارعى بولىگىن قامتىدى.
ەسەپ بويىنشا بۇل اۋماقتا بۇگىنگى تاڭدا 36 بۇركىت بار ەكەن. ماماندار 14 تاستۇلەك پەن مۇزبالاقتى جانە 11 جۇپتى تىركەگەن.
– ءبىرىنشى كەزەڭدە جوڭعار الاتاۋىنىڭ سىلەمدەرى زەرتتەلدى. ساپارىمىز باستالعاننان كەيىنگى بىرنەشە كۇن ىشىندە ەكى بۇركىت جۇبىن انىقتادىق. ەكىنشى كەزەڭدە ىلە الاتاۋى اۋماعىن ءجانە التى جىل بويى بۇركىتتەر ەركىندىككە جىبەرىلگەن الماتى وبلىسىنىڭ جەرلەرىن قاراپ شىقتىق. تەكسەرىلگەن تەلىمدەردە ءبىز تاستۇلەكتەردى دە, ۇيا سالاتىن ءبۇركىتتەردى دە كەزدەستىردىك, – دەيدى توپ جەتەكشىسى, ورنيتولوگ سەرگەي شمىگالەۆ.
ەكسپەديتسيا قازاقستاندا 2012 جىلى قولعا الىنعان «ۇلەسىڭدى قوس. تابيعاتتى امان ساقتاپ قال» اتتى «ەفەس قازاقستان» كومپانياسى جوباسىنىڭ ارالىق قورىتىندىسىن شىعارىپ وتىر. وسى ارالىقتا «سۇڭقار» تالىمباعىندا 25 بۇركىت بالاپانى ءوسىرىلىپ, تابيعات اياسىنا جىبەرىلدى.
قازاقستان اۋماعىندا مەكەندەيتىن بۇركىتتەردىڭ ساناعى سوڭعى رەت 7 جىل بۇرىن ەسەپتەلگەن ەكەن. ەسەپتەۋ ناتيجەسى مەن ورنيتولوگتەردىڭ باعالاۋىنشا 2012 جىلى بۇركىتتەردىڭ پوپۋلياتسياسى ازايعان, الماتى وبلىسىنىڭ ءۇلكەن جانە كىشى بۇعىتى ايماعىندا بار-جوعى 4-5 جۇپ قانا قالعان بولاتىن.
– كوپ جىل بويعى ەڭبەگىمىزدەن وسىنداي تاماشا ءناتيجە شىققانىنا اسا قۋانىشتىمىز. 2012 جىلمەن سالىستىرعاندا قازىر ۇيا سالاتىن ءبۇركىت جۇپتارىنىڭ بىرنەشە ەسە وسكەنى انىقتالىپ وتىر. قازاقستاننىڭ مەملەكەتتىك بايراعىندا بەينەلەنگەن ۇلتتىق نىشاندى ساقتاپ قالۋ – ءبىزدىڭ كومپانيانىڭ كورپوراتيۆتىك الەۋمەتتىك جاۋاپكەرشىلىك سالاسىنداعى باسىم مىندەتتەرىنىڭ ءبىرى, – دەيدى «ەفەس قازاقستان» اق كورپوراتيۆتىك قاتىناستار دەپارتامەنتىنىڭ ديرەكتورى شىڭعىس قاسكەەۆ.
بۇركىتتەردى قورعاۋعا ارنالعان باعدارلاما ءارى قاراي دا جۇزەگە اسىرىلا بەرمەك.
الماتى