مامىرسۇيگەن
ساۋلە شاشقان, الاۋلاعان شىرايلى, مامىرسۇيگەن دەپ اتايىق بۇل ايدى, سەبەبى, ءبىر جاماندىقتان اۋلاق بوپ, ءبىر جاقسىلىق بولاتۇعىن سىڭايلى.
سيرەن وسكەن باقشالارعا ءبىر بارىپ, ىڭكارداريا سەزىمىندە ىرعالىپ, جۇرەيىكشى, كەۋدەگە ءان تولتىرىپ, جۇزىمىزگە نارتتاي قىزىل نۇر تامىپ.
جاعۋ ءۇشىن شىراقتاردان ءبىر الاۋ, كەرەك شىعار تۇڭعيىققا قۇلاماۋ. مۇمكىن ءبىزدىڭ جولىمىز دا اشىلار, مۇمكىن بىزگە باق قوناتىن شىعار-اۋ.
ساۋلە شاشقان, الاۋلاعان شىرايلى, مامىرسۇيگەن دەپ اتايىق بۇل ايدى, سەبەبى, ءبىر جاماندىقتان اۋلاق بوپ, ءبىر جاقسىلىق بولاتۇعىن سىڭايلى.
***
تانىس اۋەن ەستىگەندە قۇلاعىم, كەۋدەمە ورناپ قالاتىنداي ءبىر اعىن. ساعىندىم مەن قايتقان قازدىڭ قاڭقىلىن, تىرنالاردىڭ تىراۋىن.
ساۋلەسىنە شومىلعاندا ساعىم قىر, شۋاعىنا جىلىنا السام باعىم بۇل. تاۋدان اققان تاس بۇلاقتىڭ, ءتاڭىرىم, مولدىرلىگىن ساعىندىر.
دالا, دالا كوكىرەگىن كورىك دەپ, جىرلارىڭدى, جۇمباعىڭدى بەرىپ كەت. اق سەلەۋگە ۇقساسا ەكەن ولەڭىم, اق جۋسانعا ەلىكتەپ.
سۇڭعاق اتتى, سۇلۋ قىزدى, سىمباتتى, ساعىم دالا قانشاما ءاندى تىڭداتتى. شەشىلە ءبىر سىر اقتارسام دەپ ەدىم, شيەگە اۋناپ كۇن باتتى...
جەڭ
ەستەلىكتەر - كوڭىلىمدى قوزعاسىن, ەسكى كۇننىڭ بىلەم ەندى وزباسىن. بالا كەزدە ويناعان بوپ, (شىنىمەن) جىلقىلاردىڭ ءسۇرتىپ ءجۇردىم كوز جاسىن.
ءسۇرتىپ ءجۇردىم شۇباتىلعان جەڭىممەن كوز جاسى ەندى اقپايتىنداي سەنىممەن. ەشتەڭەگە ءمان بەرمەدىم, ەلەمەي, ەشتەڭە دە بايقالمادى وڭىمنەن.
قازىر ەندى سالام دəۋرەن əنىمە, قايراتى بار, جىگەر تۇنعان جانى دە! مىقتىمىن عوي! ...تەك باياعى ۇزىن جەڭ سۋ-سۋ بولىم تۇرعان سىندى ءالى دە.
***
كۇمىس ساۋساق. التىن كەۋدە. اق بىلەك. جىر ساۋلاعان بۇرىمىڭنان باق تىلەپ. سەنىڭ كوزىڭ قاراقاتتان قاپ - قارا, سەنىڭ ەرنىڭ قۇلپىنايدان تاتتىرەك.
سەزىمدەردىڭ اياۋلىسى العاشقى-اي... ءتوزىم ءبىتىپ, سوزدەرىم دە جالعاسپاي. ءومىرىڭنىڭ قيىندىعىن بىلمەيمىن, كوڭىلىڭنىڭ نازىكتىگى راۋعاشتاي.
الاقانىڭ جىلۋى مول كۇن شىعار, ەركەلىگىڭ جىبەكتەيىن ءتۇن شىعار. كوز قيىعىن تاستاپ كەتسەڭ تاسادا, جىگىت بىتكەن جاستىعىنا تۇنشىعار.
تەڭەي كورمە پەرىشتەگە, ەلەسكە, تۇسىرمەيدى ءلايلانى دە ول ەسكە. سۇلۋلىقتا دارىن جوق دەپ كىم ايتتى, سۇلۋلىقتىڭ ءوزى دارىن ەمەس پە؟
***
مۇز قۇرسانعان بۇلاقتى جارىپ شىعىپ سىلدىراعان سۋ اقتى; بىرەۋ سەنىڭ سۇراپ ەدى جاسىڭدى, سەنىڭ جاسىڭ – كوكتەم ەدى شۋاقتى. باۋىرىندا ءوسىپ شىعىپ اۋىلدىڭ, قارا كوزدىڭ قۇدىرەتىمەن اۋىردىم. گۇل كومكەرگەن كوك كويلەكتى كيىپ اپ, كەربەز تۇردىڭ, قۇرداسىنداي ءسəۋىردىڭ. مۇراتىنا جەتپەگەننىڭ, جەتكەننىڭ, پەيىلىنە بەرەتىنىن كوپ كوردىم. جاقسى ادامدار – جىلۋلىقتىڭ ايناسى, جاقسى ادامدار – كوشىرمەسى كوكتەمنىڭ.
***
قۇلاتپاي جىلدارعا ەڭسەنى, تاۋ بولىپ شىدادىڭ بار سىنعا. نəزىك ءۇن ەستىدىم مەن سەنىڭ مەيىرىمدى فاتيھا داۋسىڭدا. بىلەمىن وزىڭدە باق بارىن, بىلەمىن ءوزىڭسىز كوڭىل-مۇڭ. وڭاشا نالىعان شاقتارىڭ, نازىنداي نايقالعان ءومىردىڭ. اياۋلى سəتتەرىم كوپ ەدى. كەۋدەمە كوشىرىپ əن اسىل. مەن ساعان ۇقساعىم كەلەدى, ۇقساعىم كەلەدى, اناشىم…
***
جاڭبىردىڭ استىندا جۇگىرىپ, جىپ-جىلى كەۋدەنى تولتىردى ءبىر ءۇمىت. جەردىڭ دە وقالى ەتەگى بۇرلەندى, كوك باتەس مايسامەن قۇلپىرىپ.
"جۇرەكپەن سەزگەنمەن, كوڭىلدە تاراماس" جىلايدى جاپىراق, قىمتالىپ تال-اعاش, جاڭبىردىڭ ءيىسى – جۋسانى قازاقتىڭ فرانتسۋز ءاتىرى ارالاس.
قىزىلدى, جاسىلدى جالعان-اۋ, وزىڭنەن ۇيرەندىم بوياۋىن تالعاماۋ. ...مەن بولسام جاڭبىردىڭ استىندا جۇرەم دەپ, جانىمدى شىلقىتىپ العام-اۋ...