سارسەنبى, 13 ناۋرىز 2013 6:59
ازىرگە اتى-ءجونى بەلگىسىز ءبىر جۇرگىزۋشى كۇنى كەشە عانا جامبىل وبلىسىندا ءبىر ايەلدى قاعىپ, قاشىپ كەتتى. قاقسا قاققان شىعار, ابايسىزدا نە بولمايدى دەرسىزدەر. بىراق, ول نەگە قاشادى؟ قاشۋدىڭ ورنىنا زارداپ شەككەن ادامعا دەر كەزىندە كومەك كورسەتپەي مە؟ بىراق, ول ويتكەن جوق. مىنە, سونىڭ سالدارىنان الگى ايەل جول-كولىك وقيعاسى بولعان جەردە كوز جۇمدى. وقيعا جامبىل اۋدانىنا قاراستى تۇركىسىب اۋىلىندا ورىن الدى. قازىر اتالعان ءىس بويىنشا وبلىستىق ءىىد ءتارتىپ ساقشىلارى تەرگەۋ امالدارىن جۇرگىزىپ جاتىر.
سارسەنبى, 13 ناۋرىز 2013 6:59
ازىرگە اتى-ءجونى بەلگىسىز ءبىر جۇرگىزۋشى كۇنى كەشە عانا جامبىل وبلىسىندا ءبىر ايەلدى قاعىپ, قاشىپ كەتتى. قاقسا قاققان شىعار, ابايسىزدا نە بولمايدى دەرسىزدەر. بىراق, ول نەگە قاشادى؟ قاشۋدىڭ ورنىنا زارداپ شەككەن ادامعا دەر كەزىندە كومەك كورسەتپەي مە؟ بىراق, ول ويتكەن جوق. مىنە, سونىڭ سالدارىنان الگى ايەل جول-كولىك وقيعاسى بولعان جەردە كوز جۇمدى. وقيعا جامبىل اۋدانىنا قاراستى تۇركىسىب اۋىلىندا ورىن الدى. قازىر اتالعان ءىس بويىنشا وبلىستىق ءىىد ءتارتىپ ساقشىلارى تەرگەۋ امالدارىن جۇرگىزىپ جاتىر. جالپى, وبلىستا جول-كولىك وقيعاسى سوڭعى جىلدارى ءجيى ورىن الۋدا. وسىدان بىرنەشە جىل بۇرىن الماتى-تاشكەنت جولىنىڭ مەركى اۋدانى اۋماعىندا ءبىر اۆتوبۋس اپات بولىپ, بىردەن 21 ادامنىڭ كوز جۇمعانىن قابىرعامىز قايىسا وتىرىپ جازعانبىز. جۋىردا وسى باعىتتىڭ كۇيىك اسۋىندا وڭتۇستىك قازاقستان وبلىسىنان شىققان 2 اۆتوبۋس جول تازالاپ جۇرگەن تەحنيكاعا سوقتىعىسىپ, تاعى دا بىرنەشە ادام وپات بولدى. وسى جاعدايعا الاڭداعان وبلىس اكىمى ق.بوزىمباەۆ, ءتىپتى, ۇكىمەت باسشىسى س.احمەتوۆكە بىرقاتار ۇسىنىسپەن شىقتى. بىراق, اپات تيىلار ەمەس. جاقىندا عانا الماتى-تاشكەنت باعىتىندا تاعى دا جول-كولىك اپاتى ورىن الىپ, ادام شىعىنىنا جول بەرىلدى. دەمەك, وبلىس باسشىسى بەكەرگە الاڭداپ وتىرعان جوق.
مىنە, جىلدىڭ باستالعانىنا ءۇش اي دا تولعان جوق. بىراق وسى ۋاقىت ىشىندە وبلىستا 23 جول-كولىك وقيعاسى تىركەلىپ, 5 ءبۇلدىرشىن كوز جۇمسا, 25 ءسابي جاراقات الىپتى. ال وبلىس ورتالىعى – تاراز قالاسىندا 7 جول-كولىك وقيعاسى تىركەلىپ, 8 بالا جاراقات العان. مالىمەتكە جۇگىنسەك, جول-كولىك وقيعاسىنا تاپ بولعان بالالاردىڭ جاسى 10 مەن 14 جاستىڭ اراسىندا. ال قازا تاپقان بالالاردىڭ ورتاشا جاسى 7-دە ەكەن.
جۇرگىزۋشىلەردىڭ تىكەلەي كىناسىنەن (جايباراقاتتىق, نەمكەتتىلىك, سالاقتىق, دورەكىلىك جانە ت.ب.) ەرەسەك ادامدارمەن بىرگە بالالاردىڭ دا كوز جۇمىپ, مۇگەدەك بولىپ قالۋى الاڭداتپاي قويمايدى. وتكەن جىلى, مىسالى, جول-كولىك اپاتىنان 22 بايكۇنا ءسابي كوز جۇمسا, 177 بالا جاراقات العان.
ۇكىمەت بۇگىندە جول-كولىك اپاتىن بولدىرماۋدىڭ بارلىق شارالارىن جاساپ جاتىر. ونىڭ جۇزدەگەن مىسالى بار. سونىڭ ءبىرى – «باتىس ەۋروپا – باتىس قىتاي» ترانزيتتىك ءدالىزى. ءبىزدىڭ جۇرگىزۋشىلەردىڭ دورەكىلىگى مەن سالاقتىعىنان, مىنە, وسى داڭعىراعان جولدىڭ وزىندە دە جول-كولىك وقيعاسىنا ءجيى جول بەرىلە باستادى. جەكەمەنشىك اۆتوبۋس يەلەرى مەن ونىڭ جۇرگىزۋشىلەرىنە اقشا قانداي قاجەت بولسا, مەملەكەتىمىزگە ادام ءومىرى دە اۋاداي قاجەت. ويتكەنى, ەلدىڭ ەڭ باستى بايلىعى – ادام. تاسىمال قىزمەتىن مويىندارىنا الدى ەكەن, ادام تاعدىرىنا دا باسىمەن جاۋاپ بەرگەندەرى ءجون. مۇنى نەگە باسا ايتىپ وتىرمىز؟ ويتكەنى, سوڭعى جىلدارى جول-كولىك اپاتىن جاساعان ترانسپورتتاردىڭ 32-ءى اۆتوبۋس بولىپ وتىر. سول جول-كولىك وقيعاسىنىڭ سالدارىنان 12 ادام شىعىن بولسا, 58-ءى جارالانعان. جارالانعان دەگەن جاي ءسوز, كەمتار, مۇگەدەك بولىپ قالۋلارى دا مۇمكىن عوي.
وبلىس اكىمى ق. بوزىمباەۆ جاقىندا وتكەن ءبىر جيىندا وبلىستىق ءىىد باستىعى ب.ايماعامبەتوۆكە: «الماتى-تاشكەنت جولىنىڭ بويىمەن 300 شاقىرىم ءجۇرىپ ءوتتىم. سول ۋاقىتتىڭ ىشىندە الماتى وبلىسى اۋماعىنان نەبارى 2 جول پوليتسەيىن كورسەم, ال قورداي ماڭىنداعى جولدىڭ ازعانتاي بولىگىنەن 8 جول پوليتسەيىن كەزدەستىردىم. ولار جىلدامدىقتى باقىلايتىن بەينەكامەرانى قويادى دا, وزدەرى تاسادا تىعىلىپ تۇرادى. مۇنى جۇرگىزۋشىلەردى بوپسالاۋ ءتاسىلى دەپ باعالاماسقا شارا جوق. ايتايىن دەگەنىم, جول پوليتسەيلەرىنىڭ مىندەتى – ايتەۋىر ءبىر جۇرگىزۋشىنى ۇستاپ الۋ ەمەس, كەرىسىنشە جول-كولىك اپاتىنىڭ الدىن الۋ. سوندىقتان, جىلدامدىق ولشەگىشتى قويسا قويسىن, بىراق جۇرگىزۋشىلەردەن جاسىرىنباي, اشىق جەردە تۇرسىن», دەدى.
تۇسىنەتىن باس بولسا, جاي ايتىلعانمەن وتە اۋىر ءسوز.
كوسەمالى ساتتىباي ۇلى,
«ەگەمەن قازاقستان».
جامبىل وبلىسى.