ەسكەرتكىشتىڭ اشىلۋ راسىمىنە قاراعاندى وبلىستىق پوليتسيا دەپارتامەنتى باسشىسىنىڭ ءبىرىنشى ورىنباسارى, پوليتسيا پولكوۆنيگى قۇرمانعالي يسماعۇلوۆ, شەت اۋدانىنىڭ اكىمى مارات جانداۋلەتوۆ, شەت اۋداندىق پوليتسيا ءبولىمىنىڭ باسشىلىعى مەن جەكە قۇرامى جانە تۇرعىندار قاتىستى.
پوليتسيا باسشىسى مەن اۋدان اكىمى ەسكەرتكىشتى اشقاننان كەيىن, شاراعا قاتىسۋشىلار الدىندا ءسوز سويلەدى.
– قىزمەتتىك مىندەتتەرىن ورىنداۋ بارىسىندا قازا بولعانداردى ەسكە الىپ, ولاردىڭ رۋحىنا تاعزىم ەتۋ – ءبىزدىڭ قاسيەتتى بورىشىمىز! بۇل – كەيىنگى ۇرپاق ءۇشىن ۇلگى بولارلىق يگى ءىس, – دەپ اتاپ ءوتتى ق.يسماعۇلوۆ.
بۇدان كەيىن ەسكەرتكىشكە ازا گۇلدەرى قويىلىپ, قازا بولعانداردى ءبىر مينۋتتىق ۇنسىزدىكپەن ەسكە الۋ ءراسىمى ورىندالدى. قارۋدان دۇركىندەتە وق اتىلدى.
سونان سوڭ, پوليتسيا پولكوۆنيگى ق.يسماعۇلوۆ مەرەكە قۇرمەتىنە وراي شەت اۋداندىق پوليتسيا ءبولىمىنىڭ باستىعىنا قىزمەتتىك «نيۆا» اۆتوكولىكتەرىنىڭ كىلتتەرىن تابىس ەتتى.
اۋداندىق مادەني-ويىن-ساۋىق ورتالىعىندا جالعاسقان شارا بارىسىندا جەرگىلىكتى پوليتسيا بولىمشەسىنىڭ ءبىر توپ قىزمەتكەرلەرى ىشكى ىستەر ءمينيسترىنىڭ, وبلىستىق پوليتسيا دەپارتامەنتى باسشىسىنىڭ جانە اۋدان اكىمىنىڭ قۇرمەت گراموتالارىمەن ماراپاتتالدى. سونىمەن قاتار, بىرقاتار ءتارتىپ ساقشىسىنا كەزەكتى شەن بەرىلدى.
شارا سوڭىندا جەرگىلىكتى ونەرپازداردىڭ كۇشىمەن مەرەكەلىك كونتسەرت قويىلدى.
قاراعاندى وبلىسى