ەلىمىز بويىنشا بارلىعى 169 تەستىلەۋ پۋنكتى جۇمىس ىستەيدى. ەلورداداعى جوعارى وقۋ ورنىنا ات باسىن بۇرعان ۆەدومستۆو باسشىسى: «بيىلعى ۇبت-نى باستايتىن ءبىرىنشى لەككە ساتتىلىك تىلەپ كەلىپ وتىرمىن. مەن 10 جىل بويى تەستىلەۋ وتكىزۋ ءراسىمىنە قاتىستىم. بايقاساق, بالالار جىلدان-جىلعا بايسالدى بولىپ كەلەدى. بيىل تەكسەرىستەن وتكىزۋ بارىسىنان باستاپ باقىلادىم, سوندا ولاردىڭ سالماقتى, كوڭىلدى بولدى. بۇل – ۇبت وتكىزۋدى جەتىلدىرۋگە باعىتتالعان 4 رەتتىك تاپسىرۋ مۇمكىندىگىنىڭ ناتيجەسى. ۇمىتكەر ساناسىنداعى ءبىر ەمەس, بىرنەشە مۇمكىندىكتىڭ بارىنا دەگەن سەنىمدىلىك پسيحولوگيالىق جاي-كۇيىن رەتتەۋگە ىقپال ەتەتىنى ءسوزسىز», دەدى.
ونىڭ ايتۋىنشا, بيىل بىتىرگەن بارلىق 134 مىڭ مەكتەپ تۇلەگىنىڭ 115 مىڭى قاڭتار, ناۋرىز ايلارىندا وتكىزىلگەن ۇبت-دا باق سىنادى. ولاردىڭ العان سەرتيفيكاتى ەلىمىزدەگى جوو-لاردىڭ اقىلى وقۋ ءبولىمىنە تۇسۋگە دە مۇمكىندىك بەرەدى.
ەلىمىزدىڭ باس پەداگوگى: «بۇل – ۇلكەن ەمتيحان. سوندىقتان قوبالجىماي, اسىقپاي, مەكتەپتە 11 جىل بويى ۇيرەنگەندەرىڭىزدى ويلاپ, ەشقانداي تىيىم سالىنعان زاتتاردى پايدالانباي, شىن ءبىلىمدى كورسەتىپ, ابىرويمەن الىپ شىعادى دەپ سەنەمىن. بيىك شىڭداردى باعىندىرىپ, ەلىمىزدىڭ دامۋىنا ۇلەس قوساتىن ازامات بولۋلارىڭىزعا تىلەكتەسپىن!» دەدى تالاپكەرلەرگە.
ايتا كەتەيىك, ماۋسىمداعى ۇبت-دا شەكتى بالل جيناي الماعاندار تامىز ايىنداعى تەستىلەۋگە قاتىسا الادى, ءبىراق بۇل مۇمكىندىك سەرتيفيكاتتى ءجوندەپ الۋعا عانا بەرىلگەن. ونداعى ءناتيجەمەن, مەيلى ول ماۋسىمداعى قورىتىندىدان ەكى-ءۇش ەسە جوعارى بولسىن, تەك اقىلى نەگىزدەگى وقۋعا تۇسە الادى.
ا.ايماعامبەتوۆ بيىل مەملەكەت باكالاۆرياتقا 53 758, ماگيستراتۋراعا 13 000, دوكتورانتۋراعا 2312 گرانت بولىنگەنىن ايتتى. ءبىز گازەتىمىزدىڭ وتكەن سانىندا باكالاۆرياتقا 51 مىڭنان اسا گرانت بولىنگەنىن جازعانبىز. وعان مەديتسينا ماماندىقتارىنداعى ورىن سانىنىڭ ءالى قوسىلماعانىن ەستەرىڭىزگە سالامىز. بولاشاق ءدارىگەرلەرگە مەملەكەتتىك ءبىلىم بەرۋ گرانتتارىن كەيىنىرەك دەنساۋلىق ساقتاۋ مينيسترلىگى بەلگىلەيدى.
«بالاسى اتقا قونسا, اناسى تاقىمىن قىسادى», دەگەن ءسوز بار قازاقتا. بۇگىنگى قوعام اراسىندا, اسىرەسە اتا-انالار ءۇشىن ۇبت ءبىلىم بايگەسى سىندى. دينا بەردىبەكقىزىنىڭ بالاسى استانامىزداعى №54 مەكتەپتى بىتىرگەن. ۇبت-دان بالاسىنىڭ جاقسى ناتيجەگە قول جەتكىزۋىن كۇتەتىنىن ايتقان انا: «بالامنىڭ بىلىمگە دەگەن قۇشتارلىعى جوعارى. كىشكەنتاي كەزىنەن ءبىلىم سايىستارىنا قاتىسىپ, ماقتاۋ قاعازدارىمەن ماراپاتتالىپ كەلەدى. بالامنان ۇلكەن ءۇمىت كۇتەمىن, تەستىلەۋدەن جاقسى ناتيجە كورسەتۋىن قالايمىن. باستىسى, ەگەمەن قازاقستانىمىزدىڭ دامۋىنا ۇلەسىن قوساتىن ازامات بولسا ەكەن دەيمىن. بالام ۇبت-عا ەرەكشە دەن قويىپ دايىندالدى. ول اعىلشىن, قىتاي تىلدەرىنەن قوسىمشا كۋرستارعا دا قاتىستى», دەيدى. ونىڭ ايتۋىنشا, بالاسى اكتەر ماماندىعىن, ياعني ونەر سالاسىن تاڭداپ وتىر. مەكتەپ قابىرعاسىندا جۇرگەندە ءتۇرلى رولدەردى سومداعان كورىنەدى. اتا-انا بالاسىنىڭ باسقا سالاعا بەت بۇرعانىن قالاعانىمەن, پەرزەنتىنىڭ قالاعان ماماندىعىن ءوزى تاڭداۋىنا ەرىك بەرىپتى. ويتكەنى اركىم ەرتەڭگى ومىرىنە ءوزى جاۋاپتى بولۋى كەرەك.
ال بولاشاقتا زاڭگەر بولۋدى قالايتىن ورالباي جانات 11-سىنىپقا كوشكەلى بەرى ۇبت-عا تۇراقتى تۇردە دايىندالعانىن ايتادى. بارلىق ءبىلىم قورىن جيناقتاپ, تەستىلەۋگە كەلىپتى. سوندىقتان ەڭ جوعارى 140 بالل الۋدان ءۇمىتتى. «وزىمە سەنىپ كەلدىم. 11 جىل جيناعان ءبىلىمىمنىڭ ناتيجەسىن بۇگىن بىلەمىن. كەلەشەكتە قۇقىق قورعاۋ سالاسىندا قىزمەت ەتكىم كەلەدى. بارلىق ۇمىتكەرلەرگە ساتتىلىك تىلەيمىن!», دەيدى ورالباي.