بۇكىل الەم جۇرتى كوز تىگىپ قاراعان كەزەكتەن تىس وتكەن سايلاۋدا قازاقستاندىقتار ءوزى ءومىر ءسۇرىپ وتىرعان قوعامنىڭ ساياسي تۇرعىدا كەمەلدەنگەنىن جانە تۇڭعىش پرەزيدەنت – ەلباسى نۇرسۇلتان نازارباەۆ باستاعان ستراتەگيالىق جوسپارلار مەن باستامالارعا سالعىرت قارامايتىنىن, كەرىسىنشە, تولىق قولدايتىنىن ايقىن كورسەتىپ بەردى.
ۇلىقتاۋ راسىمىنە قاتىسقان ەلباسى بۇل سالتاناتقا كوڭىل ۇيىتاتىن ايرىقشا ادامي اسەر سىيلادى – تامىرى تەرەڭگە كەتكەن عاسىرلار بويعى ارماندى شىندىققا اينالدىرىپ, دەربەستىككە قول جەتكىزگەن ەلدى ءتۇرلى توقىراۋلار مەن تۇتقيىلدان كەزىككەن قيىندىقتاردان كورەگەندىكپەن ويلاستىرعان رەفورمالارى ارقىلى امان-ەسەن الىپ شىققان ەلباسى جىلداردىڭ وتىندە ءجۇرىپ بىرگە شىڭدالعان ساياسي سەرىگىنە سەنىم ءبىلدىردى. سوندىقتان بولار, «ەل تىزگىنى سەنىپ تاپسىرىلعان جاڭا پرەزيدەنت انت بەرگەن سوڭ قازاقستان حالقىنا ارناپ ايتاتىن العاشقى ءسوزىن قالاي باستار ەكەن؟» دەگەن سۇراق ءارقايسىمىزدىڭ كوكىرەگىمىزدە سايراپ تۇردى.
ۇلكەن مىنبەردە تۇرىپ ءسويلەنگەن ءسوز جەكە ءوز باسىمدى ناقتىلىعىمەن جانە وزەكتىلىگىمەن يلاندىردى. ءبىز توقاەۆ ءۇشىن داۋىس بەرگەن كەزدە قولعا العان رەفورمالار مەن ىرگەلى باستامالاردى ءارى قاراي ىلگەرىلەتىپ, دامىتۋ ءۇشىن ءوزىنىڭ بارلىق مۇمكىندىكتەرىن سارقا پايدالانۋعا نيەتتى, وسى ۋاقىتقا دەيىن قالىپتاستىرىپ ۇلگەرگەن قازاقستاننىڭ حالىقارالىق بەدەلى مەن ابىرويىن ودان ءارى نىعايتا تۇسەتىن كاسىبي مەملەكەتتىك جانە ساياسي قايراتكەر ءۇشىن داۋىس بەرىپ تۇرعانىمىزدى تۇسىنگەن ەدىك. الايدا ۇلىقتاۋ سالتاناتى كەزىندە ءبىز پرەزيدەنتتىڭ ءاربىر مەملەكەتتىك مىندەتتى ورىنداۋشىدان ناقتى ناتيجە تالاپ ەتەتىن نيەتى بارىن ەستىگەندە, قۋانىشىمىز ءتىپتى ۇستەمەلەنە ءتۇستى. پرەزيدەنتتىڭ ءار سوزىنەن ەلدەگى جاعدايدى جاقسى بىلەتىندىگى, بولىپ جاتقان وقيعالارعا تۇسىنىستىكپەن قارايتىنى, ءادىل باعا بەرەتىنى سەزىلىپ تۇردى. مۇنىڭ دالەلى تامىز ايىنان باستاپ ىسكە كىرىسەتىن ۇلتتىق قوعامدىق سەنىم كەڭەسىن قۇرۋ تۋرالى شەشىمى بولدى. ياعني, پرەزيدەنت جاڭا لاۋازىمىنا كىرىسۋ ءۇشىن ۇزاق بەيىمدەلىپ, اسىقپاي ىرعالا باسىپ جۇرۋگە ۋاقىتىنىڭ جوق ەكەنىن بىردەن اڭداتتى. ونىڭ شەشىمدى جىلدام قابىلداپ, ىسكە تەز كىرىسىپ كەتكەنى قاراپايىم ادامداردىڭ كەۋدەسىنە سەنىم ۇيالاتىپ وتىر, سەبەبى بۇگىنگى كۇنى بيلىككە دەگەن سەنىم بارىنەن دە ماڭىزدى, جوعارى بولىپ تۇر: ءبىز ءبارىمىز دە ەلدەگى تۇراقتىلىق پەن بەيبىتشىلىكتى, كوشەدە الاڭسىز جۇرگەنىمىزدى, جات پيعىلدى ادامداردىڭ تىنىشتىعىمىزدى ۇرلاماعانىن قالاپ وتىرمىز.
ۇلتتىق كەڭەس – بۇل ءبىزدىڭ قوعامىمىزدىڭ تىنىشتىعىن شايقاعىسى كەلەتىندەرگە قارسى ايتىلعان جاۋاپ, بۇل – ءارتۇرلى قوعامدىق توپتاردىڭ, ءار بۋىنداعى ۇرپاقتىڭ بيلىكتىڭ ارەكەتى تۋرالى ءوز ويىن اشىق ايتىپ, ۇسىنىسى مەن جوباسىن ورتاعا سالۋعا مۇمكىندىك بەرەتىن كەلىسىمگە, ورتاق ءمامىلەگە كەلۋ الاڭى. سول سەبەپتى رەفورما جاساعىسى كەلىپ قۇلشىناتىندارمەن, ونى جۇزەگە اسىرۋعا ۇمتىلاتىندارمەن, سودان كەيىنگى ونىڭ ناتيجەسى ءۇشىن بارماعىن شايناپ, وكىنەتىندەرمەن كەرى بايلانىس جاساۋدى رەتكە كەلتىرۋ ءمۇمكىندىگىن پايدالانعانىمىز وتە ورىندى.
قاسىم-جومارت كەمەل ۇلى الەۋمەتتىك ساياساتتى جاڭارتۋ قاجەتتىلىگىن العا تارتىپ وتىرعان كەزدە بۇل يدەيا دەر كەزىندە جاسالۋىمەن ءارى وزەكتىلىگىمەن كوڭىلگە قوناتىنىن كورسەتتى. ۇلتتىق كەڭەس مەملەكەتتىڭ نازارىن وسى سالاداعى ماڭىزدى ماسەلەلەرگە اۋدارۋعا مۇمكىندىك بەرەدى. ونى ءوز ماقساتىمىزعا پايدالانا الامىز با, جوق پا, ول تەك بىزگە بايلانىستى بولىپ وتىر.
بىراق مادەنيەت سالاسىندا قىزمەت ەتەتىن مەن, ءتۇيىنى تارقاتىلماعان, كۇرمەۋى قيىن ماسەلەلەردىڭ شەشىمى تۇرعىن ءۇي, جالاقى نەمەسە باعا ساياساتى سەكىلدى الەۋمەتتىك سالالاردىڭ عانا شەڭبەرىندە تۇيىقتالىپ قالماعانىن قالايمىن. ءبىز ءوسكەلەڭ ۇرپاقتىڭ تاربيەسىندەگى تۇيتكىلدەردى, ءبىلىم مەن مادەنيەتتىڭ ءوزارا بايلانىسىن قامتاماسىز ەتۋدى, حالىقتىڭ جالپى مادەنيەتىن قالىپتاستىرىپ, كوتەرۋدى تالقىلاۋدى دا ۇمىتپاۋىمىز كەرەك. ازىرگە قوعامداعى ازاماتتارىمىزدىڭ دەنى: «مەن ازاتپىن, ەركىنمىن, ەندەشە ءوزىمدى قالاي ۇستاعىم كەلسە, سولاي ۇستايمىن, نە ىستەگىم كەلەدى, سونى ىستەيمىن, ەشكىممەن دە ساناسۋعا مىندەتتى ەمەسپىن» دەگەن جۇگەنسىزدىككە جەتەلەيتىن جاعىمسىز قاعيدانى ۇستانىم ەتىپ العان. بۇل جاعدايدا پرەزيدەنتتىڭ جاستارعا قاراي مويىن بۇرىپ, ولاردىڭ ساياسي كوزقاراسى مەن ۇنامسىز ۇستانىمدارعا قاراي بولىنۋىنە جول بەرمەيتىنىنە ۋادە ەتكەنى كوڭىلدەگى كوپ كۇدىكتى سىلىپ تاستاعانداي بولدى.
مادەنيەت قايراتكەرلەرىن ايرىقشا قۋانتقان تاعى ءبىر ماسەلە تۋرالى ايتپاي كەتكەنىم بولماس: پرەزيدەنت «رۋحاني جاڭعىرۋ» باعدارلاماسىنا جاستاردى تاربيەلەۋدىڭ ءوزىندىك قۇرالى ىسپەتتى ءمان بەرىپ قاراپ وتىر. قازاقستاندا جۇزەگە اسىرىلىپ جاتقان بۇل باعدارلامانىڭ باعىتتارى كوپ جانە بۇگىنگى مادەني جەتىستىكتەرىمىز بەن ونىڭ حالىقارالىق مويىندالۋىنىڭ قوندىرعىسى بولىپ وتىرعان مادەني مۇرانى ۇلتتىڭ ءتىرى بايلىعى ەتىپ كورسەتەتىن ماقساتقا يە. جاستار ءوزىنىڭ تامىرى مەن تاريحى ءۇشىن ماقتانۋى كەرەك. سەبەبى ءبىز جاسامپاز يدەيالار مەن قۋاتتى ناق سول باستاۋ-بۇلاقتاردان الامىز.
ءوز تاڭداۋىمىزبەن قول جەتكىزگەن بۇگىنگى تاريحي وقيعا بۇكىل قازاقستاندىقتاردى ودان ءارى بىرىكتىرگەندەي بولىپ وتىر. ءبىز بارلىق جەردە ۇلىقتاۋ سالتاناتىن, پرەزيدەنتتىڭ ءۇندەۋىن تالقىلاپ, ەلىمىز ءۇشىن, ساياسي مادەنيەتتىڭ بيىك دەڭگەيى مەن بوستان جىلداردا بويىمىزعا سىڭگەن ازاماتتىق جاۋاپكەرشىلىك ءۇشىن ماقتاناتىنىمىزدى ءبىر ادامداي سەزىندىك. مىندەت بەلگىلەندى, ەندى تەك ماقساتقا جۇمىلىپ, العا باسۋ عانا ءبىزدى مەجەگە جەتكىزەدى.
نادەجدا گوروبەتس,
اباي اتىنداعى قازاق مەملەكەتتىك اكادەميالىق وپەرا جانە بالەت تەاترى ديرەكتورىنىڭ ورىنباسارى,
قازاقستاننىڭ ەڭبەك سىڭىرگەن قايراتكەرى