«استانا» مىقتىلارمەن وينايدى
ەڭ الدىمەن چەمپيوندار ليگاسىنىڭ جەرەبەسى تارتىلدى. 2013-2014 جىلعى ماۋسىمنان بەرى ەۋروكۋبوك باسەكەلەرىنە تۇراقتى تۇردە قاتىسىپ كەلە جاتقان ەلىمىزدىڭ بەس دۇركىن چەمپيونى بيىلعى ماۋسىمدا رۋمىنيانىڭ ءتورت دۇركىن جەڭىمپازى چفر (كلۋجا) كومانداسىمەن كەلەسى كەزەڭنىڭ جولداماسىن ساراپقا سالادى. جەرەبە قورىتىندىسىنان كەيىن وتاندىق فۋتبول ماماندارى «استاناعا» جەرەبە جولداس بولماعانىن ايتادى. قازاق فۋتبولىنىڭ ارداگەرى يۋسۋپ شاديەۆ «استانا» الداعى ۋاقىتتا دايىندىعىن كۇشەيتىپ, قۇرامىن تولىقتىرماسا, رۋمىنيا كومانداسىن جەڭۋ قيىنعا سوعادى دەيدى. «قازىر رۋمىنيا فۋتبولى قارقىندى دامىپ كەلەدى. سوندىقتان «استاناعا» وڭاي قارسىلاس جولىقتى دەپ ايتا المايمىن. ەلوردا كومانداسى ەل بىرىنشىلىگىنىڭ سوڭعى تۋرىندا «قايساردى» ءىرى ەسەپپەن جەڭگەنىمەن, سوڭعى كەزدە الا-قۇلا ونەر كورسەتىپ ءجۇر. دەگەنمەن, ەكى كوماندانىڭ دا مۇمكىندىكتەرىن 50/50 دەپ باعالايمىن. «استانا» ءۇشىن سىرت الاڭداعى ويىن قيىنعا سوعادى, سوندىقتان مىقتاپ دايىندالۋ كەرەك», دەيدى ول.
جەرەبەدەن كەيىن پىكىر ءبىلدىرگەن چفر كومانداسىنىڭ سپورتتىق ديرەكتورى بوگدان مارا جەرەبە جولداس بولماعانىن ايتادى. «ارينە ءبىز جەرەبەدە «استانا» مەن «تسرۆەنا زۆەزدادان» باسقا كوماندانى كۇتىپ ەدىك. بىراق قالاماعان كوماندامىزدىڭ بىرىنە تۇتىلدىق. جالپى, بيىلعى جەرەبە ءبىز ءۇشىن اۋىر باستالدى. ەندى ءبىزدى الدا وتە قيىن ەكى ماتچ كۇتىپ تۇر. سوندىقتان دايىندىعىمىزدى ەكى ەسە كۇشەيتۋىمىز كەرەك. «استانانىڭ» ەۋروپاعا جايىلعان داڭقىن بىلەمىز. ولاردى كەزىندە يسپانيانىڭ ازۋلى «اتلەتيكو» كومانداسى دا جەڭە الماعان. جالپى ايتقاندا, ءبىز ەۋروپانىڭ قازىرگى تاڭداعى وتە مىقتى ۇجىمىنا قارسىلاس بولدىق», دەيدى ب.مارا.
ال «استانا» كومانداسىنىڭ باس باپكەرى رومان گريگورچۋك مۇنداي دەڭگەيدەگى قارسىلاستى جەڭۋ ءۇشىن جاقسى دايىندىق پەن تولىققاندى قۇرام قاجەت ەكەنىن ايتادى. «مەن جەرەبە تارتۋ راسىمىنە ءاردايىم سابىرمەن قارايمىن. سوڭعى ۋاقىتتا مەنىڭ كومانداما ىقتيمال قارسىلاستاردىڭ ەڭ مىقتىلارى تاپ كەلۋدە. وسى جىلى دا سول ءۇردىس جالعاسىن تاپتى. بىزگە مۇنداي دەڭگەيدەگى قارسىلاستى جەڭۋ ءۇشىن جاقسى دايىندىق جانە تولىققاندى قۇرام قاجەت. دەگەنمەن, رۋمىندارعا قارسى كەزدەسۋگە دەيىن ءبىز چەمپيونات اياسىندا ماڭىزدى ءۇش ويىن وتكىزەمىز. ءدال قازىر بار كۇشتى سول ويىندارعا سالۋىمىز كەرەك», دەيدى باس باپكەر.
ەندى ەكى كوماندا تۋرالى از-كەم ستاتيستيكانى سويلەتسەك. چفر كومانداسى قازىرگى تاڭدا ۋەفا رەيتينگىندە 110-ورىنعا تابان تىرەگەن. گەرمانيانىڭ «transfermarkt.de» سايتىنىڭ اقپاراتى بويىنشا, كومانداداعى فۋتبولشىلاردىڭ جالپى قۇنى 25,45 ملن ەۋرو. قۇرامنىڭ ورتا جاسى – 27,9 جاس. چفر ءوز ەلىنىڭ جانە رۋمىنيا كۋبوگىنىڭ 4 دۇركىن چەمپيونى. سونداي-اق 3 رەت سۋپەركۋبوكتا توپ جارعان. ال «استانا» كومانداسى ۋەفا رەيتينگىندە 57-ورىندا تۇر. فۋتبولشىلاردىڭ جالپى قۇنى – 23,73 ملن ەۋرو. ورتا جاسى – 26,8 جاس. ەكى كلۋب اراسىنداعى العاشقى كەزدەسۋ 9 شىلدە كۇنى نۇر-سۇلتاندا, قارىمتا ماتچ ءبىر اپتادان سوڭ سىرت الاڭدا وتەدى.
قارسىلاستاردىڭ دەڭگەيى بىردەي
چەمپيوندار ليگاسى جەرەبەسىنىڭ ءىزىن الا ەۋروپا ليگاسىندا باق سىنايتىن كوماندالارىمىزدىڭ قارسىلاستارى انىقتالدى. قازاق فۋتبولىنىڭ ارداگەرى پاۆەل ەۆتەەۆتىڭ سوزىنشە, قازاقستاندىق كوماندالارعا جەرەبە جاقسى تۇسكەن. «مەنىڭشە, «استاناعا» قاراعاندا, ەۋروپا ليگاسىندا وينايتىن كوماندالارعا جەڭىل قارسىلاستار ءتۇستى. كەزدەسۋ ەكى ويىنعا سوزىلاتىن بولعان سوڭ, ەلىمىزدىڭ كوماندالارى ەش قيىندىقسىز كەلەسى كەزەڭگە وتەدى دەپ سەنەمىن. بارىندە كەلەسى كەزەڭگە وتۋگە مۇمكىندىك بار», دەيدى پ.ەۆتەەۆ.
ەۋروپا ليگاسىنداعى وتاندىق كوماندالاردىڭ قارسىلاستارىن تانىستىرىپ وتسەك.
«قايرات». ەۋروپا ليگاسىنىڭ العاشقى ىرىكتەۋ كەزەڭىندە الماتىنىڭ كومانداسى بوسنيالىق «شيروكي-بريەگ» كومانداسىمەن كۇش سىناسادى. جالپى, بوسنيالىق كلۋب قازاقستاندىق فۋتبول جانكۇيەرلەرىنە جاقسى تانىس. ەۋروپا ليگاسىنىڭ 2013-2014 جىلعى ماۋسىمىندا پاۆلوداردىڭ «ەرتىسىمەن» كەزدەسىپ, ەكى ويىن قورىتىندىسى بويىنشا 4:3 ەسەبىمەن باسىم تۇسكەن. اراعا ءۇش جىل سالىپ 2017-2018 جىلعى ماۋسىمنىڭ العاشقى ىرىكتەۋ كەزەڭىندە شىمكەنتتىڭ «ورداباسى» كومانداسىمەن جولى ءتۇيىستى. بۇل جولى دا ەكى ويىن قورىتىندىسى بويىنشا «شيروكي-بريەگتىڭ» مەرەيى ۇستەم بولعان. ەندى مىنە, بوسنيالىق كلۋب قازاقستاندىق كوماندامەن ۇشىنشە رەت كەزدەسكەلى تۇر. وسى ماتچتا «قايرات» «شيروكي-بريەگتىڭ» جەڭىستى جولىنا نۇكتە قويادى دەپ سەنەمىز. جالپى, «شيروكي-بريەگ» ەۋروكۋبوك دودالارىنا جىل سايىن قاتىسادى. بىراق قازىرگە دەيىنگى ەڭ ۇزدىك ناتيجەسى ءۇشىنشى ىرىكتەۋ كەزەڭىنە جولداما الۋى. 1948 جىلى قۇرىلعان كوماندا ەل چەمپيوناتىن نەبارى ەكى رەت ۇتقان.
«توبىل». قوستانايدىڭ كومانداسى ەۋروپا ليگاسىنىڭ العاشقى ىرىكتەۋ كەزەڭىندە ليۋكسەمبۋرگتىڭ «جەنەسس» كلۋبىمەن كەزدەسەدى. «جەنەسس» ءوز ەلىنىڭ 28 دۇركىن جەڭىمپازى. سوڭعى رەت 2010 جىلى توپ جارعان. ەۋرودودا ويىندارىنا وتكەن عاسىردىڭ 60-جىلدارىنان باستاپ قاتىسقانىمەن, ەكىنشى ىرىكتەۋ كەزەڭىنەن ارى اسىپ كورمەگەن. بىلايشا ايتقاندا, تومەن دەڭگەيدەگى كوماندا. جالپى, «توبىل» كەلەسى كەزەڭگە ەش قيىندىقسىز ءوتۋى كەرەك.
«ورداباسى». شىمكەنتتىك كوماندا ەۋروپا ليگاسىنا بيىل بەسىنشى رەت قاتىسىپ وتىر. بۇعان دەيىن سەربيا, نورۆەگيا, يزرايل جانە بوسنيا جانە گەرتسەگوۆينا ەلىنىڭ كوماندالارىمەن ويناسا, بيىل گرۋزيانىڭ «تورپەدو» كومانداسىمەن كەزدەسەدى. جالپى, «تورپەدو» كلۋبى دا قازاقستاندىق كوماندالارعا بوتەن ەمەس. ەۋروپا ليگاسىنىڭ 2012-2013 جىلعى ماۋسىمىندا «اقتوبە» كومانداسىمەن كەزدەسىپ, ەكى ويىن قورىتىندىسى بويىنشا 1:2 ەسەبىمەن جەڭىلىپ قالعان. ءوز ەلىنىڭ ءتورت دۇركىن جەڭىمپازى سانالاتىن «تورپەدو» بىلتىر ەۋروپا ليگاسىنىڭ پلەي-وفف كەزەڭىنە دەيىن جەتكەن. بۇل كوماندا «ورداباسى» ءۇشىن اسا قيىن قارسىلاس ەمەس, دەگەنمەن فۋتبول بولجاۋعا كەلمەيتىن ويىن ەكەنىن ەسكەرۋ كەرەك.
قورىتا ايتقاندا, الداعى كەزدەسۋلەردىڭ قانداي ناتيجەمەن اياقتالاتىنىن بولجام ەمەس, ۋاقىت كورسەتەدى. دەگەنمەن, «استانا» كلۋبىنان باسقا ەۋروماۋسىمعا قاتىسقالى تۇرعان ءۇش كلۋبىمىزدىڭ قارسىلاستارى وزدەرىمەن دەڭگەيلەس كلۋبتار. ەۋروپا جاسىل الاڭدارىندا ەل نامىسىن قورعايتىن كوماندالارىمىزعا جەڭىس تىلەپ, ساتتىلىك سەرىك بولسىن دەيمىز.