سالا باسشىسى ەكسپورتتىق الەۋەتتى ارتتىرۋ باستى نازاردا ەكەندىگىن اتاپ, وسى باعىتتاعى كورسەتكىشتەردى جىپكە ءتىزدى. اتاپ ايتقاندا, ارپا ەكسپورتى 2 ەسەگە, راپس مايى مەن قىزاناق 1,4 ەسەگە جانە سويا 2 ەسەگە وسكەن. 11,7 ملن توننا استىق ەكسپورتتالدى. بۇل 2017 جىلعى دەڭگەيدەن 33%-عا كوپ.
مينەرالدى تىڭايتقىشتى قولدانۋ قاجەتتىلىگى 18%-عا جەتىپتى. بىلتىر بۇل كورسەتكىش 10-14%-دان اسپايتىن. وتكەن جىلى تىڭايتقىشتاردى سۋبسيديالاۋ پروتسەسى تولىقتاي اۆتوماتتاندىرىلدى, سونداي-اق بولىنەتىن قاراجات كولەمى 24%-عا كوبەيگەن.
بۇعان قوسا مينيستر ءسۇتتى مال شارۋاشىلىعىن دامىتۋ ءۇشىن 2018 جىلى 25 تاۋارلى-ءسۇت فەرماسى پايدالانۋعا بەرىلگەنىن باياندادى. 6 مىڭ باستان استام مال باعىلاتىن بۇل فەرمالاردىڭ 7-ەۋى ونەركاسىپتىك, 18-ءى وتباسىلىق فەرمالار. تەك ۇيىمداستىرىلعان شارۋاشىلىقتاردىڭ وزىندە 1, 5 ملن توننا ءسۇت وندىرىلگەن. بۇل 2017 جىلمەن سالىستىرعاندا 7,6%-عا ارتىق دەيدى اۋىل شارۋاشىلىعى ءمينيسترى. سالىستىرمالى تۇردە الساق, 2015 جىلى ول 900 مىڭ توننانىڭ مولشەرىندە بولعان.
– قۇس شارۋاشىلىعىندا 5,6 ملرد دانا تاۋىق جۇمىرتقاسى ءوندىرىلىپ, 2017 جىلداعى دەڭگەيدەن 10%-عا جوعارىلادى. العاش رەت 671 ملن دانا جۇمىرتقا ەكسپورتتالدى. اقمولا وبلىسىندا ەڭ ۇلكەن برويلەرلىك قۇس فابريكاسى ىسكە قوسىلدى. بىلتىر مال شارۋاشىلىعى ونىمدەرىنىڭ يندەكسى 2,0 ترلن تەڭگەگە ءوسىپ, 2017 جىلدىڭ كورسەتكىشىنەن 3,9%-عا ارتتى. مەملەكەتتىك باعدارلامانىڭ نەگىزگى مىندەتىنىڭ ءبىرى – وتكىزۋ نارىقتارىنا جول اشۋ ءارى ەكسپورتتى دامىتۋ. بۇگىنگى كۇننىڭ وزىندە 13 تاۋار توبى (بالىق ونىمدەرى, اسىل تۇقىمدى جىلقى, مۇزداتىلعان قوي ەتى, بال, بيداي, بيداي كەبەگى, سويا بۇرشاقتارى, سويىس جىلقىلارى, راپس كۇنجاراسى, سيىر ەتى, ۇن, وسىمدىك مايى, ارپا, جۇگەرى) بويىنشا قىتاي نارىعى اشىق. يرانمەن تىرىدەي ۇساق مال, مۇزداتىلعان جانە سالقىنداتىلعان قوي جانە سيىر ەتىمەن قاتار تاعامدىق جۇمىرتقا جەتكىزۋگە ارنالعان كەلىسىم بار. سول سەكىلدى ساۋد ارابياسى كورولدىگىمەن مال سويۋ جانە ءوسىرۋ ءۇشىن وتاندىق ءىرى قارا مەن ۇساق مالدى ەكسپورتتاۋعا ارنالعان ۆەتەرينارلىق سەرتيفيكاتقا قول جەتكىزدىك. ناتيجەسىندە اگروونەركاسىپتىك كەشەن ونىمدەرىن قىتايعا شىعارۋ 30,4%-عا (بارلىق ەكسپورت – 258,2 ملن اقش دوللارى), پارسى شىعاناعى ەلدەرىنە ەكسپورتتاۋ (قاتار, كۋۆەيت, ءباا, ساك, ومان, باحرەين) 4,1 ەسەگە, يرانعا – 2,1% (328,9 ملن اقش دوللارى), ەۋرووداققا ساۋدالاۋ 14,6%-عا (303,6 ملن اقش دوللارى) ارتتى. جالپى, اگروونەركاسىپتىك كەشەن ونىمدەرىن سىرتقا شىعارۋ ديناميكاسى 24,5%-عا ۇلعايىپ, وڭدەلگەن ءونىم ەكسپورتى 3,5%-عا كوبەيدى, – دەدى سپيكەر.
شەتەلدىك نارىققا شىعۋ ماقساتىندا يزرايل, تۇركيا, كۋۆەيت, ومان, جاپونيا جانە وڭتۇستىك كورەيا سىندى مەملەكەتتەردەن باسقا ەۋرووداق ەلدەرىمەن دە كەلىسسوز جۇرگىزۋ جوسپارلانۋدا. وسى ورايدا قىتاي تاراپىمەن 2018 جىلى ەكسپورتقا باعدارلانعان قازاقستاندىق اۋىل شارۋاشىلىعى ونىمدەرىنە قويىلاتىن يمپورتتىق تالاپتاردى كەلىسۋ جونىندەگى جول كارتاسىنا قول قويىلدى. بىلتىرعى جىلدىڭ جالپى كەستەسىنە سايكەس اۋىل شارۋاشىلىعى ونىمدەرىنىڭ كولەمى 3,5%-عا جانە تاماق ءونىمدەرىنىڭ مولشەرى 1,6%-عا جوعارىلاعانىنان حابار ەتتى سالا مينيسترى.
جاقسىلىق مۇراتقالي,
«Egemen Qazaqstan»