مادەني شارا ەكى كەزەڭ بويىنشا ۇيىمداستىرىلدى. اۋەلگى كەزەڭدە ەلىمىزدىڭ ءتورت قۇبىلاسىنان كەلگەن تۋىندىگەرلەر تاراز قالاسىنىڭ تاريحي-مادەني ورىندارىن ارالاپ, ەكسكۋرسيا جاسادى. ەكسكۋرسيا بارىسىندا سۋرەتشىلەر شاھار تۋرالى شىعارمالارىنا ارقاۋ بولاتىن ورىنداردى تاڭدادى. «فەستيۆالعا قاتىسۋشىلار اۋليەاتا جەرىندەگى قاراحان بابا, ايشا ءبيبى, اقىرتاس قالاشىعى, كونە تاراز تاريحي-مادەني ورنى جانە «جەڭىس» ساياباعى سياقتى كورنەكتى ورىنداردى تاڭدادى. سونىمەن قاتار قىلقالام شەبەرلەرى وبلىس اۋداندارىنا دا ساپار شەگىپ, وزدەرىنە تيەسىلى اۋماقتاردىڭ كەلبەتىن كەسكىندەۋدە», دەيدى وبلىستىق مادەنيەت, ارحيۆتەر جانە قۇجاتتاما باسقارماسىنا قاراستى حالىق شىعارماشىلىعى ورتالىعىنىڭ ديرەكتورى عاني سادىرباەۆ.
ەلىمىزدىڭ ءار قيىرىنان كەلگەن سۋرەتشىلەر تارازدىڭ تابيعاتى مەن تاريحي-مادەني ورىندارى بەينەلەنگەن قىرىق كارتينا سالدى. بۇل تۋىندىلاردى ولار وزدەرىنىڭ شەبەرلىگى مەن سۋرەتشىلىك قيالى ارقىلى ءوربىتىپ, كونە شاھاردىڭ كوركەم الەمىن جاسادى. ال فەستيۆالدىڭ ەكىنشى كەزەڭى اياسىندا تاراز قالاسىنداعى ب.مومىش ۇلى اتىنداعى «جەڭىس» ساياباعىندا اشىق اسپان استىندا كورمە ۇيىمداستىرىلدى. اتالعان كورمەگە قاتىسۋشى سۋرەتشىلەردىڭ شىعارمالارى مەن اۋليەاتا وڭىرىنە بەلگىلى قولونەر شەبەرلەرىنىڭ جانە فوتوسۋرەتشىلەردىڭ دە تۋىندىلارى قويىلدى.
جامبىل وبلىسى