جيىندا ءسوز العان ءبىلىم جانە عىلىم مينيسترلىگىندەگى مەكتەپكە دەيىنگى جانە ورتا ءبىلىم بەرۋ دەپارتامەنتى ديرەكتورىنىڭ ورىنباسارى ساۋلە نۇراحانقىزى اپروباتسيا وبەكتىسىنە اينالعان بالاباقشاداعى ناتجەلى ەڭبەك – بىرلەسكەن جۇمىستىڭ جەمىسى ەكەنىن جەتكىزدى. ونىڭ ايتۋىنشا, بۇل – ءبارىنىڭ باسى عانا, مينيسترلىك پەن مەكتەپكە دەيىنگى ۇيىم اراسىنداعى ۇجىمدىق جۇمىس جالعاسا بەرەدى. ويتكەنى وتاندىق مەكتەپكە دەيىنگى ءبىلىم بەرۋدىڭ ساپاسىن ارتتىرۋ – ورتاق ماقسات.
«قارلىعاش» بالاباقشاسىنىڭ ديرەكتورى گۇلنار ىسقاق وسى سەمينار 10 جىلدان بەرى جۇيەلى جۇمىس جۇرگىزىپ كەلە جاتقان مەكتەپكە دەيىنگى ۇيىمنىڭ تاجىريبەسىن ءبولىسۋ ماقساتىندا ۇيىمداستىرىلعانىن ايتادى. «ال ءار وبلىستىڭ ماماندارىن بالاباقشامىزعا وقىتۋ تەحنولوگيالارىمىزدى تانىستىرۋ ءۇشىن عانا ەمەس, ءىس جۇزىندە قالاي قولداناتىنىن كورسەتۋ ءۇشىن جينادىق. ءبىز, ءبىزدىڭ پەداگوگتار كوپتەگەن شەتەلدەردە بىلىكتىلىگىن ارتتىرىپ كەلگەن. حالىقارالىق تاجىريبەدەن تۇيگەن ويلارىن, ۇيرەنگەن ءتۇرلى تەحنولوگيالارىن ءوزىمىزدىڭ ۇلتتىق ەرەكشەلىگىمىزگە قاراي ىڭعايلاپ, ەنگىزدىك», دەيدى گ.ىسقاق. ونىڭ ايتۋىنشا, بالاباقشا ماماندارى يتاليا, فينليانديا, رەسەي, سينگاپۋر, ەستونيا ەلدەرىنىڭ وقىتۋ تاجىريبەلەرىن زەردەلەپ, ءوز باعدارلاماسىنا قوسقان.
سەمينار بارىسىندا قاتىسۋشىلار ارنايى ازىرلەنگەن 5 توپقا ءبولىنۋ ارقىلى ءار تاجىريبە الاڭىندا بولىپ, ءادىس-تاسىلدەرمەن تانىسىپ شىقتى. الماتى قالاسىنداعى №51 بوبەكجاي-بالاباقشانىڭ مەڭگەرۋشىسى فاريدا وماربەك سەميناردىڭ وزىنە جاڭالىق بولعان تۇستارى كوپ ەكەنىن تىلگە تيەك ەتتى. «وسى سەميناردان كەيىن قازىرگى قوللانىستا جۇرگەن وقىتۋ تەحنولوگيالارىنىڭ بولاشاق ۇرپاققا ەسكى ەكەنىن ءتۇسىندىم. ءتۇرلى تەحنولوگيالاردى تاتپىشتەپ ءتۇسىندىردى. سونىڭ ىشىندە سينگاپۋردىڭ تاجىريبەسىن ءوز بالاباقشاما ەنگىزۋدى قولعا الامىن», دەيدى ف.وماربەك. قاتىسۋشىنىڭ ايتۋىنشا, زامان العا جىلجىپ, دامىعان سايىن باسەكەگە قابىلەتتى بالالاردى دايىنداۋ كەرەك. بۇل ماقساتقا جەتۋ ءۇشىن پەداگوگ يننوۆاتسيالىق ادىستەردى ءاردايىم جاڭعىرتىپ وتىرعان ابزال.