جۇما, 12 ءساۋىر 2013 1:37
«جۇرگەن اياققا جورگەم ىلىگەدى» دەيدى, ال جۋرناليست ءۇشىن وزگە ەلدەرگە ساپارلاپ بارۋ, كوزىمەن كورگەندەرىن كوڭىلدەرىنە توقىپ, سارالاپ, سالىستىرا ءجۇرۋ ناعىز ولجا. وسى جولى قازاقستان سىرتقى ىستەر ءمينيسترى ەرلان ىدىرىسوۆتىڭ وزبەكستانعا جۇمىس ساپارى مەن تاجىكستانعا رەسمي ساپارىنا اقپاراتتىق قولداۋ كورسەتۋ ءۇشىن جول تارتۋدىڭ ءساتى كەلگەن-ءتىن.
جۇما, 12 ءساۋىر 2013 1:37
«جۇرگەن اياققا جورگەم ىلىگەدى» دەيدى, ال جۋرناليست ءۇشىن وزگە ەلدەرگە ساپارلاپ بارۋ, كوزىمەن كورگەندەرىن كوڭىلدەرىنە توقىپ, سارالاپ, سالىستىرا ءجۇرۋ ناعىز ولجا. وسى جولى قازاقستان سىرتقى ىستەر ءمينيسترى ەرلان ىدىرىسوۆتىڭ وزبەكستانعا جۇمىس ساپارى مەن تاجىكستانعا رەسمي ساپارىنا اقپاراتتىق قولداۋ كورسەتۋ ءۇشىن جول تارتۋدىڭ ءساتى كەلگەن-ءتىن.
العاشقى اتباسىن تىرەگەن جۇرت – حالقىمىزبەن قاشاننان «بازارى دا ءبىر, مازارى دا ءبىر» وزبەك اعايىندارىمىزدىڭ استاناسى تاشكەنت قالاسى. تاشكەنتتىڭ ارعىدان بەرگىگە جەتكەن تاريحى تۋىستاس ەكى حالىققا ورتاق. وزبەك توپىراعىندا تولە, ايتەكە بي, ءجالاڭتوس ءباھادۇر سىندى ءبىرى – تاشكەنتتى, ەكىنشىسى – سامارقاندتى بيلەگەن بابالارىمىز ماڭگىلىك تىنىستاپ جاتىر. سوندىقتان سامارقاندقا بارعان قازاق بالاسى سەيىتقۇل قورىمىنداعى ايتەكە بي باسىنا ءتاۋ ەتسە, تاشكەنتكە كەلگەن قازاق تولە بي بابا باسىنا سوعىپ, قۇرمەت كورسەتۋدى پارىزى سانايدى.
تولە بي قابىرى شايقانتاۋىر زيراتىندا ۇلى موعول مەملەكەتىنىڭ نەگىزىن سالىپ, ءۇندىستاندى بيلەگەن بابىردىڭ ناعاشى اتاسى ءجۇنىس حان مازارىنىڭ قاسىندا ەكەن. قازاقستان سىرتقى ىستەر ءمينيسترى ەرلان ىدىرىسوۆ, ەلىمىزدىڭ وزبەكستانداعى توتەنشە جانە وكىلەتتى ەلشىسى ءبورىباي جەكسەمبين بابا باسىنا ارنايى باردى. وزبەك اعايىندار شايقانتاۋىر زيراتىنداعى كەشەندى قازىر يسلام ينستيتۋتىنا اينالدىرىپ, وندا ءدىنتانۋشى-تەولوگتار دايارلاۋمەن اينالىسادى ەكەن. تولە بابا كەسەنەسىنىڭ ىشىنە دە ورىندىقتار قويىلىپ, ساباق وتكىزىلەتىندەي جاعداي جاسالىپتى. اۋماعى ءبىراز جەردى الىپ جاتقان, بىرنەشە مازاردان تۇراتىن كەشەندى ارالاپ كورىپ, ءبيدىڭ باسىندا قۇران وقىلىپ بەت تە سيپالدى.
تولە بي كەسەنەسىنىڭ ۇلگىسى ماڭايىنداعى قۇرىلىستاردان ەرەكشە كورىنەدى. سەبەبى, ول شاتىرلى جانە شوشاق توبەلى ساۋلەت ستيلىمەن, ياعني دالا تۇرعىندارىنا ءتان ەرەكشەلىگىمەن مەنمۇندالايدى. وزبەكتەر تولە ءبيدى «قارلىعاش اۋليە» دەپ قادىرلەيدى ەكەن, ال سول جەردە جۇرگەن ينستيتۋت قىزمەتكەرلەرى تاشكەنتكە قازاقستاننان كەلگەن ادامداردىڭ وسى جەرگە ارنايى سوعىپ, زيارات ەتىپ كەتەتىنىن ايتتى. ەلدىڭ تۇتاستىعىن ويلاپ, ادىلدىگىمەن قارا قىلدى قاق جارعان بي اتانىڭ ارتىندا قالعان سوزدەرى عانا ەمەس, زيراتى دا ۇرپاقتارىن جاقسىلىققا باستاپ جاتقانداي كورىندى.
تاشكەنتكە جولى تۇسكەن ءاربىر ادام ءوزىنىڭ قاي ەلدىڭ جەرىنە تابانى تيگەنىن بىردەن سەزىنەدى. مۇنداعى قارىم-قاتىناس ءتىلى – وزبەك ءتىلى. سلاۆياندارىڭ دا, كارىستەرىڭ دە, ارمياندارىڭ مەن جەبىرەيلەرىڭنىڭ دە وزبەك ءتىلىن بىلمەيتىنى جوق. كيريلليتسانى ىسىرىپ, لاتىن ءارپىن ءوز تىلدەرىندە سويلەتكەن وزبەك اعايىنداردىڭ ەندى ءبىر قۇرمەتتەيتىن ورنى «حاست يمام» ورتالىعى ەكەن. ۇلكەن كەشەندەگى مەشىت ەڭسەلى كورىندى. قاقپاسىنان اۋلاسىنا كىرگەنىڭىزدە ويۋلانعان بيىك-بيىك كولوننالارعا بىردەن كوز تۇسەدى. ەرتىپ جۇرگەن ءدىن قىزمەتكەرى بۇلاردىڭ بارلىعى ساندال اعاشتارى ەكەنىن, ويۋلاردى شەبەرلەردىڭ قولدان ويعاندىعىن, ال ونىڭ بەتىنە ەش بوياۋ تۇسپەي تابيعي تۇرىندە تۇرعاندىعىن ايتتى. نەسىن ايتاسىز, ساندال اعاشى بەتىندەگى ورنەكتەردى ادام قولىنان شىقتى دەۋدىڭ وزىنە اۋىز بارمايتىنداي كوركەم كەستەنىڭ جۇلگەلەرى وتە نازىك, ويۋدان ورىلگەن اسەم اۋەن دەرسىز, كەرەمەت اسەرگە بولەيدى.
«حاست يمام» كەشەنى دە بىرنەشە عيماراتتان تۇرادى ەكەن. رەسپۋبليكالىق ءدىني باسقارماعا قارايتىن وسى كەشەندە يمامدار دايارلايتىن جوو جانە مەدرەسە, يسلام مۋزەيى, ءدىني باسقارمانىڭ كەڭسەسى مەن كەڭەس زامانىندا ءدىني باسقارمانى باسقارىپ, دۇنيەدەن وزعان يمامداردىڭ مازارلارى دا بار ەكەن. كەشەندى ارالاپ جۇرگەن حالىق تا كوپ, سوعان قاراعاندا, بۇل تۋريستەر كەلىپ ارنايى تانىساتىن تاشكەنتتەگى كەلىستى ورىننىڭ ءبىرى مە دەپ ويلادىق. مۇنداعى ەڭ ءبىر كەلۋشىلەردى قىزىقتىراتىن زات – ءۇشىنشى حاليفا وسماننىڭ ءوزى جازدىرعان قاسيەتتى قۇران كىتابىنىڭ ەڭ كونە دەلىنگەن نۇسقاسى, حاليفانىڭ توگىلگەن قانى جۇققان دەيتىن وسى كيەلى دۇنيە «حاست يمام» كەشەنىنىڭ ورتاسىنداعى جەكە مۇراجايدا ساقتاۋلى تۇر. بۇل نۇسقانى «وسماندىق قۇران» دەپ اتايدى ەكەن. قاعاز ەمەس, تەرىگە جازىلعان بۇل قۇراندى كەزىندە ءامىر تەمىر باسرا قالاسىنان الدىرتىپ, سامارقاندتا ساقتاپتى. مۋزەيگە قۇراننىڭ باسقا دا ەجەلگى كوشىرمەلەرى مەن ءار تىلدەگى اۋدارمالارى قويىلىپتى.
«حاست يمام» كەشەنىنىڭ ىشكى باي مازمۇنىنا ساي, سىرتقى اسەم كوركىنە مەشىت اينالاسىنداعى قۇستار دا ەرەكشە كورىك بەرەدى. تىرنالار ادامداردان قايمىعاتىن ەمەس, قايتا قاستارىنا بارىپ سۋرەتكە تۇسكەندەرى ۇناعانداي باستارىن بۇرىپ تۇرىپ, وبەكتيۆكە قارايدى.
تاشكەنتتەگى ءبىز بارعان ەندىگى نىسان – جاڭادان سالىنىپ جاتقان قازاقستان ەلشىلىگىنىڭ عيماراتى. ەڭسەلى, الىستان-اق اباتتانىپ كورىنەتىن ەلشىلىك الدىنا بولاشاقتا اباي ەسكەرتكىشى تۇراتىن تاستۇعىر دا ورناتىلىپ قويىلىپتى. ادەتتەگىدەي, مينيستردەن ەرتەرەك بارىپ, ماڭايدى شولىپ جۇرگەنىمىزدە قاسىمىزعا ەكى وزبەك ايەلى كەلدى. – ءبىز مىنا ەلشىلىك قاسىنداعى ۇيدە تۇرامىز, سىزدەرگە ەدەن جۋعا الاسىزدار ما؟ – دەيدى. جالپى, وزبەكستان حالقىنىڭ بارلىعىنا بىردەي ەلدەن جۇمىس تابىلا بەرمەيدى. سوندىقتان ءار ۇيدەن 1-2 ادام جۇمىس ىزدەپ شەكارا اسقاننىڭ وزىندە تۇتاستاي ميگرانتتار قولى قالىپتاسادى. ناپاقاسىن الىستان تەرگەن, وزگە ەلدەر ءۇشىن ارزان جۇمىس قولىنا اينالعان وزاعالارىمىز كەشكەن كۇي وسىنداي. ءبىزدىڭ ەلشىلىك عيماراتىن سالۋشى كومپانيا قازاقستاندىق بولعانىمەن, قۇرىلىسشىلارى وزبەكتەر ەكەن.
* * *
«بىرەۋگە قاراپ, پىكىر ەت, بىرەۋگە قاراپ, شۇكىر ەت» نەمەسە «التاۋ الا بولسا اۋىزداعى كەتەدى» دەگەن سوزدەر تاجىكستانعا بارعاندا ويعا ەرىكسىز ورالادى. الاۋىزدىقتىڭ جەتكەن شەگى – ازامات سوعىسى بولىپ, ابدەن تيتىقتاپ, تۇرالاعان تاجىك جۇرتىنىڭ بۇگىنگى تىرشىلىگىن ايدارىنان جەل ەسىپ تۇر دەپ ايتا المايسىڭ. ارينە, حالقىمەن تىلدەسسەڭ, بۇرىنعىعا قاراعاندا شۇكىرشىلىك دەيدى, راس شىعار, بىراق, سىرتتان قاراعاندا كوزگە ۇراتىن تارشىلىق قاي سالادان دا كورىنەدى. باسقانى ايتپاعاندا, دۋشانبەدەگى كوپ قاباتتى تۇرعىن ۇيلەردىڭ ەسىكتەرىنىڭ الدىنا ورناتىلعان تاندىرلاردىڭ ءوزى ءبىراز سىردى اڭعارتقانداي. ەلدە تاۋار قىمبات, ال جالاقى تومەن, جوعارىسى 80-100 دوللار شاماسىندا. ماسەلەن, تەتراپاكەتتەردەگى 1 ليتر ءسۇت ءبىزدىڭ باعاممەن 350 تەڭگە شاماسىندا. ناندى دۇكەننەن ساتىپ الۋدى وتباسى بيۋدجەتى كوتەرمەيتىن بولعاندىقتان, تۇرعىندار ۇن ساتىپ الىپ, ونى دالاداعى پەشكە كەزەككە تۇرىپ, ءپىسىرىپ الادى ەكەن. تاجىكستاندا ءبىزدىڭ ۇنىمىزدى قاتتى قادىرلەيدى. نانىمىزدىڭ ساپاسىن جاقسارتۋ ءۇشىن ءوز ۇنىمىزدى سىزدەردىڭ ۇندارىڭىزبەن ارالاستىرامىز, دەيدى بىزبەن اڭگىمەلەسكەن تاجىك قىزدارى. ەندى ءبىر تاجىك ازاماتى مەن بىلتىر قوستانايعا بارىپ استىق ساتىپ الۋ جونىندە كەلىسىم جاساپ, ەكى ۆاگون بيداي اكەلدىم. جولاي استاناعا سوقتىم, قالالارىڭىز كەرەمەت ۇنادى, قانداي ادەمى ەتىپ سالعانسىزدار, دەيدى. تاجىكتەردىڭ قازاقستان جەتىستىكتەرىنە قىزىعا قاراعاندارىنىڭ كۋاسى بولىپ, ءوسىپ قالدىق.
دۋشانبە حالقى قىستاي توڭىپ شىعادى. جىلۋ جۇيەسى تەك قالانىڭ ءدال ورتاسىنداعى شاعىن اۋماقتا عانا ىستەيدى. ال قالعان ءبولىگىندە جىلۋ, ىستىق سۋ جوق. بۇگىنگى تاجىكستانداعى ەڭ ءبىر وزەكتى ماسەلە – ەنەرگەتيكالىق پروبلەما. دۋشانبەدە جارىق تۇراقتى, ال وزگە وڭىرلەردە ول بەلگىلى ءبىر ساعاتتاردا عانا بەرىلەتىن كورىنەدى. تىپتەن, كۇنىنە ەكى-اق ساعاتقا عانا توققا قوسىلاتىن ەلدى مەكەندەر بار دەيدى. ال وسى تىعىرىقتان شىعۋدىڭ جولى ۆاحش وزەنىندە 335 مەتر بيىكتىكتەگى (پلانەتاداعى ەڭ بيىك) سۋ بوگەتى–روگۋن سۋ ەلەكتر ستانساسىن (سەس) سالۋ دەيدى تاجىك حالقى دا, ۇكىمەتى دە. الايدا, ونى سالۋعا ەلدىڭ ەڭ جاقىن كورشىسى وزبەكتەر قارسى. ولار ماقتا وسىرۋگە قاجەتتى سۋ بوگەت سالىنعان كۇندە بىزگە جەتپەيدى ءارى سەيسميكالىق قاۋپى زور ايماقتا ونداي قۇرىلىس سالۋ اقىلعا سىيمايدى دەگەن ءۋاجدى العا تارتادى. وسىلايشا, بۇل جەردە ترانسشەكارالىق سۋ ماسەلەسى العا شىقتى.
دۋشانبەدە وتكەن ازياداعى ىنتىماقتاستىق جونىندەگى ۇنقاتىسۋعا مۇشە مەملەكەتتەردىڭ 11-ءشى سىرتقى ىستەر مينيسترلەرى كەڭەسىندە دە كوتەرىلگەن ماسەلەنىڭ ءبىرى وسى ترانسشەكارالىق وزەندەر جايى بولدى. ەرلان ىدىرىسوۆ ءوز سوزىندە ترانسشەكارالىق سۋ كوزدەرىن پايدالانۋدا ونىڭ باستاۋىندا, ورتا اعىسىندا نەمەسە اياعىندا تۇرعان مەملەكەتتەردىڭ قۇقىقتارىنىڭ بىردەي دارەجەدە بولۋىنىڭ ماڭىزدىلىعىن باسا ايتقان. كەڭەستەگى ءۇزىلىستى پايدالانىپ, مينيسترگە وسى بىرنەشە مەملەكەتتىڭ شەكاراسىن قيىپ وتەتىن وزەندەر ماسەلەلەرىنىڭ شەشىلۋ جولدارى قالاي دەگەن ساۋال تاستادىق.
– وزەننىڭ باسىندا تۇرعان ەلدەر تومەنگى اعىستاعىلاردىڭ ەكونوميكالىق تۇرعىداعى قاجەتتىلىكتەرىن ەستەن شىعارماۋى, ال تومەندەگى ەلدەر دە باستاۋدا تۇرعانداردىڭ دۇرىس باعىتتا دامۋىنا جول اشاتىن جوبالارىنا كەدەرگى كەلتىرمەيتىندەي ساياسات ۇستانعانى ءجون. بۇل ورايدا ارنايى حالىقارالىق كونۆەنتسيا بار, ماسەلەن حەلسينكيدە قابىلدانعان كونۆەنتسيادا ونىڭ قاعيداتتارى كورسەتىلگەن. سوندىقتان, وزەن بويىنداعى ەلدەر دوڭگەلەك ۇستەل باسىنا وتىرىپ, قاي تاراپقا دا زيانى تيمەيتىن, قايتا پايدا اكەلەتىن جولدارىن قاراستىرعان كەلىسىمگە كەلۋى ماڭىزدى. جانە ول رەسۋرستاردىڭ بەي-بەرەكەت پايدالانىلماي, ەكولوگيالىق قاعيداتتاردى قاتاڭ ساقتاۋىن, قاي ەلدى دە ەكونوميكالىق تۇرعىدان قىسپاققا تۇسىرمەۋدى باسشىلىققا الۋ قاجەت. ءبىز ونداي تەتىكتەردى قۇرۋدىڭ جولدارىن قاراستىرۋدامىز. ايتالىق, ارال بويىنشا ونى قورعاۋدىڭ حالىقارالىق قورى قۇرىلدى, ونىڭ توراعالىعىن بىلتىر ءبىز اتقارساق, ەندى ول تىزگىندى وزبەكستان ۇستايدى. جالپى, سۋ پروبلەمالارىن قاراستىرۋدا بىزدە ەكىجاقتى تەتىكتەر دە قۇرىلعان. ترانسشەكارالىق سۋلار جونىندەگى ماسەلە تەك ورتالىق ازيا ەلدەرىمەن عانا ەمەس, رەسەي, قىتاي مەملەكەتتەرىمەن دە بار. ءبىزدىڭ ۇستانىمىمىز ماسەلەنى شەشۋدە قالىپتى قۇقىقتىق نەگىز بولۋى ءتيىس. ول ءۇشىن الدىمەن قاي جاقتىڭ دا ۇنقاتىسۋعا ۇمتىلىسى ماڭىزدى, دەگەن سىرتقى ساياسات ۆەدومستۆوسىنىڭ باسشىسى.
قالاي بولعاندا دا بوگەت سالىنىپ, روگۋن گەس-ءىنىڭ ىسكە قوسىلۋى گەوساياسي ۇلكەن ءماسەلەگە اينالىپ كەتكەن. بيىلعى جىل ءتاجىك ۇكىمەتى روگۋن گەس-ءىنىڭ قۇرىلىسىنا قوسىمشا 1 ملرد. دوللار نەمەسە 210 ملن. سوماني (تاجىكتىڭ ۇلتتىق ۆاليۋتاسى) ءبولىپ وتىر. ونىڭ سىرتىندا 2009 جىلى حالىقتان «ەرىكتى» تۇردە جينالعان (1 مىڭ دوللاردان) 140 ملن. ەۋرو بار تاجىكستان ۇكىمەتى ەنەرگەتيكالىق تارشىلىقتان قۇتقاراتىن روگۋن گەس-ءىن سالۋعا كىرىسپەك. ءبىر ايتا كەتەرلىگى, تاجىكستاننىڭ بولاشاقتاعى ەڭ باستى كوزىرى – سۋ رەسۋرسى. ەگەر جەر بەتىندەگى حالىق سانىنىڭ ءوسۋى مەن ەنەرگيا كوزدەرىنە, سۋعا دەگەن سۇرانىستىڭ ارتۋىن ەسەپكە الساق, بولاشاقتا تاجىكستاننىڭ الەمدەگى دە, ايماقتاعى دا ءرولى بيىكتەي ءتۇسپەك. ويتكەنى, بۇل ەل سۋ قورىنا باي الەمدەگى سەگىزدىككە ەنەدى. الايدا, قازىرگى كۇنى تاجىكستان سول الەۋەتىنىڭ شامامەن 5 پايىزىن عانا پايدالانىپ وتىر. روگۋن گەس-ءى سالىنسا, تاجىكستان ەنەرگەتيكالىق قۇرساۋدان شىعىپ قانا قويماي, اۋعانستان, پاكستان سىندى جاپسارلاس جاتقان ەلدەرگە ءونىمىن ساتىپ تا پايداعا شىعار ەدى. ال ازىرگە روگۋن گەس-ءى وزبەكستانعا كوزگە شىققان سۇيەلدەي كورىنۋدە.
جالپى, تاجىكستانداعى قازىرگى تىنىشتىقتىڭ نەگىزى ەلدەن تىسقارى جۇمىس ىزدەپ كەتكەن تاجىكتەردەن تۇسەتىن ترانسفەرتكە تىكەلەي بايلانىستى. ەلدىڭ 8 ملن. حالقى بار دەپ ەسەپتەلسە, ونىڭ 2 ملن.-عا جۋىعى ەڭبەك ميگرانتتارى. ىشكى جالپى ءونىمنىڭ 48 پايىزى وسى گاستاربايتەرلەر اۋدارعان قاراجاتتان تۇسۋدە.
ءيا, تاجىكتەر باسىنداعى پروبلەما شاش ەتەكتەن. الەۋمەتتىك قيىندىقتاردىڭ ءبىر پاراسى جوعارىدا ايتىلعان ەڭبەك ميگرانتتارىنا قاتىستى. جۇمىس ىزدەپ ايلاپ-جىلداپ شەتتە تۇرعان ەر ازاماتتار سول جاقتا ءجۇرىپ ۇيلەنىپ, مۇنداعى وتباسىنا حابارلاسۋدى دا قويعاندار قاتارى دا جىل ساناپ كوبەيە تۇسۋدە ەكەن. ال كوپ بالامەن تۇرمىس تارشىلىعىن كورگەن ايەلدەر اراسىندا وزدەرىنە قول جۇمساۋ دا ازايماي وتىرعان كورىنەدى. ونىڭ ۇستىنە شەتكە كەتكەن ازاماتتىڭ ەلگە جۇقپالى اۋرۋلارمەن ورالۋى دا قالىپتى جاعدايعا اينالعانداي. سونىڭ سالدارىنان ەلدە سپيد, ياعني يممۋندىق تاپشىلىق ۆيرۋسىنا شالدىققاندار سانىنىڭ ارتۋى بايقالادى. ال ەلدەگى مەديتسينا سالاسى ولارمەن كۇرەسۋگە ءالسىز, ءارى ادامداردىڭ تەكسەرىلۋگە دەگەن دە ق ۇلىقتارى شامالى بولسا كەرەك.
تاجىكستانداعى ەندىگى ءبىر حالىقتىڭ اۋزىندا جۇرگەن ماسەلە – جاقىن تۋىستاردىڭ ۇيلەنۋىنە قارسى زاڭ جوباسىنىڭ قاراستىرىلۋى. تاجىكتەردە ەكى اعايىندى جىگىتتەردىڭ بالالارى تۇگىل, تۋعان اعاسىنىڭ قىزىنا ۇيلەنۋ تاڭ ەمەس. قازىرگى كۇنى پارلامەنتتە وسى تۋىستاس نەكەگە توسقاۋىل قويۋ ماسەلەسى كوتەرىلۋدە.
اۋەجايدا تاجىكستان پارلامەنتى تومەنگى پالاتاسىنىڭ ۆيتسە-سپيكەرى نازيرا گاففاروۆامەن تىلدەسۋدىڭ ورايى كەلدى. ۇلى مەن كەلىنىن, نەمەرەسىن الىپ ەلدىڭ سولتۇستىگىندەگى حودجەنتكە ۇشىپ بارا جاتقان نازيرا ابدۋللوقىزىنان وسى ماسەلەگە كوزقاراسىن سۇرادىم. «ارينە, بۇل ءبىر كۇندە قالىپتاسقان ءداستۇر ەمەس, تاجىكتەردىڭ قاندارىن تازا ساقتايمىز دەگەن نيەتىنەن تۋعان وسى ۇستانىمنان باس تارتۋ ماسەلەسىنىڭ پارلامەنت قابىرعاسىندا كوتەرىلگەنى راس. قازىر ونى زەردەلەپ, زەرتتەيتىن ارنايى جۇمىس توبى قۇرىلدى. جاقىندا نەمەرەم تۋعاندا پەرزەنتحاناعا كەلسەم, كەلىنىم جانىندا سالى سۋعا كەتكەن ءبىر جاس انا جاتىر. «قىزىم, كىشكەنتايىڭنىڭ عۇمىرى ۇزاق بولسىن, قىز با, ۇل ما دەپ سۇراسام», جانارى جاسقا تولىپ, – «بىلمەيمىن» دەيدى. سويتسە, نارەستەنىڭ قاي جىنىسقا جاتاتىنى بەلگىسىز, الگى قىز ءوز اعاسىنا تۇرمىسقا شىققان ەكەن. سوندىقتان, قازىر كەسىپ-ءپىشىپ ايتا المايمىن, زاڭ جوباسىمەن جۇمىس توبى اينالىسىپ جاتىر», دەيدى.
بىراق, تاجىكتەردىڭ ەرتەڭگى كۇنىنە دەگەن سەنىمدەرى كىسى قىزىعارلىقتاي. بۇرىنعىدان الدەقايدا جاقسىمىز, ەلدە تىنىشتىق بولسا, قيىندىقتاردى جەڭەمىز دەگەن تاجىك باۋىرلاردىڭ سەنىمدەرىنە سەلكەۋ تۇسپەسە ەكەن دەگەن تىلەكپەن ەلگە اتتاندىق.
انار تولەۋحانقىزى,
«ەگەمەن قازاقستان».
استانا – تاشكەنت –
دۋشانبە – استانا.