«تۇركپا قۇرامىنداعى ازەربايجان, تۇركيا, قىرعىزستان ەلدەرىنىڭ دەپۋتاتتارى جانە ديپلوماتيالىق حاتشىلىق سايلاۋعا بايقاۋشى رەتىندە قاتىستى. دەلەگاتسيانىڭ نەگىزگى قۇرامى 6 ماۋسىم كۇنى كەلدى. ءبىز نۇر-سۇلتان, الماتى, شىمكەنت, تۇركىستان سىندى ءىرى قالالارداعى سايلاۋ بارىسىن باقىلادىق», دەدى تۇركپا باس حاتشىسىنىڭ ورىنباسارى ءالي جۇلدىز.
بۇدان ءارى ءسوز العان تۇركيا ۇلى ۇلتتىق جينالىسىنىڭ دەپۋتاتى يسمەت ۋچما پرەزيدەنت سايلاۋى ەشقانداي كەدەرگىسىز اشىق وتكەنىن ايتتى.
«ءبىزدىڭ دەلەگاتسيا سايلاۋ كۇنى بىرقاتار ۋچاسكەلەردىڭ جۇمىسىن باقىلادى. سايلاۋ ەشقانداي قيىندىقسىز ءوتتى. ورتالىق سايلاۋ كوميسسياسىنىڭ مالىمەتىنشە, سايلاۋشىلار سانى 77,4 پايىزعا جەتكەن. بۇل كورسەتكىش قازاقستانداعى دەموكراتيا جاعدايىنىڭ جوعارى دەڭگەيدە ەكەنىن كورسەتەدى. جەرگىلىكتى حالىق كونستيتۋتسياعا سايكەس, ءوز داۋىستارىن قالاعان كانديداتتارىنا بەردى. قارت كىسىلەردىڭ جانە مۇمكىندىگى شەكتەۋلى ازاماتتاردىڭ ۇيدەن داۋىس بەرۋىنە جاعداي جاسالدى. سونداي-اق شەتەلدە جۇرگەن قازاقستاندىقتار دا سايلاۋعا بەلسەندى تۇردە قاتىسا الدى. سايلاۋ بارىسىندا حالىقارالىق باقىلاۋشىلار جۇمىسىنا ەشقانداي كەدەرگىلەر بولمادى», دەدى يسمەت ۋچما.سونداي-اق ول «اق جول» پارتياسىنان پرەزيدەنتتىكتەن ۇمىتكەر بولىپ سايلاۋعا قاتىسقان دانيا ەسپاەۆا جايىندا ايتىپ ءوتتى.
«تۇركپا دەلەگاتسياسى سايلاۋعا دەيىن ءار كانديداتتىڭ شتاب جۇمىستارىن دا باقىلادى. وزدەرىڭىز بىلەتىندەي, 7 كانديدات قاتىستى. ۇمىتكەرلەر اراسىندا جالعىز ايەل ادام بولدى. دانيا ەسپاەۆانىڭ پرەزيدەنتتىكتەن ۇمىتكەر بولىپ سايلاۋعا ءتۇسۋى قازاقستاندا گەندەرلىك تەڭدىكتىڭ بار ەكەنىن كورسەتەدى», دەدى ول.