«سۇندەت – مۇسىلمانعا ءمىندەت» دەگەن دە ءسوز بار. ءيسى مۇسىلماننىڭ عۇرپىنا اينالعان سۇندەتتەۋ سالتى ءبۇگىندە كانادا, اۋستراليا, جاڭا زەلانديا, انگليا سەكىلدى بىرقاتار مەملەكەتتەردە قالىپتى ءۇردىس سانالادى. ءتىپتى اقش-تىڭ ءوزىندە, ايتالىق, سولتۇستىك امەريكادا پروفيلاكتيكالىق ءارى گيگيەنالىق ماقساتتا جاس بالالاردىڭ توقسان پايىزى سۇندەتتەلەدى. ويتكەنى امەريكانىڭ مەديتسينالىق اسسوتسياتسياسى (اما – اmerican Medical Association) 2000 جىلعى بايانداماسىندا ءسۇندەتتەۋدىڭ نەسەپ, قۋىق جولدارىن سيرەك كەزدەسەتىن قاتەرلى, جۇقپالى اۋرۋلاردان, ينفەكتسيادان قورعايتىنىن جازدى. كەيبىر دەرەكتەرگە سۇيەنسەك, الەمدەگى ەر ادامداردىڭ التىدان ءبىر ءبولىگى سۇندەتتەلەدى ەكەن. ال حالقىمىزدا سۇندەت تويعا جەتۋ – ەرەكشە باقىت. سۇندەتتەلگەن بالانى حانداي قۇرمەتتەپ, ۇكى تاعىپ, تاي مىنگىزىپ, قۋانىشتى بولىسۋگە كەلگەن قوناقتار «ەرجەتكەن» كىشكەنتاي توي يەسىن قۇرالاقان قالدىرماعان.
قازىرگى اتا-انالار ۇشتەن اسىپ, جەتىگە جاقىنداعان بالاسىن سۇندەتتەۋدى بۇرىنعىداي مولدالارعا ەمەس, دارىگەرلەرگە تاپسىرعاندى ءجون كورەدى.
اۋىل ادامدارى كۇزدىگۇنى ەگىستىكتەن تاپقان از اقشاسىن نەمەسە مالىن ساتىپ سابىلسا دا سۇندەت تويدى وتكىزەدى. ال قالتانى قاعىپ الاتىن قالانىڭ قاتاڭ تىرشىلىگىندە كۇن كەشىپ جۇرگەن وتباسىلارعا توي تۇگىلى بالانى سۇندەتكە وتىرعىزۋدىڭ ءوزى وڭاي ەمەس. وسى ولقىلىقتىڭ ورنىن تولتىرۋدى كوزدەگەن ەلوردا اكىمدىگى «سۇندەت-2019» اكتسياسىن ۇيىمداستىردى. اكىمدىك 2 كۇنگە سوزىلعان شاراعا كوپ بالالى وتباسىلاردان 3-7 جاس ارالىعىنداعى 110-نان استام بالا تىركەلگەنىن مالىمدەدى. الايدا, اكتسيا وتكىزىپ جاتقان №2 قالالىق بالالار اۋرۋحاناسى باس دارىگەرىنىڭ ورىنباسارى ايبىن نۇرتاس ۇلى بالالار سانى تىزىمدەگىدەن ءالدەقايدا كوپ ەكەنىن ايتتى. «بۇل شارانىڭ ماقساتى – ەل استاناسىنداعى كوپ بالالى وتباسىلارعا الەۋمەتتىك كومەك كورسەتۋ. وسى شاراعا ءوزىمىزدىڭ تاجىريبەلى مامانداردى تارتتىق. وعان قوسا ۋرولوگتار قوعامىنىڭ كونگرەسىنە گەرمانيا, تۇركيادان كەلگەن ۇزدىك ۋرولوگتار اتسالىستى. اكتسيا باستالعاننان بەرگى ءۇش ساعاتتىڭ ءىشىندە 40 بالانى سۇندەتتەپ ۇلگەردىك», دەدى دارىگەر.
بالالاردى ءتۇرلى مۋلتفيلم كەيىپكەرلەرى, كوڭىلدى شارلارمەن بەزەندىرىلگەن اۋرۋحانا كۇتىپ الدى. مۇندايدا بالدىرعاننىڭ ۇرەي الەمىنەن الىستارى انىق. سونداي بالانىڭ ءبىرىن اتا-اناسىمەن شىعا بەرىستە كەزدەستىردىك. نۇرداۋلەت مۇنداعى دارىگەرلەردىڭ مەيىرىمدى, سىيلىق پەن تاتتىلەر بەرەتىن قولى اشىق جاندار ەكەنىن جەتكىزدى. ول ويىن ويناپ, كوڭىل كوتەرۋگە كەلگەندەي, شات-شادىمان جۇگىرىپ ءجۇر. اناسى اقتولقىن سىزدىقوۆا اكتسيا تۋرالى قالالىق كوپ بالالى انالاردىڭ الەۋمەتتىك جەلىدەگى توبىنان وقىپ ءبىلىپتى. «حاباردى بىلگەن بويدا اكىمدىككە قوڭىراۋ سوعىپ, جول سىلتەۋىمەن وسىندا كەلدىك. ءبىرىنشى بالامدى سۇندەتكە وتىرعىزعاندا ءسال قيىنداۋ بولدى. دارىگەرلىك قىزمەتتى دە قالتامىزعا قاراي ىزدەيمىز عوي. بىلتىر سۇراستىرعانمىن: اۋىرتپاي, ناركوز بەرىپ جاسايتىن بولسا, 25 مىڭ تەڭگە, ال اۋىرعانىن باساتىن دارىمەن عانا شىعارىپ سالسا, 15 مىڭ تەڭگە ەكەن. قۇداي ءساتىن سالعان بولار, تەگىن قىزمەتتىڭ ءناسىبىن كورىپ قالدىق. بىزگە جاقسى كومەك بولدى», دەيدى انا.
ال نۇرداۋلەتتىڭ اكەسى تەلەفوندا تۋىستارىنا «بالامىز سۇندەتتەلىپ, ازامات بولدى!» دەپ سۇيىنشىلەپ جاتتى.