بيىلعى جارىسقا قازاقستان رەسپۋبليكاسىنىڭ پرەزيدەنتى قاسىم-جومارت توقاەۆ ءمارتەبەلى مەيمان رەتىندە قاتىسىپ, بالۋاندارعا قولداۋ ءبىلدىرۋگە ارنايى كەلدى. ال جارىستىڭ اشىلۋ سالتاناتىندا مادەنيەت جانە سپورت مينيسترى ارىستانبەك مۇحامەدي ۇلى, ۇلتتىق سپورت جاناشىرى, كاسىپكەر ورالبەك بوتباەۆ, «ORDA INVEST» كورپوراتسياسىنىڭ باسقارما توراعاسى شالقاربەك تاليپوۆ جəنە «قازاقستان بارىسى» قازاق كۇرەسىن دامىتۋ قورى قامقورلىق كەڭەسىنىڭ توراعاسى ارمان شوراەۆ قۇتتىقتاۋ ءسوز سويلەپ, بالۋاندارعا جەڭىس, جانكۇيەر قاۋىمعا ەستەن كەتپەس جاقسى əسەر تىلەدى. سونداي-اق شىن مىقتى بالۋاننىڭ جەڭىسكە جەتۋىنە تىلەكتەستىكتەرىن ءبىلدىردى. بوزكىلەمدە ءبىر-بىرىمەن يىق تىرەسىپ, كۇرەسكە تۇسۋگە اسىعىپ تۇرعان بالۋاندارعا əيگىلى بالۋان, وليمپيادا چەمپيونى جاقسىلىق ۇشكەمپىروۆ اق تىلەگىن ارناپ, باتاسىن بەردى.
تۋرنيرگە ەلىمىزدىڭ ءəربىر ايماعىندا ۇيىمداستىرعان ىرىكتەۋ كەزەڭىنەن ءسۇرىنبەي وتكەن تاڭداۋلى بالۋاندار قاتىسقان سوڭ بوزكىلەم ءۇستى توسىن جەڭىستەرگە, جان الىسىپ, جان بەرىسكەن بەلدەسۋلەرگە دە تولى بولدى. ادەتتە «قازاقستان بارىسى» ءتۋرنيرىنىڭ بەلدەسۋلەرى شيرەك فينالدان باستاپ قىزا ءتۇسەتىن. ويتكەنى العاشقى اينالىمداردا بالۋاندار ءبىر-ءبىرىن اڭدىسىپ, تاۋەكەلگە بارماي, بايىپپەن, اسا ءبىر ساقتىقپەن كۇرەسەتىن. ال بۇل جىلى مۇلدە باسقاشا بولدى. بالۋاندار سالعان جەردەن قارسىلاستارىن الىپ تا, شالىپ تا جىعۋعا ۇمتىلدى. مىسالى, جارىستىڭ ەكىنشى اينالىمىندا قاتارىنان ءتورت كەزدەسۋ مەرزىمىنەن بۇرىن اياقتالىپ, بالۋاندار تازا جەڭىسكە جەتتى. ءتىپتى الماتىلىق رۋسلان ءابدىرازاقوۆ اتىراۋ وبلىسىنىڭ بالۋانى بەكبولات سالىقوۆتى نەبارى 14 سەكۋندتا تازا ادىسپەن جەڭىپ كەتتى.
شيرەك فينالداعى اسا قىزىقتى ھəم تارتىستى وتكەن بەلدەسۋدىڭ ءبىرى 2013 جىلعى «قازاقستان بارىسى» ايبەك نۇعىماروۆ پەن 2014 جىلعى «قازاقستان بارىسى» اتانعان مۇحيت تۇرسىنوۆ اراسىندا ءوتتى. بۇعان دەيىن بوزكىلەم ۇستىندە تالاي رەت بەلدەسىپ, ءبىر-ءبىرىنىڭ قىر-سىرىن ءابدەن مەڭگەرىپ العان قوس بالۋان اراسىنداعى بەلدەسۋدە ەكەۋى ەكى مينۋتقا جۋىق ءبىر-بىرىنەن ساقتانىپ, ءəدىس جاساۋعا اسىقپادى. دەگەنمەن, بەلدەسۋدىڭ ورتا تۇسىنان اۋعاندا ايبەك نۇعىماروۆ بۇك ۇپاي يەلەنىپ, مۇحيت تۇرسىنوۆتى جارىس جولىنان شىعارىپ ءجىبەردى.
شيرەك فينالداعى تاعى ءبىر ماڭىزدى بەلدەسۋ الماتىلىق رۋسلان ءابدىرازاقوۆ پەن قىزىلوردالىق ماقسات يساعابىلوۆ اراسىندا ءوتتى. ەكى بالۋان دا شيرەك فينالعا دەيىن قارسىلاستارىن ايقىن باسىمدىقپەن جەڭىپ كەلگەن-ءدى. العاشقى ەكى مينۋتتىڭ ىشىندە ر.ءابدىرازاقوۆ جامباس ۇپايىن يەلەنىپ, جارتىلاي فينالعا ءبىر تابان جاقىنداي ءتۇستى. ال بəسەكەنىڭ سوڭىندا تازا جەڭىسپەن جارتىلاي فينالعا جولداما الدى. سونداي-اق ¼ فينالدىق باسەكەدە ەلوردالىق ايبات سەيتەن ماڭعىستاۋلىق نۇرداۋلەت جارىلعاپوۆتى تازا ادىسپەن جەڭىپ, كەلەسى كەزەڭگە جولداما السا, شىعىستىڭ شىمىر بالۋانى ەراسىل قاجىباەۆ قوستانايلىق عابيت بالعىنباەۆتان ايلاسىن اسىرىپ كەتتى.
سونىمەن جانكۇيەر قاۋىم اسىعا كۇتكەن جارتىلاي فينال بەلدەسۋلەرىنە دە كەزەك كەلدى. الدىمەن كىلەمگە دزيۋدو كۇرەسىنەن ۇلتتىق قۇراما ساپىندا تالاي دودادا اتوي سالىپ, ەل مەرەيىن اسىرىپ جۇرگەن شىعىس قازاقستان وبلىسىنىڭ نامىسىن قورعاعان ەراسىل قاجىباەۆ پەن «قازاقستان بارىسى» تۋرنيرىنە بىرنەشە جىل قاتىسىپ, ءۇلكەن تəجىريبە جيناقتاعان نۇر-سۇلتان قالاسىنىڭ بالۋانى ايبات سەيتەن شىقتى. بەلدەسۋدىڭ اياقتالۋىنا 52 سەكۋند قالعاندا قاجىباەۆ تازا جەڭىسپەن ءتۋرنيردىڭ فينالىنا شىقتى.
ال ەكىنشى جارتىلاي فينالدىق جۇپتا «قازاقستان بارىسى» ءتۋرنيرىنىڭ 2013 جىلعى جەڭىمپازى ايبەك نۇعىماروۆ پەن 2015 جىلعى كۇمىس جۇلدەگەر رۋسلان ابدىرازاقوۆ كۇش سىناستى. وتە تارتىستى وتكەن بۇل بەلدەسۋدە رۋسلان ەكى مينۋت بويى ءبىر جارتىلاي جەڭىسپەن الدا تۇرعان ەدى. الايدا ايبەك سوڭعى ساتتە قارسىلاسىنان جەڭىستى ج ۇلىپ الدى.
2019 جىلعى «قازاقستان بارىسىن» انىقتايتىن شەشۋشى سايىستىڭ الدىندا جۇلدە بەرىلەتىن ءۇشىنشى ورىن ءۇشىن بەلدەسۋ ءوتتى. نۇر-سۇلتان قالاسىنىڭ بالۋانى ايبەك سەيتەن مەن الماتى قالاسىنىڭ ارلانى رۋسلان ابدىرازاقوۆ اراسىنداعى جەكپە-جەكتە كوپ جىلدىق تəجىريبە ءوز ءسوزىن ايتتى. مىقتىلار بەلدەسۋىندە رۋسلان ابدىرازاقوۆ ەكىنشى رەت «قازاقستان بارىسىنىڭ» قولا ءجۇلدەسىن يەلەندى. ول بۇعان دەيىن 2014 جىلعى دودادا ءۇشىنشى ورىن ولجالاعان بولاتىن.
سونىمەن قازاق كۇرەسىنەن ەڭ مىقتى, ەڭ كۇشتى بالۋاندى انىقتايتىن سəت تە كەلىپ جەتتى. التى ساعاتقا سوزىلعان ايتۋلى باسەكەنىڭ فينالىنا تۋرنيردە ءبىر دەممەن كۇرەسىپ, ءوزىنىڭ بابىندا ەكەندىگىن تەك بىلتىر ەمەس, بيىل دا كىلەم ۇستىندە دالەلدەگەن «قازاقستان بارىسى» ءتۋرنيرىنىڭ بىلتىرعى ءفيناليسى ەراسىل قاجىباەۆ پەن 2013 جىلعى «قازاقستان بارىسى» جارىسىنىڭ جەڭىمپازى ايبەك نۇعىماروۆ شىقتى. بىلەكتى بالۋانداردىڭ اراسىنداعى فينالدىق بەلدەسۋدىڭ العاشقى مينۋتىندا شىعىسقازاقستاندىق ەراسىل قاجىباەۆ بەلسەندى قيمىلداپ, ءا دەگەننەن-اق العاشقى ۇپايدى ەنشىلەپ ۇلگەردى. بىراق ايبەك نۇعىماروۆ فينالعا تەگىننەن- تەگىن شىقپاعانىن ءدالەلدەپ, جامباس ۇپايىمەن تارازى باسىن وزىنە اۋداردى. ارادا كوپ ۋاقىت وتپەي ەراسىل دا ءادىس جاساپ, جامباس ۇپايعا قول جەتكىزىپ, ەسەپتى تەڭەستىرگەن-ءدى. دەسە دە, بارلىق كۇشىن سارقىپ العان ول سوڭعى ساتتە قارسىلاسىنا ەسە جىبەرىپ قويدى. تاعى دا جامباس ۇپايىن ولجالاعان ايبەك نۇعىماروۆ ەكىنشى رەت «قازاقستان بارىسى» تۋرنيرىندە توپ جاردى. ال جارىسقا ەكىنشى رەت قاتىسىپ, ەكىنشى رەت فينالدا جەڭىلگەن ەراسىل قاجىباەۆ ەكىنشى رەت «كۇمىس بەلبەۋ» يەگەرى اتاندى.
«قازاقستان بارىسى» تۋرنيرىنىڭ جەڭىمپازى مەن ءجۇلدەگەرلەرىن ماراپاتتاۋ شاراسىنا مادەنيەت جانە سپورت ءمينيسترى ارىستانبەك مۇحامەدي ۇلى, حالىقارالىق قازاق كۇرەسىنىڭ پرەزيدەنتى قانات بوزىمباەۆ, نۇر-سۇلتان قالاسىنىڭ اكىمى باقىت سۇلتانوۆ, ماسكەۋ وليمپياداسىنىڭ چەمپيونى جاقسىلىق ءۇشكەمپىروۆ, «قازاقستان بارىسى» قازاق كۇرەسىن دامىتۋ قورى قامقورلىق كەڭەسىنىڭ توراعاسى ارمان شوراەۆ قاتىستى. 2019 جىلعى «قازاقستان بارىسى» ايبەك نۇعىماروۆتىڭ بەلىنە «التىن بەلبەۋدى» ارىستانبەك مۇحامەدي ۇلى بايلادى. سونىمەن قاتار شىعىسقازاقستاندىق بالۋانعا «التىن تايتۇياق» پەن 25 ميلليون تەڭگەنىڭ سەرتيفيكاتى تابىس ەتىلدى. بالۋاننىڭ باپكەرى دە قۇرالاقان قالعان جوق, چەمپيوننىڭ جاتتىقتىرۋشىسى 3,5 ميلليون تەڭگە سىياقىعا يە بولدى. بۇدان بولەك, تۋرنيردە كۇمىس جۇلدەگەر اتانعان ەراسىل قاجىباەۆقا «كۇمىس بەلبەۋ» مەن 5,5 ميلليون تەڭگە سىيلىق تاپسىرىلدى. ال ونىڭ باپكەرى 1,8 ميلليون تەڭگە يەلەندى. ال ءۇشىنشى ورىن يەلەنگەن رۋسلان ءابدىرازاقوۆقا 1,8 ميلليون تەڭگە, باپكەرىنە 900 مىڭ تەڭگەنىڭ سەرتيفيكاتى تابىستالدى.
قورىتا ايتقاندا, «قازاقستان بارىسى» ءتۋرنيرى جىل سايىن جوعارى دەڭگەيدە ۇيىمداستىرىلىپ كەلەدى. بيىل دا سولاي بولدى. ونى «بارىس ارەنا» مۇز سارايىنا بالۋاندارعا تاپجىلماي وتىرىپ جانكۇيەر بولعان كورەرمەن سانىنان-اق بايقاۋعا بولادى. «قازاقستان بارىسى» ءتۋرنيرى كەلەسى جىلى ءوزىنىڭ ون جىلدىعىن تويلايدى. ۇيىمداستىرۋشى تاراپ, ونجىلدىققا بايلانىستى كەلەسى جىلى جارىستىڭ ىرىكتەۋ كەزەڭىنە وزگەرىس ەنگىزەتىندىكتەرىن ايتتى. وزگەرىس تۋرنيردىڭ كوركىن قىزدىرماسا, كەمىتپەيتىنى ءسوزسىز.