سوعان وراي, داڭقتى سپورتشىمىزعا تۇڭعىش پرەزيدەنت – ەلباسى نۇرسۇلتان نازارباەۆ, مەملەكەت باسشىسى قاسىم-جومارت توقاەۆ ءوز قۇتتىقتاۋلارىن جولداپ, اق تىلەكتەرىن جەتكىزدى.
ەلباسى حاتىندا بوكسشىنىڭ جوعارى دارەجەدەگى ەرىك-جىگەرى مەن تالماس رۋحىن تانىتقانىن ايتا كەلىپ: «ءوزىڭدى ۇدايى شىڭداۋىڭ جانە العا ۇمتىلىسىڭ ساعان كوپتەگەن سپورت شىڭدارىن باعىندىرۋعا ءمۇمكىندىك بەردى, ول قازاقستاندىق سپورتشىلاردىڭ جاڭا بۋىنى ءۇشىن ۇلگىگە اينالدى», دەپ اتاپ وتكەن. ەلباسىنىڭ قۇتتىقتاۋىن باسپاسوز حاتشىسى ايدوس ۇكىباي ءوزىنىڭ تۆيتتەردەگى پاراقشاسىندا جاريالادى.
ال قازاقستان پرەزيدەنتى ق.توقاەۆ ءوزىنىڭ تۆيتتەردەگى پاراقشاسىندا: «ەلىمىزدىڭ ماقتانىشى گەننادي گولوۆكين كەزەكتى سەنىمدى جەڭىسىمەن قازاقستاندىقتاردى قۋانتىپ, تاعى دا ءوزىنىڭ جىگەرلى رۋحى مەن شەبەرلىگىن كورسەتتى! جارايسىڭ, گەنا! قازاقستاندىقتار قاشاندا سەنى ماقتان ەتەدى! جەڭىس قۇتتى بولسىن!» دەپ جازدى.
الەمدىك بوكس ماماندارى مەن جانكۇيەرلەرى بۇل جەكپە-جەكتى تاعاتسىزدانا كۇتكەنى انىق. ويتكەنى بۇل كەزدەسۋ گولوۆكين ءۇشىن تاعدىرشەشتى ايقاس ەدى. وتانداسىمىز بىلتىر قىركۇيەك ايىندا مەكسيكالىق ساۋل الۆارەستەن جەڭىلگەننەن كەيىن بىرقاتار بوكس ماماندارى گولوۆكيننىڭ ءداۋىرى اياقتالىپ, بۇدان كەيىنگى قارسىلاستارىنا شاماسى كەلمەيدى دەگەن سىڭايداعى پىكىرلەرىن ايتىپ جاتقان-دى. باپكەر اۋىستىرعاندا دا گولوۆكيننىڭ تاراپىنا ءبىراز سىني پىكىر ايتىلدى. ال بۇل ايقاس سول ايتىلعان پىكىرلەرگە, وتانداسىمىزعا سەنىمسىزدىك بىلدىرگەن بوكس جانكۇيەرلەرىنە بەرەتىن ناقتى جاۋاپ بولاتىن. بوكس كەشىنە كەلگەن جانكۇيەرلەردىڭ كوبى وسى سۇراققا جاۋاپ الۋ ءۇشىن كەلگەن-ءدى. سونداي-اق وسىدان ءبىر اپتا بۇرىن وتكەن اسا اۋىر سالماقتاعى بريتانيالىق ەنتوني دجوشۋا مەن مەكسيكالىق ەندي رۋيس اراسىنداعى جەكپە-جەكتىڭ ستسەناريى قايتالانا ما ەكەن دەگەن وي بۇكىل جانكۇيەردى Madison Square Garden ارەناسىنا جەتەلەگەنى دە بەلگىلى. ول كەزدەسۋ دە ءدال وسى سپورت كەشەنىندە وتكەن بولاتىن. ءتىپتى كانادالىق ستيۆ روللس گولوۆكينگە قارسى جەكپە-جەك الدىندا ىرىمعا بالاپ, ءرۋيستىڭ كيىم اۋىستىراتىن بولمەسىن دە تاڭداپ العانىن باق بەتتەرىنەن وقىپ, كوزىمىز شالىپ قالدى.
جەكپە-جەككە توقتالار بولساق, ءبىرىنشى راۋندتا ەكى بوكسشى دا اڭدىسۋمەن, ءبىرىن-ءبىرى باقىلاۋمەن ءجۇردى. گولوۆكين اسا سالقىنقاندىلىقپەن قيمىلداپ, اياقتا جانە قورعانىستا ءابجىل قيمىلدايتىنىن اڭعارتتى. ەكىنشى راۋندتا گولوۆكين ازداپ شەگىنىپ, جەكپە-جەك تىزگىنىن روللسقا بەرۋدى ءجون سانادى. ءوز كەزەگىندە كانادالىق بوكسشى بۇل مۇمكىندىكتى ۇتىمدى پايدالانۋعا تىرىسىپ, گولوۆكينگە سوققى دارىتۋعا ۇمتىلدى. بىراق گولوۆكين كانادالىق بوكسشىنىڭ وزىنە ەشقانداي قاۋقار كورسەتە المايتىنىن اڭعارىپ, ءۇشىنشى راۋندتان باستاپ قارسىلاسىن سوققىنىڭ استىنا الدى. ءتىپتى گولوۆكيننىڭ ءدال سوققىلارى روللستى ەسەڭگىرەتىپ جىبەرە جازدادى. سوعان قاراماستان, كانادالىق بوكسشى ءتوپەلەگەن سوققىدان سىتىلىپ شىعىپ شابۋىلداۋعا تىرىستى. ال ءتورتىنشى راۋندتا گولوۆكيننىڭ سەريالى سوققىلارى روللستى نوكاۋتقا ءتۇسىرىپ تىندى. باستان جانە جاقتان تيگەن اۋىر سوققىدان كەيىن كانادالىق بوكسشى ورنىنان كوتەرىلە العان جوق. بۇل گولوۆكيننىڭ كارەراسىنداعى 39-ى جەڭىسى.
گولوۆكيننىڭ بۇل جەكپە-جەكتەگى رەسمي گونورارى 2 ميلليون دوللار. بىراق جارناما, تەلەترانسلياتسيادان تۇسەتىن تابىسىن قوسا ەسەپتەگەندە شامامەن 15 ميلليون دوللار شاماسىندا قارجى تابادى. ال قارسىلاسى ستيۆ روللس 300 مىڭ دوللار قارجىعا كەنەلدى. بۇل سوما ونىڭ كارەراسىنداعى ەڭ كوپ گونورار.
سونداي-اق بۇل بوكس كەشىندە گەنناديدەن بولەك, تاعى ەكى وتانداسىمىز جۇدىرىقتاستى. ەكىنشى ورتا سالماقتا جۇدىرىقتاساتىن ءالي احمەدوۆ جەرگىلىكتى بوكسشى ماركۋس ماكدەنيەلمەن WBC International بەلدىگى ءۇشىن سىنعا ءتۇسىپ, جەرلەسىمىز ءۇشىنشى راۋندتا تەحنيكالىق نوكاۋتپەن جەڭىسكە جەتتى. ال تاعى ءبىر جەرلەسىمىز باقتيار ەيۋبوۆ امەريكالىق بوكسشى برايان سەبالودەن ۇپاي سانى بويىنشا جەڭىلىپ قادى.
گولوۆكيننىڭ بۇل جەڭىسىنەن كەيىن كوپ جانكۇيەردىڭ كوكەيىندە «كۇز مەزگىلىندە گولوۆكين- كانەلو اراسىنداعى جەكپە-جەكتىڭ تريلوگياسى بولا ما؟» دەگەن سۇراق سايراپ تۇرعانى انىق. گەنناديدىڭ ءوزى دە بۇل ايقاسقا قارسى ەمەس ەكەنىن جەتكىزدى.
رەسەيلىك بوكس ساراپشىسى گريگوري ستانگريتتىڭ سوزىنشە, ورتا سالماق الىپتارىنىڭ كەزدەسۋى بيىل بولمايدى. «گولوۆكين مەن الۆارەس اراسىنداعى ءۇشىنشى جەكپە-جەك وتەتىنىنە سەنىمدىمىن. بىراق كۇزدە وتەدى دەگەنگە سەنبەيمىن. ويتكەنى قازىرگى تاڭدا ەكى بوكسشى دا DAZN تەلەسەرىكتەستىگىمەن كەلىسىمشارتقا وتىرعان سوڭ, اتالعان تەلەارنانىڭ ماقساتى ەكى بوكسشىنىڭ ءۇشىنشى جەكپە-جەگىنەن قىرۋار قارجى تابۋ بولاتىن. سوندىقتان كەزدەسۋ ۋاقىتىن سوزعان سايىن جانكۇيەردىڭ قىزىعۋشىلىعى ارتىپ, كوپ قارجىعا كەنەلەدى», دەيدى ستانگريت. ال گولوۆكيننىڭ ءوزى بيىل جىل سوڭىنا دەيىن ءۇش جەكپە-جەك وتكىزۋدى جوسپارلاپ وتىر.