تاعدىر تاۋقىمەتىمەن اتاجۇرتتان الىستاپ قالعان اسان قاريانىڭ بار اڭسارى – تۋعان جەرىن ءبىر كورۋ. جات ەلدەن جۇماق تاپقانىمەن, ساعىنىش مەڭدەگەن جۇرەك جۇبانار ەمەس. كوكەيدەگى ماقسات-تىلەگى تەك قانا تۋعان جەرگە ورالۋ. پاريجدە ۇزاق جىل ءومىر سۇرگەن اسان قاريا ۇلدارى مارات پەن ەلجانعا: «مەنى تۋىپ-وسكەن وتانىما الىپ بارىڭدار», دەپ ءوتىنىش ايتادى. سول تۇستان باستاپ ولاردىڭ اراسىندا تارتىس باستالادى. اياعىندا كىشى بالاسى اكە ارمانىن ورىنداپ, قازاقستانعا ات باسىن تىرەيدى. كەدەرگىلەردى جەڭىپ, وتانىنا اياق باسقان قاريا مۇنان سوڭ دا ءتۇرلى قايشىلىقتارعا تاپ كەلەدى...
دراما اۆتورى جولتاي ءالماش ۇلى تەاتردىڭ ساپارى جايىندا: «وسى ۋاقىتقا دەيىن ازدى-كوپتى ءبىرشاما تۋىندى جازعان ەكەنبىز. الايدا ءبارىنىڭ بىردەي جولى بولىپ جاتىر دەسەك, ارتىق ءسوز شىعار, بالكىم. ءبىرى جالعىز-اق رەت قويىلىپ, قايتالاپ ساحنالانبادى, كەيبىرى ون جىلداپ ساحنادان تۇسپەي قويدى, ەندى ءبىرىنىڭ جولى تالاسقا يەكتەپ, تاستاققا تارتتى, تاعى ءبىرىنىڭ باعى جانبادى – كوركەم دۇنيەنىڭ دە كادىمگى جانى بار ادام سەكىلدى تاعدىرى بولادى ەكەن-اۋ. ال مىنا «مۇڭمەن الىسقان ادام» جازىلعالى بەرى ون جىلعا تاقاپ قالىپتى. وسى كەزەڭدە سان رەت ساحنالاندى, ەلىمىزدىڭ تالاي جەرلەرىن ارالادى, ءتىپتى ستۋدەنتتەر ونى اعىلشىن تىلىندە سويلەتىپ ۇلگەردى. ەندى مىنە, قازاقستاننىڭ وزبەكستانداعى جىلى اياسىندا وتەتىن مادەني شاراعا تاڭداپ الىنعان ەكى بىردەي قويىلىمنىڭ بىرەۋى ءى.ەسەنبەرليننىڭ «حان كەنەسى» دە, ال ەكىنشىسى – مەنىڭ «مۇڭمەن الىسقان ادامىم». وسى شاراعا ارنايى شاقىرتۋ الدىم. قانى ءبىر تۋىسقان حالىقتىڭ كەڭپەيىل كورەرمەنىمەن بىرگە تەاتر زالىندا قاتار وتىرىپ, ءوز قولىمىزدان شىققان دراما بويىنشا ساحنالانعان تۋىندىنى تاماشالاۋدىڭ ءوزى عانيبەت ەمەس پە!» دەي كەلىپ, تەاتردىڭ مۇنان كەيىنگى ساپارى تۇركىستانداعى ر.سەيتمەتوۆ اتىنداعى سازدى-دراما تەاترىندا جالعاساتىنىن ايتتى.
قارشىعا كۇلەن