ايدانىڭ 5 جاسار قاراقات دەگەن قىزى بار ەكەن. كۇيەۋى جوق. 25 كۇن بويى اۋرۋحانادا ءومىر مەن ءولىمنىڭ اراسىندا ارپالىسىپ جاتقان ايدانىڭ دەنساۋلىعى قازىر دە بىرقالىپتى ەمەس. ءۇش رەت وتا جاساتقان ولار ەندى تاعى ءبىر وتانى كۇتۋدە. اۋەلى جارىلىس بولعاندا قۇتقارۋشىلار ايدانى جاڭىلىسىپ تاراز قالالىق بالالار اۋرۋحاناسىنا جاتقىزىپتى. كەيىننەن قايتىس بولعان وزگە قىزبەن ونى تاعى دا شاتاستىرىپ, قايتىس بولعان دەپ ەسەپتەيدى. الايدا, ايدانى سول اۋرۋحانادا جۇمىس ىستەيتىن سايات دەگەن سىنىپتاسى تانىپ قالىپ, ءبىرگە وقىعان قىزدارعا حابار بەرەدى. سودان كەيىن عانا ايدا تولەگەنوۆا №1 تاراز قالالىق اۋرۋحاناسىنا جەتكىزىلەدى. «جامبىل وبلىستىق دەنساۋلىق ساقتاۋ باسقارماسىنىڭ باسشىسى مارات جۇمانقۇلوۆ, №1 تاراز قالالىق اۋرۋحاناسىنىڭ باس دارىگەرى نۇرلان ابىلداەۆ, ورىنباسارى ەربول وردابەكوۆ, ءبولىم مەڭگەرۋشىسى گامزات مۇساەۆ, نەيروحيرۋرگ باقىتجان تۇرار ۇلى جانە وزگە دە ازاماتتارعا العىس ايتامىن. قىزىمنىڭ دەنساۋلىعىنا جاقسى قاراپ, قولدان كەلگەن كومەكتەرىن اياعان جوق. بۇل كىسىلەر كۇن, ءتۇن دەمەي ايدانىڭ جانىندا بولىپ, دەنساۋلىعىنىڭ ءبىرشاما تۇزەلۋىنە سەپتىگىن تيگىزدى», دەيدى اناسى گ.بولەگەنوۆا.
بۇگىندە تاراز قالالىق اكىمدىگى ب ۇلىنگەن ءۇيدى قايتا قالپىنا كەلتىرۋگە ءۋادە بەرىپ وتىر. ءتيىستى جۇمىستار باستالىپ تا كەتتى. الايدا, گ.بولەگەنوۆا قىزى ايدانىڭ ول ۇيگە ەندى بارعىسى كەلمەيتىنىن ايتادى. «قاراتاۋ قالاسىنان كەزىندە «ايدا» ناۋبايحاناسىن اشىپ, سول جەردە جۇمىس ىستەپ ءجۇرىپ وسى پاتەردى قىزىما الىپ بەرگەنمىن. ءوزى تارازداعى «نۇراي» بالاباقشاسىندا جۇمىس اتقارىپ ءجۇردى. ەشكىمنىڭ باسىنا بەرمەسىن, ەكى جىل بۇرىن جالعىز ۇلىمنان ايرىلدىم. ەندى ايدانىڭ جاعدايى مىناداي بولدى. قىزىم قازىر ول ءۇيدە تۇرماق تۇگىلى جانىنان وتۋگە قورقادى. مەنىڭ جالعىز تىلەگىم, سول پاتەردى اكىمدىك وزدەرىنە الىپ, بىزگە سونداي ەكى بولمەلى پاتەر بەرسە بولدى. وسى ويىمدى ايتۋعا وبلىس اكىمى اسقار مىرزاحمەتوۆتىڭ قابىلداۋىنا دا جازىلىپ قويدىم. ءبىزدى اكىمدىك قولداماسا, باسقا كىم قولدايدى», دەيدى ول.
جالعىز قىزىنىڭ جاعدايىنا جانى اۋىرعان انا كۇنارا 100 شاقىرىم جولدى ارتقا تاستاپ, تاكسي جالداپ قاراتاۋ قالاسىنان كەلەدى ەكەن. سەبەبى تاراز قالاسىندا تۇراتىن ءۇي جوق. ال مىڭبۇلاق شاعىن اۋدانىنداعى ەكى بولمەلى ءۇيىنىڭ ەكى بولمەسىنىڭ دە ەدەنى تولىعىمەن جەرگە ءتۇسىپ كەتكەن. قىسقاسى, امالى تاۋسىلعان انا وسى جاعدايدى ايتىپ تاراز قالاسى اكىمىنىڭ ورىنباسارى بەيسەنبەك جانبوسىنوۆتىڭ قابىلداۋىنا بارادى. الايدا, اكىمنىڭ ورىنباسارى ۋاجگە قۇلاق اسپاي, كەرى قايتارادى. «ول كىسى ورنىنان اتىپ تۇرىپ «سەندەرگە گازدى جاۋىپ جۇرىڭدەر دەگەنمىن. گازدى مەن جارعان جوقپىن. تۇرامىن دەسەڭدەر, ءۇش بولمەلى پاتەر بار. سونىڭ ەكى بولمەسىندە بىرەۋلەر تۇرىپ جاتىر. ءبىر بولمەسى بوس. تۇرامىن دەسەڭدەر تۇرىڭدار سوندا. ەكى ايدان بەرى قايدا ءجۇرسىڭ» دەپ, وزىمە دۇرسە قويا بەردى. ءبىر ايدانىڭ وزىنە التى ادام قارايمىز. ەكى ايدان بەرى مەن وڭىپ جۇرگەن جوقپىن عوي», دەيدى ول. گ.بولەگەنوۆانىڭ ەندى قالالىق اكىمدىك ەسكى ءۇيدى وزدەرى الىپ, ورنىنا باسقا پاتەر بەرسە دەگەن تىلەگى بار. ەندىگى ءۇمىتتى وبلىس اكىمىنەن عانا كۇتىپ وتىر.
جامبىل وبلىسى