ن.نازارباەۆ قاتىسۋشىلارعا ەرەكشە ەستە قالاتىن سالتاناتتى جيىنعا جينالىپ وتىرعانىن جەتكىزىپ, «سىزدەر ۇلكەن ومىرگە قادام باسقالى تۇرسىزدار. بۇگىن – اتا-انالار, ستۋدەنتتەر, وقىتۋشىلار ءۇشىن مەرەيلى مەرەكە. بارشاڭىزدى وسى تابىسپەن قۇتتىقتايمىن!» دەدى. ەلباسىنىڭ ايتۋىنشا, نۋ – ەلىمىزدىڭ ءبىلىم بەرۋ جۇيەسىندەگى بىرەگەي جوبا. بۇل رەسپۋبليكاداعى بارلىق جوعارى وقۋ ورىندارىنا ۇلگى بولۋى كەرەك. سونداي-اق نۇرسۇلتان نازارباەۆ ستۋدەنتتەردىڭ عىلىمي-زەرتتەۋ جۇمىسىنىڭ ءناتيجەلەرى ءجانە قول جەتكىزگەن جەتىستىكتەرىن اتاپ ءوتتى.
– بىلتىر عىلىم جانە تەحنولوگيا مەكتەبىنىڭ ستۋدەنتتىك كومانداسى بوستوندا وتكەن iGEM گەندىك-ينجەنەرلىك ماشينالار حالىقارالىق بايقاۋىندا التىن مەدال جەڭىپ الدى. عىلىمي ازىرلەمەلەردى كوممەرتسيالاندىرۋعا قاتىستى iGEM جوباسىن اتاپ وتۋگە بولادى, – دەدى قازاقستاننىڭ تۇڭعىش پرەزيدەنتى.
ەلباسى ۋنيۆەرسيتەتتىڭ جوعارى بىلىكتى جانە باسەكەگە قابىلەتتى كادرلارى قازاقستاننىڭ جوعارى تەحنولوگيالى يندۋسترياسىن دامىتۋعا زور ۇلەس قوسىپ وتىرعانىن ايتتى. – 2019 جىل جاستار جىلى بولىپ جاريالاندى. جاستار – ەلىمىزدىڭ قازىرگى الەمدەگى باسەكەگە قابىلەتتىلىگىنىڭ نەگىزگى فاكتورى. قازاقستاننىڭ بولاشاعى سىزدەرگە, سىزدەردىڭ بىلىمدەرىڭىزگە, كۇش-قۋاتتارىڭىز بەن پاتريوتتىق سەزىمدەرىڭىزگە بايلانىستى. سىزدەر ءوز الەۋەتتەرىڭىز مەن ءمۇمكىندىكتەرىڭىزدى تولىق ىسكە اسىرۋ ءۇشىن ءبىز بارلىق جاعدايدى جاساپ وتىرمىز, – دەدى نۇرسۇلتان نازارباەۆ.قازاقستاننىڭ تۇڭعىش پرەزيدەنتى «NU – نازارباەۆ ۋنيۆەرسيتەت» برەندى الەمدىك اكادەميالىق ورتادا عانا ەمەس, سونىمەن قاتار مەملەكەتتىك باسقارۋ, بيزنەس, مەديتسينا, يننوۆاتسيا, ءىت-تەحنولوگيا سالاسىندا كەڭىنەن تانىمال بولعانىن جەتكىزدى.
– بۇل باستاما قازاقستاندا عانا ەمەس, سونداي-اق بۇكىل پوستكەڭەستىك كەڭىستىكتە وزىق جوباعا اينالىپ, ءوز سالاسىندا كوش باستادى. ۋنيۆەرسيتەت قىسقا مەرزىم ىشىندە جوعارى بىلىكتى كاسىبي كادرلار دايىندايتىن, سونداي-اق وتاندىق عىلىمي زەرتتەۋلەر مەن ازىرلەمەلەردى دامىتاتىن ەلىمىزدىڭ بەدەلدى وقۋ ورنى رەتىندە قالىپتاستى. ءبىلىم ورداسىنىڭ باستى اكتيۆى – ونىڭ زياتكەرلىك الەۋەتى سانالاتىن ادامدار – وقىتۋشىلار, ستۋدەنتتەر, باسقارۋشى پەرسونال, – دەدى ەلباسى.
نۇرسۇلتان نازارباەۆ تۇلەكتەردى ەلىمىز بەن قوعامىمىزدى دامىتۋ ىسىنە بەلسەنە اتسالىسۋعا شاقىردى.
– سىزدەر جوعارى بىلىكتى ماماندار عانا ەمەس, سونداي-اق ازاماتتىق جاۋاپكەرشىلىكتى سەزىنەتىن قوعامنىڭ بەلسەندى ءمۇشەلەرى بولۋلارىڭىز كەرەك. وقۋدى ودان ءارى جالعاستىرۋ, ەل يگىلىگى ءۇشىن ەڭبەك ەتۋ, قازاقستاننىڭ اتىنان شەتەلدە بولۋ نەمەسە ءوز ءىسىڭىزدى باستاۋ سياقتى قانداي دا ءبىر جولدى تاڭداساڭىزدار دا ءسىزدەرگە اق جول تىلەيمىن, جوسپارلارىڭىز تابىستى ىسكە اسا بەرسىن, – دەدى قازاقستاننىڭ تۇڭعىش پرەزيدەنتى.
ەلباسى قۇتتىقتاۋ ءسوزىن: «جەر بەتىندە ءبىزدىڭ جالعىز وتانىمىز بار. ول – قازاقستان.
سوندىقتان بۇگىنگى تۇلەكتەردىڭ ءار سالادا جەمىستى جۇمىس ىستەپ, ەل يگىلىگى ءۇشىن ەڭبەك ەتەرىنە سەنەمىن!», دەپ ءتۇيىندەدى.
ن.نازارباەۆ قۇتتىقتاۋدان كەيىن ەڭ ۇزدىك اكادەميالىق ۇلگەرىم كورسەتكەن تۇلەكتەرگە ءوز قولىمەن ديپلوم تابىستادى. ال بىتىرۋشىلەر ءوز كەزەگىندە ەلباسىنا, ۋنيۆەرسيتەت باسشىلىعى مەن وقىتۋشىلارىنا قازاقستاندا ساپالى ءبىلىم مەن حالىقارالىق دارەجەدە ديپلوم العانىنا العىس ايتتى.
بۇدان كەيىن ن.نازارباەۆ ۋنيۆەرسيتەتتەگى جاڭادان اشىلعان اتلەتيكالىق ورتالىقتا بولدى. بۇل – جالپى اۋدانى 19 000 شارشى مەتردى قۇرايتىن, 660 كورەرمەنگە ارنالعان وليمپيادالىق باسسەين جانە پاركەتتىك ارەناسى بار كوپ فۋنكتسيونالدى سپورت عيماراتى. ورتالىقتا سكۆوش-كورت, جەكپە-جەك زالى, جاتتىعۋ زالى, سەمسەرلەسۋ ايماعى, كافەتەريلەر مەن وفيستىك ءۇي-جايلار بار. ايتا كەتەيىك, نىساننىڭ ينفراقۇرىلىمى مۇمكىندىگى شەكتەۋلى ادامدارعا كەدەرگىسىز كەڭىستىك سىيلايدى. ورتالىق نۋ ستۋدەنتتەرىن سالاماتتى ءومىر سالتىن ۇستانىپ, سپورتتى ومىرلىك سەرىك ەتۋىنە جاعداي جاساۋ ماقساتىندا بوي كوتەرگەن.
العاش رەت 2015 جىلى ۋنيۆەرسيتەتتەن 522 تۇلەك قانات قاققان ەدى, بىتىرۋشىلەر سانى بيىل ەكى ەسەدەي كوپ. بيىلعى تۇلەكتەردىڭ 565-ءسى باكالاۆر, 378-ءى ماگيستر, 6-ۋى دوكتورانت جانە 14-ءى مەديتسينا دوكتورى دارەجەسىن الدى. باكالاۆريات ستۋدەنتتەرىنىڭ باسىم بولىگى (270) عىلىم جانە تەحنولوگيالار, ينجەنەريا (225) سالاسىن, قالعان 168 تۇلەك گۋمانيتارلىق جانە الەۋمەتتىك عىلىمدار مەكتەبىن ءتامامدادى. ماگيسترلەر اراسىندا بيزنەس, ءبىلىم بەرۋ, مەملەكەتتىك ساياسات, ينجەنەريا, عىلىم جانە تەحنولوگيالار, گۋمانيتارلىق جانە الەۋمەتتىك عىلىمدار, مەديتسينا سالاسىن بىتىرۋشىلەر بار.
بيىلعى ماگيستراتۋرانى اياقتاعانداردىڭ اراسىندا العاش رەت تاۋ-كەن ينجينيرينگ سالاسىنداعى بولاشاق ماماندار دايىندالعان. ال دوكتورانتتاردىڭ 3-ەۋى ءبىلىم بەرۋ جانە 3-ەۋى ينجەنەريا سالاسىن بىتىرگەن.
نۋ ستۋدەنتتەرىن دايارلاۋعا اقش, ۇلىبريتانيا, كانادا, گرەكيا, يتاليا, وڭتۇستىك كورەيا, رەسەي, اۋستراليا, تۇركيا جانە ءۇندىستان ەلدەرىنىڭ ۇزدىك ۇلتتىق جانە حالىقارالىق زەرتتەۋشىلەرى جۇمىسقا شاقىرىلعان. وقىتۋشى-پروفەسسورلار مەن عىلىمي قىزمەتكەرلەردىڭ 74 پايىزى (477 ادام) الەمنىڭ 53 ەلىنەن كەلگەن, ال 26 پايىزى – ۇلتتىق كادرلار.
شىرىن باتتالوۆا قارجى سالاسى بويىنشا ماگيستراتۋرانى وقىپ شىقتى. ول ۋنيۆەرسيتەتكە ءتۇسۋ دە, وقۋ دا وڭاي ەمەسىن ايتادى. «وقۋ ورنىنا قابىلداۋ كەزىندە ۇلكەن ىرىكتەۋدەن وتتىك. مۇنداعى ستۋدەنتتەردىڭ ءاربىرى – بىلىكتى, ءبىلىمدى, ناعىز ۇزدىكتەر. ولارمەن بىرگە وقىعانىما ماقتانامىن. ءبىز – قارجى سالاسىن بىتىرگەن العاشقى ماگيسترانتتارمىز. سوندىقتان بىزگە ارتىلاتىن جاۋاپكەرشىلىك تە جوعارى», دەيدى شىرىن. ونىڭ ايتۋىنشا, قازىردىڭ وزىندە بىرنەشە مەكەمەدەن, سونىڭ ىشىندە ۇلتتىق بانكتەن جۇمىسقا شاقىرتۋ تۇسكەن. ماگيستر-قارجىگەر ەلىمىزدىڭ ينتەرنەت بانكينگىن دامىتۋعا ۇلەس قوسۋدى ماقسات ەتەدى. «ەلەكتروندى ۇكىمەت پورتالى سەكىلدى بانكتەردى ءبىر جۇيەگە بىرىكتىرىپ, تسيفرلى جاعدايىن جاقسارتۋدى قالايمىن. سول باعىتتا عىلىم مەن تاجىريبەدە ەلەۋلى جەتىستىكتەرگە قول جەتكىزگەن وتاندىق جانە شەتەلدىك پروفەسسورلاردان ءتالىم الدىم», دەيدى ول.
تۇلەكتەردى ەليزابەت تۇرسىنباەۆا, يۋليا گالىشەۆا, قاراقات ءابىلدينا, دينارا ءسادۋاقاسوۆا, الەكساندر ۆينوكۋروۆ, سەرىك ساپيەۆ, ەرجان ماكسيم سىندى سپورت پەن ونەر سالاسىنىڭ بەلگىلى وكىلدەرى قۇتتىقتادى. ولار ۆيدەو جولداۋ ارقىلى بىتىرۋشىلەردى ەلگە ەڭبەك ەتۋگە شاقىردى.