وقۋشىلار سارايىنىڭ سالىنۋىنا ەلباسى – تۇڭعىش پرەزيدەنت نۇرسۇلتان ءابىش ۇلى نازارباەۆتىڭ بىلتىر قاراعاندىعا جۇمىس ساپارىمەن كەلگەندە بەرگەن تاپسىرماسىنىڭ تۇرتكى بولعانىن مىندەتتى تۇردە ايتا كەتكەن ءجون.
قۇرىلىس باسىنداعى سالتاناتتى ءراسىم بارىسىندا وبلىس اكىمى ەرلان قوشانوۆ بالالاردى قورعاۋ كۇنىندە ولارعا لايىقتى تارتۋ جاساۋدىڭ داستۇرگە اينالعانىن ريزاشىلىق سەزىمىمەن اتاپ ءوتتى.
– ەلباسىنىڭ تاپسىرماسى بويىنشا ءبىز قاراعاندىلىق بالالارعا كەڭ دە جارىق, قازىرگى زامانعا ساي وقۋشىلار سارايىن سىيعا تارتپاقپىز. بۇرىنعى ساراي وسىدان 80 جىل بۇرىن سالىنعان بولاتىن. وكىنىشكە قاراي, ول ءتيىستى تالاپتارعا جاۋاپ بەرمەيدى جانە وعان نيەت بىلدىرۋشىلەردىڭ بارلىعى سىيمايدى دا, – دەدى وبلىس باسشىسى.
كاپسۋلانى سالۋ راسىمىنە قاتىسۋشىلار قاراعاندىلىق وقۋشىلاردىڭ قولونەر بۇيىمدارى مەن ونەرتابىستارىنىڭ كورمەسىن تاماشالاۋعا مۇمكىندىك الدى. سونداي-اق, كورمەدە اۆيامودەل قۇراستىرۋ ۇيىرمەسىنىڭ قاتىسۋشىلارى جاساعان ۇشاقتار دا كورەرمەن نازارىنا ۇسىنىلدى.
قاراعاندى قالالىق ءبىلىم ءبولىمىنىڭ باسشىسى گۇلسىم قوجاحمەتوۆانىڭ ايتۋىنشا, وقۋشىلاردىڭ جاڭا سارايىندا بارلىق ساباقتار مەن دارىستەر تەگىن بولادى ەكەن.
– وقۋشىلار سارايىنداعى ۇيىرمەلەرگە 4 مىڭنان استام بالا قاتىسۋعا مۇمكىندىك الادى. روبوت تەحنيكاسى, باعدارلامالاۋ جانە اۆيامودەل قۇراستىرۋ سياقتى 50-دەن استام تەحنيكالىق باعىتتاعى ۇيىرمەلەردى ۇيىمداستىرۋ جوسپارلانعان. سونىمەن قاتار, ءبىز بالالارعا زاماناۋي تەحنولوگيالاردى – گيدروپونيكا مەن اەروپونيكانى پايدالانۋدى ۇيرەتەتىن بولامىز. مۇنىڭ ماڭىزى زور جانە قازىرگى ۋاقىتتا ولاردىڭ بالالارعا وتە قىزىقتى دارىستەر ەكەنىن ەسكەرۋ كەرەك. گۋمانيتارلىق جانە شىعارماشىلىق باعىتتى قالايتىندار ءۇشىن مۇندا ۇيىرمەلەر, شەبەرحانالار, حورەوگرافيالىق جانە كوۆوركينگ زالدارى جۇمىس ىستەيتىن بولادى, – دەيدى گ.قوجاحمەتوۆا.
قاراعاندىنىڭ وڭتۇستىك-شىعىس شاعىن اۋدانىنداعى «دوستىق ءۇيى» عيماراتى ورنالاسقان اۋماقتا بوي كوتەرەتىن وقۋشىلار سارايىنىڭ قۇرىلىسى 2020 جىلدىڭ قاراشا ايىندا اياقتالادى دەپ جوسپارلانعان. ءۇش قاباتتى زاماناۋي نىساننىڭ الاتىن جەر كولەمى شامامەن 10 مىڭ شارشى مەتردى قۇرايتىن بولادى. عيماراتتىڭ سىرتى ەنەرگيا ۇنەمدەيتىن ماتەريالدارمەن قاپتالادى.
***
جالپى, قاراعاندى قالاسىندا حالىقارالىق بالالاردى قورعاۋ كۇنى مەرەكەسى كەڭىنەن اتالىپ ءوتتى. بۇل كۇنى مەرەكەلىك ويىن-ساۋىق شارالارىنىڭ باسىم بولىگى ورتالىق مادەنيەت جانە دەمالىس ساياباعىندا ۇيىمداستىرىلدى. بالالار ءۇشىن مۇندا «روماشكا», «شولۋ دوڭگەلەگى», «توسىن سىي» سىندى اتراكتسيون تۇرلەرى تەگىن قىزمەت ەتتى. بالالارعا ارنالعان تەمىر جولمەن جۇيتكىگەن پويىزعا ءمىنىپ, ساياحات قۇرعىسى كەلگەن بالاقايلاردىڭ دا قاراسى مول بولدى. سونىمەن قاتار, ساياباقتا بالالار شىعارماشىلىعى ورتالىقتارىنىڭ فەستيۆالى ءوتتى. كاسكاد الاڭىندا بۇرىم ءورۋ, قىنامەن سۋرەت سالۋ, اكۆاگريم, فوتوسۋرەت جانە ساندىك-قولدانبالى ونەر بويىنشا شەبەرلىك دارىستەرى ۇيىمداستىرىلادى.
بۇدان بولەك, ساياباق اۋماعىندا مەنتالدى اريفمەتيكا, مەكتەپكە دەيىنگى دامۋ جانە وريگامي بويىنشا ساباقتار ءوتتى. بالالارعا بويى سەرەيگەن بيىك قۋىرشاقتار ءتاتتى-دامدىلەر تارتۋ ەتتى. ساياباقتىڭ تورىنەن ورىن تەپكەن ساحنادا قويىلعان ءتۇرلى تاقىرىپتاعى تەاترلاندىرىلعان كورىنىستەر كىشكەنتاي كورەرمەندەردى كەرەمەت اسەرگە بولەدى.
سونداي-اق, جاڭا مايقۇدىق مادەنيەت ۇيىندە مەرەكەگە ارناپ وتكىزىلگەن كونتسەرتتىك باعدارلامانىڭ الۋان ءتۇرلى تاقىرىپتى قامتىعان قويىلىمدارى بۇلدىرشىندەردى مول قۋانىشقا بولەدى. سالتاناتتى شارادان سوڭ بالالاردىڭ قولونەر جارمەڭكەسى ۇيىمداستىرىلدى. ودان كەيىن بولعان ەستافەتا, قۋىرشاقتار مەن ەرتەگى كەيىپكەرلەرى ويىن باعدارلاماسى بالالارعا ايتىپ جەتكىزگىسىز مەرەكەلىك كوڭىل كۇي سىيلادى.