كەشە اقتاۋ قالاسىندا تەڭىز جاعالاۋىندا FIA حالىقارالىق اۆتوموبيل فەدەراتسياسىنىڭ «راللي قازاقستان 2019» راللي-رەيدتەر بويىنشا الەم كۋبوگى كەزەڭىنىڭ سالتاناتتى مارەسى ءوتتى. شيەلەنىسكە تولى التى جارىس كۇنىنىڭ قورىتىندىسى بويىنشا كاتارلىق اۆتوشاباندوز ناسسەر ءال-اتتيا شتۋرمانى ماتە بومەلمەن بىرگە جەڭىس تويىن تويلادى, ەكىنشى ورىندى ەرلى-زايىپتى ستەفان مەن اندرەا پەتەرانسەلدەردىڭ ەكيپاجى يەلەنسە, ۇزدىك ۇشتىكتى ياكۋب پشيگونسكي مەن تيمو گوتتشالك تۇيىندەدى.
راللي-رەيد ماڭعىستاۋ وبلىسىنىڭ اۋماعىندا 27 مامىر مەن 1 ماۋسىم ارالىعىندا ءوتتى. «راللي قازاقستان 2019» جارىس باعىتى التى كەزەڭگە ءبولىندى جانە شاباندوزدار دالا جولدارى, قۇم جوتالارى جانە جولسىزبەن بارلىعى 2500 كيلومەتردەن استام قاشىقتىقتى باعىندىردى.
«راللي قازاقستان 2019»-دا بارلىعى الەمنىڭ 17 ەلىنەن (بەلگيا, برازيليا, گەرمانيا, كاتار, يسپانيا, يتاليا, نيدەرلاندى, پورتۋگاليا, رەسەي, ساۋد ارابياسى, سلوۆاكيا, تۇركمەنستان, چەحيا, چيلي, فرانتسيا) 28 ەكيپاج باق سىنادى. جارىسقا قازاقستان اتىنان 3 سپورت ەكيپاجى قاتىستى.