قالا جۇرتشىلىعىنىڭ, قوعامدىق ۇيىم وكىلدەرىنىڭ قاتىسۋىمەن وتكەن عاسىردىڭ وتىزىنشى جىلدارى جازىقسىز جاپا شەككەندەردىڭ قۇرمەتىنە ارنالعان ەسكەرتكىش مونۋمەنتكە گۇل شوقتارى قويىلدى.
قارالى ميتينگىدە ايماق باسشىسىنىڭ ورىنباسارى رۋسلان الىشەۆ, «پاميات» قوعامدىق قورىنىڭ توراعاسى بولات ساعىندىقوۆ, «باربۋنگ» تۇرىك ەتنومادەني بىرلەستىگىنىڭ جەتەكشىسى راشيد ناديروۆ, تاعى باسقالارى سويلەپ, ستاليندىك زۇلمات كەزىندە قىرشىنىنان قيىلعان, يتجەككەنگە ايدالعان, اتۋ جازاسى سەكىلدى اۋىر ايىپتار تاعىلعان بوزداقتار جايلى تەبىرەنە اڭگىمەلەدى.
«1997 جىلدان بەرى ساياسي قۋعىن-سۇرگىن قۇرباندارىن ەسكە الۋ كۇنى جىل سايىن اتاپ وتىلەدى. وبلىس بويىنشا 7,6 مىڭعا جۋىق ادام تەپەرىش كورسە, 1500-دەيى شەيىت بولعان. ولاردىڭ قاتارىندا مەنىڭ اكەم دە اتۋ جازاسىنا كەسىلگەن. سۇيەگىنىڭ قايدا قالعانى بەلگىسىز», دەيدى بولات اعا.
جۇرتشىلىق م. جۇماباەۆتىڭ ەسكەرتكىشىنە دە تاعزىم ەتىپ, گۇل شوقتارىن قويدى.
سولتۇستىك قازاقستان مەملەكەتتىك مۇراعاتىندا «ماڭگىلىك مۇڭ–شەرلى شەمەن" اتتى كورمە ۇيىمداستىرىلدى. كورمەگە قاتىسۋشىلار جاپپاي ساياسي قۋعىن-سۇرگىننەن زارداپ شەككەن سولتۇستىكقازاقستاندىقتاردىڭ قيلى تاعدىرىنان مۇڭلى سىر شەرتەتىن قۇجاتتارمەن جان-جاقتى تانىستى. ماسەلەن, م. جۇماباەۆتىڭ تولقۇجاتتارى مەن جاۋاپ حاتتارى,وبكوم قىزمەتكەرلەرىنىڭ ءتىزىمى, قازاقستانعا جەر اۋدارىلعان حالىقتىڭ دياگرامماسى سياقتى قۇندى قۇجاتتار قويىلدى.
مۇراعاتشى زامزاگۇل زاكيرينانىڭ ايتۋىنشا, ماسكەۋ مۇراعاتىنان دا قۋعىن-سۇرگىنگە ۇشىراعانداردىڭ تاريحىنا, ومىرىنە, قىزمەتىنە قاتىستى كوپتەگەن قۇجاتتار اكەلىنىپتى.