تاراز قالاسىنىڭ «قاراسۋ 5» شاعىن اۋدانىنداعى بەس قاباتتى تۇرعىن ءۇي ورتەندى. بۇل تۋرالى وبلىستىق توتەنشە جاعدايلار دەپارتامەنتىنىڭ ءباسپاسوز قىزمەتى حابارلادى.
تۇرعىندار دەرەۋ ەۆاكۋاتسيالاندى. قازىر وقيعا ورنى وقشاۋلانىپ, ءورت ءسوندىرۋ قىزمەتىنىڭ ماماندارى ارنايى تەحنيكامەن جۇمىس ىستەپ جاتىر.
اقپاراتقا سايكەس, ساعات 19:30-دا تاراز قالاسى «قاراسۋ 5» شاعىن اۋدانىنداعى №18 ءۇيدىڭ شاتىرىندا ءورت شىققان. تجد ءورت ءسوندىرۋ جانە اۆاريالىق قۇتقارۋ جۇمىستارى قىزمەتىنە 19:34-تە قوڭىراۋ كەلىپ ءتۇستى. ءورتتى سوندىرۋگە 14 تەحنيكا, 62 ءورت ءسوندىرۋ قىزمەتىنىڭ مامانى جۇمىلدىرىلدى. 171 ادام قاۋىپسىز جەرگە كوشىرىلدى, ونىڭ 42-ءى بالا. كەشكى ساعات 20:50-دە ءورتتىڭ وزگە ايماقتارعا قاۋىپ ءتوندىرۋى توقتاتىلىپ, ساعات 22:11 ءسوندىرىلدى.
ايماق باسشىلارىنىڭ ايتۋىنشا, ەندى ارنايى كوميسسيا قۇرىلىپ تولىق زەرتتەۋ جۇمىستارىن جۇرگىزەدى. بۇل ءۇي 2014 جىلى جاڭعىرتۋ باعدارلاماسى بويىنشا جوندەۋدەن وتكەن ەكەن.