ەسكە الۋ جيىنى بارىسىندا ماموچكينو قورىمىنىڭ اۋماعىن اباتتاندىرۋ جۇمىستارىنىڭ جوسپارى جانە ول جەردە بوي كوتەرەتىن مەموريالدىق كەشەننىڭ جوباسى تانىستىرىلدى.
– ساۋلەتشىلەر قايرات جيەنباەۆ, يۋليا لي جانە ءمۇسىنشى تاراس كيشكارەۆ قۇرامىنا ەنگەن شىعارماشىلىق توپ بۇل جوبانى ازىرلەۋگە بىرنەشە جىلدى سارپ ەتتىك. جالپى, زيراتتى قايتا قۇرۋ يدەياسى بۇرىن دا كوتەرىلگەن ەدى, ونىڭ ۇستىنە جەرگىلىكتى تۇرعىندار دا بۇل تۋرالى كوپتەن بەرى ايتىپ جۇرگەن بولاتىن. ال وتكەن جىلى وبلىس اكىمدىگى تاراپىنان ماموچكينو زيراتىن رەتكە كەلتىرۋ جونىندە تاپسىرما بەرىلگەن سوڭ جۇمىستىڭ العا باسقان ءتۇرى بار, – دەيدى سۋرەتشى, جوبا اۆتورلارىنىڭ ءبىرى يگور باگراموۆ.
جوسپار بويىنشا جاڭعىرتۋ جۇمىستارىنان كەيىن زيراتتاعى توزىعى جەتكەن تەمىر قاقپانىڭ ورىنىن جاڭا مازمۇنداعى كىرەبەرىس باسادى. ياعني, ونىڭ ورتا تۇسىندا «انا قايعىسى» مونۋمەنتى ورنالاساتىن بولادى. ەكى قولىمەن بەتىن باسىپ جىلاپ وتىرعان قايعىلى ايەلدىڭ ءمۇسىنىن جان-جاعىنان تىكەنەك سىممەن شاڭدىلعان دار اعاشىنا ۇقساس ءۇش باعان قورشاپ تۇرادى. ال باعانداردىڭ باسىندا اق تاستان جاسالعان كوگەرشىندەر قوناقتاپ وتىرادى. ءمۇسىن اۆتورلارى مۇنى جەر بەتىنەن ۇشىپ كەتسە دە, اناسىن قيا الماي جۇرگەن بەيكۇنا سابيلەر رۋحىنىڭ بەلگىسى دەپ ءتۇسىندىردى.
بۇدان بولەك, زيرات جانىندا ءمىناجات ءۇيى سالىنباقشى. وندا ءداستۇرلى ءۇش كونفەسسيانىڭ – مۇسىلماندار, پراۆوسلاۆيە جانە كاتوليكتەردىڭ رامىزدەرى بار ءۇش كىرەبەرىس بولادى. ءمىناجات ءۇيىنىڭ ءىشى ءۇش بولەك بولمەدەن تۇرادى: ولاردىڭ ارقايسىسى ءدىني كانوندارعا سايكەس راسىمدەلەدى. ماسەلەن, ءبىر قابىرعادا قۇران تۇرسا, قالعان ەكەۋىنە يكونالار ورناتىلادى. ءمىناجات ۇيىنە ءۇش جاعىنان دا كىرۋگە بولادى.
سونىمەن قاتار, ماموچكينو زيراتىنىڭ اۋماعى تولىقتاي اباتتاندىرىلادى. كەلۋشىلەرگە قولايلى بولۋ ءۇشىن كىرمە جول توسەلىپ, مەموريالدىق كەشەن ماڭىنا ورىندىقتار, قوقىسقا ارنالعان جاشىكتەر جانە باعانشامدار ورناتىلادى. اتالعان جۇمىستار اياقتالعاننان كەيىن ماموچكينو مەموريالدىق كەشەنى دولينكاداعى ساياسي قۋعىن-سۇرگىن قۇرباندارىنا ارنالعان مۇراجايدىڭ قاراماعىنا بەرىلەدى.
ەسكە سالساق, ماموچكينو زيراتىنا 1930-40 جىلدار ارالىعىندا ساياسي قۋعىن-سۇرگىنگە ۇشىراعاندارعا ارنالعان اتىشۋلى قارلاگتىڭ ءتۇرلى اۋرۋ مەن اشتىقتان كوز جۇمعان تۇتقىندارى جانە ولاردىڭ بالالارى جەرلەگەن.