ەلباسىنىڭ العاشقى ءباسپاسوز قاتشىسى, كورنەكتى ءرامىزتانۋشى, بەلگىلى قالامگەر ءھام جۋرناليست ە.شايمەردەنوۆ مەملەكەتشىل مىنەزىمەن, قايراتكەرلىك قاسيەتىمەن ءوز تۇعىرىن قالاپ كەتكەن ەرەن تۇلعا. ەلىن سۇيگەن, حالقىنىڭ مادەنيەتى مەن ءتىلىن ۇلىقتاپ وتكەن تۇلعانى ماڭگى ەستە قالدىرۋداعى تاعى ءبىر ماقساتتى قادام – ءوزى وقىعان ءال-فارابي اتىنداعى قازاق ۇلتتىق ۋنيۆەرسيتەتىنىڭ جۋرناليستيكا فاكۋلتەتىندە ەربول شايمەردەنوۆ اتىنداعى اۋديتوريا سالتاناتتى تۇردە اشىلدى.
زاماناۋي قۇرالدارمەن جابدىقتالعان اۋديتوريانىڭ لەنتاسىن ءال-فارابي اتىنداعى قازۇۋ-ءنىڭ رەكتورى, اكادەميك عالىمقايىر مۇتانوۆ پەن اقىن, مەملەكەتتىك سىيلىقتىڭ لاۋرەاتى نۇرلان ورازالين قيدى. رەكتور ع.مۇتانوۆ ءوز سوزىندە: «ەربول شايمەردەنوۆ سالماقتى مىنەزىنە جانىنىڭ جايساڭدىعى جاراسقان ازامات ەدى. قازاقستاننىڭ ءتورت تۇكپىرىنىڭ جاقسىلارى ونىڭ جاقىنى بولدى. ول كىسىمەن بۇكىل تۇركيانى بىرگە ارالاپ, ساپارلاس بولعان كۇندەرىم ءالى كۇنگە جادىمدا جاڭعىرىپ تۇرادى. اسىرەسە ادامعا ەرەكشە اسەر قالدىراتىن قاسيەتى – ول كىسىنىڭ مەملەكەتشىلدىگى ەدى. نە جازسا دا, كىممەن سۇحبات قۇرسا دا, الدىمەن مەملەكەتتىك تۇرعىدان ويلايتىن تەرەڭ ويلى, كەڭ جۇرەكتى ازاماتتىعىن بايقاماۋ, باعالاماۋ مۇمكىن ەمەس. سوندىقتان ەربول سەكىلدى تۇلعالاردى جاستارىمىزعا ۇلگى ەتىپ, ونەگە تۇتۋ ماقساتىندا ءوزى ءبىلىم العان جۋرناليستيكا فاكۋلتەتىنەن ارنايى اۋديتوريانى اشىپ وتىرمىز. ءبىزدىڭ ماقساتىمىز بولاشاققا بىلىكتى ماماندار تاربيەلەپ قوسۋ بولسا, وسى اۋديتوريانىڭ قابىرعاسىندا وركەنيەتكە ۇمتىلعان ەلدىڭ قاتارىنان قالماۋعا ۇمتىلعان, بىلىمگە قۇشتار جاستارىمىزعا قايراتكەر ازاماتتىڭ ماعىناعا تولى ءومىر جولى ءوز تاعىلىمىن بەرەدى دەپ سەنەمىز» دەدى.
كەڭ ءارى جارىق, جاڭا اۋديتوريانىڭ جابدىقتالۋىنا ە.شايمەردەنوۆتىڭ وتباسىسى ۇلكەن كومەك كورسەتكەن. «ەربول شايمەردەنوۆ كىم بولدى؟ ەل رۋحانياتى الدىندا قانداي ەڭبەگى بار؟» دەگەن سۇراققا تولىقتاي جاۋاپ بەرەتىن, تاقىرىپتارعا بولىنگەن قابىرعا مالىمەتى اسا مول. اۋديتوريادا قايراتكەردىڭ بالالىق شاعىنان باستاپ ستۋدەنتتىك ءومىرى, جۋرناليستىك قالىپتاسۋ جىلدارى, اقىندىق قىرى, قايراتكەرلىك كەلبەتى, رامىزتانۋشىلىعى, اۋدارماشىلىعى تۇتاس كورىنىس تاپقان.
جيىندا ەربول شايمەردەنوۆپەن بىرگە قىزمەت ىستەپ, ومىردەگى ساۋلەلى ساتتەرىن بىرگە بولىسكەن ارىپتەس اعالارى مەن زامانداستارىنىڭ ەستەلىگى, نەگىزىنەن, ءبىر ارناعا توعىسىپ جاتتى. تالعامى بيىك, تولعامى تەرەڭ ە.شايمەردەنوۆتىڭ قاي باعىتتا قىزمەت ەتسە دە, ءوز ىسىنە جاۋاپكەرشىلىكپەن قاراپ, ۇقىپتىلىقپەن اتقارعانىن سۇيسىنە دە, ساعىنا دا ەسكە الدى. بەلگىلى اقىن ن.ورازالين ونىڭ اقىن رەتىندە ەرتە كوزگە تۇسكەنىن, «پيونەر» جۋرنالىندا قىزمەت اتقارىپ جۇرگەندە, مەكتەپ وقۋشىسى بولىپ جۇرگەن ونىڭ العاشقى بالاۋسا ولەڭدەرىنە ءسات-ساپار تىلەگەنىن, قايىڭدار ەلىنەن شىققان شايمەردەنوۆتىڭ قازاق پوەزياسىنىڭ قابىرعالى شايىرى بولىپ قالىپتاسۋىنا دەيىنگى شىعارماشىلىعىنىڭ ۇزدىكسىز ءوسۋ كەزەڭىندە بولعانىن اقىن باقىتىنا بالادى. بەلگىلى اقىن, مەملەكەتتىك سىيلىقتىڭ لاۋرەاتى نەسىپبەك ايت ۇلى «ەربول جاساعان ءۇش ەرلىك» دەپ, ونىڭ اۋدارما سالاسىندا جاساعان اكادەميالىق ەڭبەگىن, قالىڭ ورىس ورتاسىندا وسكەن بولاشاق قالامگەردىڭ قازاق ءتىلىنىڭ قايماعى مەن مايەگىن ءبىر ادامداي ءسىڭىرىپ, تاۋەلسىزدىكتىڭ العاشقى جىلدارىندا تىلگە دەگەن سول قۇرمەتى مەن جاناشىرلىعىن كۇرەسپەن جالعاستىرعانىن جانە ءبىزدىڭ قوعامداعى ءرامىزتانۋ ءىسىن عىلىم رەتىندە قالىپتاستارۋداعى ەڭبەگىن ايشىقتى مىسالدارمەن اتاپ ءوتتى. «ەربولعا اۋديتوريانىڭ قاجەتى شامالى, اۋديتوريا ەل ەرتەڭىنە جاۋاپتى جاستارىمىز ءۇشىن كەرەك», دەپ تۇيىندەدى ول ءوز ءسوزىن.
پارلامەنت ءماجىلىسىنىڭ دەپۋتاتتارى راحمان الشانوۆ مەن زاۋرە امانجولوۆا بولمىسى ەرەك تۇلعامەن ەتەنە جاقىن ارالاسقاندارىن ايتىپ, قايراتكەرلىك قىرى مەن جازۋشىلىق جولى تۋرالى جۇرەكجاردى لەبىزدەرىمەن ءبولىستى. ال بەلگىلى قالامگەر سماعۇل ەلۋبايدىڭ تەبىرەنىپ وتىرىپ ايتقان ەستەلىگى ءوز تاعدىرىن ەل مۇددەسىمەن ەسەلەگەن ەربول شايمەردەنوۆتى ۇمىتپاي, ۇلىقتاۋعا جيىلعان باسقوسۋدى تۇيىندەگەندەي بولدى. «ازاماتتىڭ باقىتى نەدە دەگەن سۇراق تۋار بولسا, ازاماتتىڭ ەڭ ءبىرىنشى باقىتى, ءوز ەلىنە قىزمەت ەتۋدەن باستالادى ەكەن. ءاربىر ۇل مەن قىز ءوز مىندەتى مەن پارىزىن لايىقتى اتقارا بىلسە, ۇلت وسال بولمايدى. ەكىنشى باقىتى, سول جاسالعان ەڭبەكتى, ەڭبەك سىڭىرگەن ازاماتتى ەلىنىڭ باعالاي ءبىلۋى. جان-جاقتى قىرىمەن ەرتە تانىلعان ەربول و باستان دانالىققا قۇشتار ەدى. ءوز ەلىنە ەربولداي ەڭبەك سىڭىرگەن ازاماتتاردىڭ اتى ماڭگى اتالىپ جۇرگەي, سوندا عانا حالىق ءوز قالپىنان بيىكتەي تۇسەدى. قازاقستان بيىكتەيدى».