مەملەكەت باسشىسىنىڭ اتىنا ءبىلىم جانە عىلىم ءمينيسترى جانسەيىت تۇيمەباەۆتان حات كەلىپ ءتۇستى, دەپ حابارلادى قازاقستان رەسپۋبليكاسى پرەزيدەنتىنىڭ ءباسپاسوز قىزمەتى.
وندا ۇستىمىزدەگى جىلدىڭ 11-12 ناۋرىزىندا بۋداپەشت (ۆەنگريا) جانە ۆەنا (اۆستريا) قالالارىندا بولىپ وتكەن بولون ۇدەرىسىنە قاتىسۋشى مەملەكەتتەر ءبىلىم مينيسترلەرىنىڭ ءىى فورۋمىندا قازاقستان رەسپۋبليكاسىنىڭ بولون پروتسەسىنە قاتىسۋ ماسەلەلەرى تالقىلانعانى حابارلانادى.
“قازاقستان رەسپۋبليكاسىنداعى جوعارى ءبىلىم رەفورمالارىنىڭ وڭ قورىتىندىلارىن اتاپ وتە كەلىپ, بولون پروتسەسىنە قاتىسۋشى 46 ەل قازاقستان رەسپۋبليكاسىنىڭ ەۋروپا جوعارى ءبىلىم ايماعىنا ەنۋىنە ءبىراۋىزدان داۋىس بەردى. قازاقستان – ەۋروپا ءبىلىم كەڭىستىگىنە تولىققاندى مۇشە بولۋ قۇرمەتىن يەلەنگەن تۇڭعىش ورتالىقازيالىق مەملەكەت”, – دەلىنەدى حاتتا.
مينيستر سونداي-اق, قازاقستاننىڭ بولون پروتسەسىنە قاتىسۋى قازاقستاندىق جوو-لارعا وتاندىق ءبىلىم بەرۋ باعدارلامالارى مەن وقۋ جوسپارلارىن ەۋروپالىق ستاندارتتارعا سايكەستەندىرۋگە مۇمكىندىك تۋعىزاتىنىن جازادى. دەمەك, قازاقستاننىڭ جوعارى ءبىلىم تۋرالى ديپلومدارى ەۋروپادا كونۆەرتتەلىپ, قازاقستاندىق جاس ماماندار وڭىردەگى كەز كەلگەن ەلدە جۇمىسقا تۇرۋ قۇقىنا يە بولادى.
“...حالىقارالىق ءبىلىم كەڭىستىگىنە قوزعالىستى جۇزەگە اسىرۋداعى باستى ماقسات – قازاقستاندىق جوعارى ءبىلىمدى الەمدىك ستاندارتتارعا سايكەستەندىرۋدى قامتاماسىز ەتۋ”, – دەلىنەدى حاتتىڭ قورىتىندىسىندا.