سەنبى, 5 قاڭتار 2013 7:43
ارالداردى قايتارۋدى تالاپ ەتتى
ارگەنتينا پرەزيدەنتى كريستينا فەرناندەس تە كيرشنەر حانىم بريتانيا گازەتتەرىندە حات جاريالادى. وندا ول ۇلىبريتانيادان فولكلەند ارالدارىن قايتارۋدى تالاپ ەتەدى. پرەزيدەنت ءوزىنىڭ تالابىن بىرىككەن ۇلتتار ۇيىمىنىڭ شەشىمىن ورىنداۋ قاجەتتىگىمەن تۇسىندىرەدى.
سەنبى, 5 قاڭتار 2013 7:43
ارالداردى قايتارۋدى تالاپ ەتتى
ارگەنتينا پرەزيدەنتى كريستينا فەرناندەس تە كيرشنەر حانىم بريتانيا گازەتتەرىندە حات جاريالادى. وندا ول ۇلىبريتانيادان فولكلەند ارالدارىن قايتارۋدى تالاپ ەتەدى. پرەزيدەنت ءوزىنىڭ تالابىن بىرىككەن ۇلتتار ۇيىمىنىڭ شەشىمىن ورىنداۋ قاجەتتىگىمەن تۇسىندىرەدى.
كيرشنەردىڭ بۇلاي سويلەيتىن ءجونى بار. 1960 جىلى بۇۇ ارنايى قارار قابىلداپ, وندا وتارلاۋ ساياساتىن ونىڭ كەز كەلگەن پىشىندەرى مەن كورىنىستەرىندە توقتاتۋ تۋرالى مالىمدەگەن ەدى. بۇعان قوسا, ارگەنتينا باسشىسى بۇۇ باس اسسامبلەياسىنىڭ 1965 جىلعى قارارىن قاپەرگە سالادى. وندا ەكى ەلدىڭ ماسەلەنى ۋشىقتىرماي, كەلىسسوز ارقىلى شەشۋلەرى تيىستىگى كولدەنەڭ تارتىلادى. ۇلىبريتانيا پرەمەرى دەۆيد كەمەرون پروبلەمانى ارال تۇرعىندارىنىڭ وزدەرى رەفەرەندۋم ارقىلى شەشسىن دەيدى.
چاۆەستىڭ دەنساۋلىعى ناشارلاي ءتۇستى
ۆەنەسۋەلا باسشىلىعى ەل پرەزيدەنتى ۋگو چاۆەستىڭ دەنساۋلىعى ناشارلاپ كەتكەنىن حابارلادى. ول كۋبادا ەمدەلىپ جاتقان بولاتىن. ەلدىڭ اقپارات مينيسترلىگى باسشىسىنىڭ مالىمدەمەسىندە چاۆەستىڭ ينفەكتسيا جۇقتىرۋىنا بايلانىستى جاعدايى اۋىرلاي تۇسكەنى ايتىلادى.
قازىرگى كەزدە پرەزيدەنت وكپەسى جاساندى جەلدەتۋ اپپاراتىنا قوسىلعان سىڭايلى. ال 58 جاستاعى چاۆەس وتكەن جىلدىڭ 11 جەلتوقسانىندا قاتەرلى ىسىك اۋرۋىنا بايلانىستى كۋبا استاناسى – گاۆانا كلينيكالارىنىڭ بىرىندە وتا جاساتقان بولاتىن. كەيبىر دەرەك كوزدەرى ۆەنەسۋەلا پرەزيدەنتى جاساندى كومادا جاتىر دەگەندى كولدەنەڭ تارتادى.
قىسقا قايىرىپ ايتقاندا:
اقش مەملەكەتتىك حاتشىسى حيللاري كلينتون اۋرۋحانادان شىقتى. ول وعان وتكەن جىلدىڭ 30 جەلتوقسانىندا ميى شايقالۋىنا بايلانىستى تۇسكەن بولاتىن. ح.كلينتون بۇگىندە 65 جاستا.
فرانتسيادا باسكىلەردىڭ ۇلتتىق «باتاسۋنا» پارتياسى ءوزىن-ءوزى تاراتىپ جىبەردى. كورشى يسپانيادا بۇل پارتيا ەتا-نىڭ ساياسي قاناتى بولىپ سانالادى جانە وعان 2003 جىلى تىيىم سالىنعان. ال ول فرانتسيادا قىزمەتىن جالعاستىرىپ كەلگەن-ءتىن.
پلاستيك ىدىستاردىڭ ەكولوگياعا زيانى تۋرالى از ايتىلىپ جۇرگەن جوق. ماسەلەن, اقش-تىڭ ماسساچۋسەتس شتاتىنداعى كونكورد قالاسىنىڭ تۇرعىندارى 1 قاڭتاردان باستاپ پلاستيك بوتەلكەگە قۇيىلاتىن سۋ ساۋداسىنا تىيىم سالۋعا قول جەتكىزدى.
اقش-تىڭ ورەگون شتاتىندا تۋريستىك اۆتوبۋس اپاتى سالدارىنان توعىز ادام وپات بولىپ, جىيرمادان استامى جارالاندى. وسىنداي جول-كولىك وقيعاسى رەسەيدىڭ ياروسلاۆل وبلىسىندا ورىن الدى. وندا ءۇش شەتەلدىك اۆتوكولىكتىڭ سوقتىعىسۋى سالدارىنان جەتى ادام قازا تاپتى.
جيىرما ءشيتتى جارىپ جىبەردى
يراكتا جانكەشتى جيىرما ءشيتتى جارىپ جىبەردى. وقيعا يراكتىڭ ورتالىق بولىگىندەگى ءال-مۋسايب قالاسىندا ورىن الدى. رولىندە جانكەشتى وتىرعان مينا قويىلعان اۆتوموبيل كىسى ىعى-جىعى اۆتوبۋس ستانساسىنا بارىپ سوعىلعان.
شيتتەر وزدەرى ءۇشىن قاسيەتتى سانالاتىن كەربالا قالاسىنان قايتىپ كەلە جاتقان كورىنەدى. ولار وندا يمام حۋسەيننىڭ قازا تاپقانىن ازا تۇتۋ اياقتالۋىنا بايلانىستى بارسا كەرەك. مۇحاممەد پايعامباردىڭ نەمەرەسى حۋسەين 680 جىلى كەربالاداعى سوعىستا قازا تاپقان ەكەن. وسى وقيعا شيزم مەن ءسۇننيزمنىڭ ىقتيمال ءبولىنۋ نۇكتەسى رەتىندە قاراستىرىلادى. كونفەسسياارالىق دۇردارازدىق سالدارىنان ەلدە جىل سايىن كوپتەگەن بەيبىت تۇرعىن قازا تابادى.
ون ءبىر ادام – لاڭكەستىك قۇربانى
سيريانىڭ استاناسى – داماسك قالاسىنداعى ماي قۇيۋ ستانساسىندا جاسالعان جارىلىس سالدارىنان كەم دەگەندە 11 ادام وپات بولىپ, 40-تان استامى جارالاندى. بۇل تۋرالى «رەيتەر» اگەنتتىگى حابارلادى.
جارىلىس سيريادا باسىم تۇراتىن كوپشىلىك – سۇننيتتەرمەن قاتار از كولەمدە ءومىر سۇرەتىن وزگە دە ءدىني ازشىلىقتار وكىلدەرى جينالعان جەردە جاسالعانى بەلگىلى بولىپ وتىر. ال بۇل ەلدە ازامات سوعىسى ءجۇرىپ جاتقالى كوپتەگەن ايدىڭ ءجۇزى بولدى. وسى ارالىقتا سيريادا قازا تاپقان ادامدار سانى 60 مىڭ ادامنان اسىپ كەتتى. بىراق سوعىستىڭ اياقتالار ءتۇرى كورىنبەيدى. ويتكەنى, تايتالاسۋشى تاراپتار مامىلەگە كەلە الار ەمەس.
نەمىستەردەن وتەماقى سۇراپ وتىر
2009 جىلى نەمىستەردىڭ اۆياسوققىسى سالدارىنان قازا تاپقان اۋعانستان ازاماتتارىنىڭ وتباسىلارى گەرمانيادان وتەماقى تالاپ ەتىپ وتىر. تۇتاستاي العاندا, برەمەن زاڭگەرلەرى 10 توپتىق ارىز تۇسكەنىن قۋاتتايدى.
اۆياسوققىنى جاساۋعا پولكوۆنيك كلياين بۇيرىق بەرىپتى. ول جانارماي اكەلە جاتقان جۇك كولىكتەرىنىڭ جانىندا كوپتەگەن بەيبىت تۇرعىندار بار ەكەنىنە قاراماستان وسىنداي بۇيرىق بەرۋدەن تانباعان. جارىلىس سالدارىنان 137 ادام قازا تاۋىپتى. ەندى ولاردىڭ وتباسىلارى گفر-دەن جالپى سوماسى 3,3 ملن. ەۋرو كولەمىندە وتەماقى تالاپ ەتىپ وتىر. ءار ادامعا كەلتىرىلگەن زاردابىنا بايلانىستى 30 مىڭ مەن 90 مىڭ ەۋرو ارالىعىندا وتەماقى سۇرالادى.
زەينەت جاسىنداعىلارعا ورىن جوق
تاجىكستاندا مەملەكەتتىك قۇرىلىمداردا جۇمىس ىستەيتىن زەينەتكەرلەردى جۇمىستان بوساتقان ءجون دەپ شەشىلدى. مۇنداي بۇيرىق رەسپۋبليكانىڭ پرەزيدەنت اپپاراتىنان تۇسكەن. ونى بەرگەن پرەزيدەنت اپپاراتىنىڭ باسشىسى باحتيەر حۋدوەروۆ ەكەن.
جوعارىدان كەلگەن حاتقا سايكەس, مەملەكەتتىك مەكەمە باسشىلارى وتكەن جىلدىڭ 25 جەلتوقسانىنان باستاپ, زەينەت جاسىنا جەتكەن ادامدارمەن ەڭبەك شارتىن توقتاتۋى ءتيىس. ال بۇل شارانىڭ ناتيجەسى تۋرالى باسشىلار 5 قاڭتارعا دەيىن ەسەپ بەرۋلەرى كەرەك كورىنەدى. حات مينيسترلىكتەر, باسقا دا مەملەكەتتىك مەكەمەلەر, وبلىس, اۋدان, قالا اكىمشىلىكتەرى باسشىلارىنا جىبەرىلگەن.
ينتەرنەت ماتەريالدارى نەگىزىندە ازىرلەندى.