ونىڭ اشىلۋ سالتاناتىنا بەلگىلى اكادەميك كەنجەعالي ساعاديەۆ, سەناتور, عالىم باقىتجان جۇماعۇلوۆ جانە عالىمنىڭ وتباسى, تۋىستارى, ستۋدەنتتەر, وقىتۋشىلار قاتىستى. ۋنيۆەرسيتەت پرورەكتورى گۇلۆيرا مۇسابەكوۆا عالىم اتىنداعى ستۋدەنتتەر ءدارىسحاناسىنىڭ اشىلۋى ءبىلىم ورداسى ستۋدەنتتەرى ءۇشىن ايىرىقشا وقيعا ەكەنىن ايتا وتىرىپ, عالىمنىڭ عىلىمي قىزمەتىنە توقتالىپ ءوتتى. ونىڭ ءبىلىم قۋعان ءار ستۋدەنت ومىرىنە تەمىرقازىق ەتىپ الاتىن ۇلگى ەكەنىن باسا ايتتى.
«ومىرزاق سۇلتانعازين الەمدىك ماتەماتيكا عىلىمىنىڭ دامۋىنا ۇلەس قوستى. عىلىمنىڭ جولى – قيا جول, ول اۋىر ەڭبەكتىڭ ناتيجەسى ەكەنى جۇرتقا ايان. ومىرزاق ماحمۇت ۇلى قازاق مەكتەبىن ءبىتىردى,ورىس تىلىمەن قاتار, اعىلشىن ءتىلىن ءوز بەتىمەن ۇيرەنىپ, سول ارقىلى ءوزىنىڭ ماتەماتيكا, فيزيكا عىلىمدارىنداعى ەڭبەگىن دۇنيەجۇزىلىك عالىمدار قاۋىمداستىعىنا الىپ شىقتى. ەگەمەن ەلىمىزدىڭ ەرتەڭى عىلىممەن, بىلىممەن تىعىز بايلانىستى. ءبىزدىڭ قوستاناي مەملەكەتتىك پەداگوگيكالىق ۋنيۆەرسيتەتى ءبىلىمدى ماماندار دايىندايدى. ومىرزاق سۇلتانعازين ەسىمىنىڭ ءبىزدىڭ ءبىلىم وردامىزعا بەرىلۋى زاڭدى دەپ بىلەمىز. ونىڭ ءومىرى مەن عىلىمداعى قىزمەتى ءبىزدىڭ ستۋدەنتتەرگە تاماشا ۇلگى. عالىمنىڭ ەسىمىن العالى ۋنيۆەرسيتەتتە كوپتەگەن جۇمىستار اتقارىلدى» دەدى گۇلۆيرا ايداربەكقىزى.
عالىمنىڭ جۇبايى رايحان عانيقىزى بەرگەن ماتەريالدار, سيرەك سۋرەتتەر ارقىلى ۋنيۆەرسيتەت ستۋدەنتتەرى ومىرزاق سۇلتانعازين تۋرالى ۆيدەوماتەريالدار, كورنەكى ماتەريالدار جاسادى. ونىڭ ومىرىمەن, قىزمەتىمەن تەرەڭ تانىستى. سالتاناتتا تاريح عىلىمدارىنىڭ دوكتورى, پروفەسسور امانجول كۇزەمباي ۇلى, عالىمنىڭ جۇبايى رايحان عانيقىزى, تاعى باسقالار دا ءسوز الىپ, ەستەلىكتەر ايتتى. بارلىعىنىڭ پىكىرى ەڭبەكتەرىن الەم ماتەماتيكتەرى مويىنداعان ءىرى عالىمنىڭ ءدارىسحاناسى ستۋدەنت جاستار ءۇشىن قاسيەتتى مەكەندەي ورىن بولۋى ءتيىس دەگەن ويعا توعىستى.
عالىم اتىنداعى جاڭا ءدارىسحانانىڭ اشىلۋىنا حالقىمىزدىڭ داستۇرىمەن شاشۋ شاشىلدى, ونەرلى ستۋدەنتتەر قۋانىشتى جىرمەن جەتكىزدى.
قوستاناي