تالدىقورعان قالاسىنداعى №19 مەكتەپ-گيمنازياسىندا وقىس وقيعا بولدى. كەشە مەكتەپ جانىنداعى شاعىن ورتالىقتىڭ ەكىنشى قاباتىنداعى اشىق قالعان تەرەزەدەن 2 جاستاعى تاربيەلەنۋشى قۇلاپ, ەس-ءتۇسسىز جاعدايدا وبلىستىق بالالار اۋرۋحاناسىنا جەتكىزىلگەن.
- 2 جاستاعى قىز بالا ءبىزدىڭ اۋرۋحاناعا كەشە, 15 مامىر كۇنى ساعات 12:30 «جەدەل جاردەممەن» جەتكىزىلدى. بالانىڭ جاعدايى وتە ناشار بولعاندىقتان بىردەن جانساقتاۋ بولىمىنە الىندى. ءبۇلدىرشىننىڭ باسىنا قاتتى زاقىم كەلگەن. قازىر دارىگەردىڭ باقىلاۋىمەن ارنايى تىنىس الۋ اپپاراتىندا جاتىر. ەسىن جيعان جوق, - دەدى ءسابيدىڭ دەنساۋلىعى جايىندا حابار بەرگەن وبلىستىق بالالار اۋرۋحاناسىنىڭ باس دارىگەرى مارات دوسقاليەۆ.
وبلىس پوليتسياسى وقيعا بويىنشا تەرگەۋ جۇمىستارىن باستادى. الدىن الا انىقتالعانداي, ءبۇلدىرشىننىڭ №19 مەكتەپ-گيمنازياسى جانىنداعى شاعىن ورتالىققا كەلگەنىنە كوپ ۋاقىت بولماعان. ءارى بالانىڭ اتا-اناسى دا وسى ءبىلىم بەرۋ مەكەمەسىندە ۇستازدىق ەتەدى ەكەن.
الماتى وبلىسى