ەسىل اۋدانىنداعى ج.قيزاتوۆ اتىنداعى اۋىل شارۋاشىلىق كوللەدجىندە ۇيىمداستىرىلعان جيىندا جاس ماماندارعا قاتىستى پروبلەمالارمەن قاتار ولاردى قوعامدىق ەڭبەككە باۋلۋ, ادامگەرشىلىك ىزگى قاسيەتتەرگە تاربيەلەۋ, ەلدى مەكەندەردە تۇراقتاندىرۋ,ەڭبەك جولىندا كەزدەسەتىن قيىندىقتاردى ەڭسەرۋ جايى كەڭىنەن ءسوز بولدى. اقمولا وبلىسى اۋىل شارۋاشىلىعى ءبولىمىنىڭ باس مامانى داۋلەت ىسقاقوۆ اۋىلدىق جەرلەردە مامان تاپشىلىعىن ازايتۋدىڭ جولدارىن ورتاعا سالدى.
«تۇرعىن ءۇي ساتىپ الۋ ءۇشىن بيۋدجەتتىك نەسيە كولەمىن 1500 اەك-تەن 2000 اەك-كە دەيىن ۇلعايتۋ كەرەك. ويتكەنى,نارىقتاعى باسپانالاردىڭ باعاسى قىمبات. ەكىنشىدەن, وندىرىستىك تاجىريبەگە قايتا ورالىپ, تالىمگەرلەر مەن كۋراتورلار تاعايىنداعان ءجون. جاسىراتىنى جوق, ءبىرسىپىرا ستۋدەنتتەر ەلىشىلىك, عالام جاڭالىقتارىنان حابارسىز», دەيدى ول.
ءى. ءداۋىتوۆ اتىنداعى قىزمەت كورسەتۋ سالاسى كوللەدجىنىڭ ستۋدەنتى سنەجانا بەل ءوز سوزىندە شالعايداعى اۋىلداردا جاس ماماندار ءۇشىن قالىپتى الەۋمەتتىك-تۇرمىستىق جاعداي جاسالا بەرمەيتىنىن جەتكىزدى. كوللەدجدەر مەن كاسىپورىنداردىڭ ماتەريالدىق-تەحنيكالىق بازالارى ەسكى. سوندىقتان جاس ماماندار ءىرى ەلدى مەكەندەر مەن قالالاردى تاڭداۋعا ءماجبۇر.
القالى باس قوسۋدا ءبىلىم وشاقتارىن زاماناۋي قۇرىلعىلارمەن جابدىقتاۋ, ءار كاسىپ بويىنشا سەمينار-ترەنينگتەر وتكىزۋ ماسەلەلەرى دە قوزعالدى.
«شەتەلدەردە تاجىريبە جيناقتاۋعا مۇمكىندىكتەر بەرىلسە دەگەن ءوتىنىشىم بار. مەن اعىلشىن ءتىلىن ۇيرەنۋ كۋرسىنان ءوتتىم. ءبىلىمىمدى ودان ءارى جەتىلدىرگىم كەلەدى. ءبىلىم بەرۋدىڭ, وقىتۋدىڭ جاڭا ادىستەرىمەن تانىسساق, ارتىق ەتپەس ەدى», دەيدى قوستاناي وبلىسى س. بايماعامبەتوۆ اتىنداعى اۋليەكول مەكتەپ-گيمنازياسىنىڭ مۇعالىمى اناستاسيا جۋكوۆا.
فورۋمنان كەيىن جاس ماماندار ءۇشىن بوس جۇمىس ورىندار جارمەڭكەسى ۇيىمداستىرىلدى.
سولتۇستىك قازاقستان وبلىسى