«قازاقستاندا تسيفرلاندىرۋ قاعيدالارىن ەنگىزۋ ناتيجەسىندە وتكەن جىلى 580 ملن اقش دوللارى كولەمىندە ەكونوميكالىق تيىمدىلىككە قول جەتكىزىلدى. بۇل «تسيفرلىق قازاقستان» باعدارلاماسىنىڭ ءبىر كورسەتكىشى عانا. قازاقستاندى تسيفرلاندىرۋ بۇدان ءارى جالعاسادى جانە اقش ينۆەستورلارىمەن ىنتىماقتاستىق ورناتۋدا اتالعان سالانىڭ الەۋەتى زور», دەپ مالىمدەدى اسقار جۇماعاليەۆ.
تسيفرلىق دامۋ, قورعانىس جانە اەروعارىش ونەركاسىبى ءمينيسترى اتاپ وتكەندەي, قازاقستان بۇگىنگى كۇنى «CISCO» جانە «IBM» سەكىلدى ءىرى امەريكالىق كومپانيالارمەن بەلسەندى ارىپتەستىك ورناتقان. وسىمەن بىرگە, وتكەن جىلدىڭ قاراشا ايىندا جۇمىسىن باستاعان «Astana Hub» تەحنوپاركىندە IT-ستارتاپ جانە يننوۆاتسيالار سالاسىندا بىرلەسىپ جۇمىس جۇرگىزۋگە بىرقاتار مۇمكىندىكتەر اشىلىپ وتىر.
امەريكالىق بيزنەس وكىلدەرى اسقار جۇماعاليەۆتىڭ شاقىرۋىنا قىزىعۋشىلىق تانىتتى, سەبەبى ولاردىڭ كەيبىرى قازاقستان اۋماعىندا جۇزەگە اسىرىلىپ جاتقان جوبالاردى قارجىلاندىرۋدا وڭ ناتيجەگە قول جەتكىزگەن. ءبىزدىڭ ەلىمىزدىڭ گەوگرافيالىق تۇرعىدا ورنالاسۋى, ينۆەستيتسيالىق احۋال, ءىجو كورسەتكىشى جانە نەگىزگى سەكتورلاردىڭ دامۋى اۆياتسيالىق ونەركاسىپ سالاسىندا ىنتىماقتاستىقتى نىعايتۋعا سەپتىگىن تيگىزىپ وتىر.