اشىلۋ سالتاناتىندا قر پرەمەر-ءمينيسترىنىڭ ورىنباسارى, قر پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ ءتورايىمى گۇلشارا ابدىقالىقوۆا ءسوز سويلەدى. ۆيتسە-پرەمەر ءوز سوزىندە ەلباسى ن. نازارباەۆتىڭ العا قويعان ستراتەگيالىق ماقساتتارى – 2050 جىلعا قاراي دامىعان 30 ەلدىڭ بىرىنە اينالۋعا قول جەتكىزۋ شەڭبەرىندە قازاقستاندا ءۇشىنشى جاڭعىرۋ, «تسيفرلىق قازاقستان» باعدارلاماسىنىڭ ىسكە اسىرىلىپ, يندۋستريا 4.0 ەلەمەنتتەرىنىڭ ەنگىزىلىپ جاتقانىن اتاپ ءوتتى. ولار جاھاندىق تاۋەكەلدەر: ەكونوميكالىق وسالدىقتار; گەوساياسي شيەلەنىستەر; قوعامدىق, ساياسي جانە تەحنولوگيالىق تۇراقسىزدىق; قورشاعان الەم پروبلەمالارى اياسىندا جۇرگىزىلەدى. بۇل جۇمىستا ايەلدەر قاۋىمداستىعى باستى درايۆەرلەردىڭ ءبىرى بولىپ قالىپتاسۋدا.
«ءبىز ءداستۇرلى وتباسىلىق قۇندىلىقتاردى نىعايتۋعا جانە وتباسى ينستيتۋتىن قولداۋعا باسىم نازار اۋدارامىز. ايەلدەردى جانە بالالارى بار وتباسىلاردى الەۋمەتتىك قولداۋدىڭ تۇتاس جۇيەسى قۇرىلدى. سوڭعى 10 جىلدا بيۋدجەت شىعىندارى وسى ماقساتتارعا 5 ەسەدەن استام ۇلعايدى», — دەدى گ. ابدىقالىقوۆا.
فورۋم اياسىندا قر ۇلتتىق ەكونوميكا ۆيتسە-ءمينيسترى م. جۇنىسبەكوۆا, «اتامەكەن» ۇكپ باسقارما توراعاسىنىڭ ورىنباسارى ل. رامازانوۆا جانە «ەكومەد» ادام ۇرپاعىن ءوربىتۋ كلينيكاسىنىڭ باسشىسى س. بايقوشقاروۆا بايانداما جاساعان بەس پانەلدىك سەسسيا ءوتتى: «شىۇ-عا قاتىسۋشى ەلدەردىڭ وڭىرلىك ىنتىماقتاستىعىنىڭ گەندەرلىك اسپەكتىلەرى», «ايەلدەردىڭ ايماقتىڭ تۇراقتى جانە ينكليۋزيۆتى ەكونوميكالىق دامۋىنا قاتىسۋى», «دەنساۋلىق ساقتاۋ مەن ءبىلىم بەرۋگە ينۆەستيتسيالار: وڭىرلىك ىنتىماقتاستىق ءۇشىن مۇمكىندىكتەر», «مۇمكىندىكتەر تەڭدىگى ماقساتىنداعى يننوۆاتسيالار مەن تسيفرلاندىرۋ ءداۋىرى», «ايەلدەر مەن قىزداردىڭ جاعدايىن جاقسارتۋعا ارنالعان وڭىرلىك سىن-قاتەرلەر مەن مۇمكىندىكتەر».
فورۋم قورىتىندىسى بويىنشا قارار قابىلداۋ جوسپارلانۋدا.