ورتا شارۋا وتباسىندا وسكەن ايدوس ون ءتورت جاسقا تولعاندا اكەسى قايتىپ كەلمەيتىن ساپارعا اتتانعان. بۋىنى ءالى قاتپاعان بالاعا اۋىر سالماق سول كەزدە-اق تۇسكەن. اناسى كوشەلى كىسى. «بالام, وزگەلەردەن ۇزدىك بولۋ ءۇشىن ۇزدىكتەردىڭ ءومىر تاجىريبەسىنەن ءتالىم ال. ۇيرەنۋدەن ەشقاشان تارتىنبا. جانىڭ قالاعان جۇمىسپەن اينالىس, تۇپكى ناتيجەسىنە جەتپەي ورتا جولدا شالدىعىپ قالما» دەر ەكەن. زەرەك ءارى قابىلەتتى جىگىت اناسىنىڭ وسى ءسوزىن ۇنەمى جادىنا ۇستاعان, ءومىرىنىڭ كرەدوسىنداي كورگەن.
ايدوس جۇمىستىڭ ەشقايسىنان تارتىنباعان, تابىس تاۋىپ, وتباسىنا جاردەمدەسۋ ءۇشىن ءبارىن دە كورگەن. قالا ىرگەسىندەگى تاسبوگەت اۋىلىندا دۇنيەگە كەلگەن ۇلان №176 ورتا مەكتەپتىڭ 9-سىنىبىن اياقتاعاننان كەيىن قازاق-تۇرىك ليتسەيىندە وقيدى. جوعارى وقۋ ورنىندا زاڭگەر ماماندىعىن الادى. كوپ قاتارلاستارى اكە-شەشەسىنە اقشا سۇراپ جۇرگەندە ايدوس ستۋدەنتتىك ءومىرىنىڭ بوس ۋاقىتتارىندا مەيرامحانادا داياشى بولىپ جۇمىس ىستەيدى. ىسكەر, ادال ازاماتتىڭ كوزگە كورىنىپ تۇراتىنى بار. مەيرامحانا قوجايىنى ونى مەنەدجەر قىزمەتىنەن كورگىسى كەلەدى. بىرەۋدىڭ قولىندا جۇمىس ىستەپ, ازىن-اۋلاق اقشانى قاناعات ەتۋ جالىنداپ تۇرعان جاسقا قول ەمەس. تىرناقتاپ جيعان قارجىسىنا ايدوس كولىك جۋاتىن ورتالىق اشادى. 2003 جىلى ازىق-ت ۇلىك دۇكەنىن جالعا الىپ, شاعىن جانە ورتا بيزنەسكە قادام جاسايدى. وسى شارۋادا ءجۇرىپ حالىقتىڭ سۇرانىسىن زەرتتەيدى. جيناعان قارجىسىنىڭ مۇرتىن بۇزباستان تابىستى سالاعا سالادى. ايدوس سايلىعاراەۆ 2009 جىلى «داستارقان» اسحانالار جەلىسىن, 2010 جىلى «Cofeedo» كوفەحاناسىن, 2011 جىلى «براۋنيس» كونديتەرلىك تسەحىن اشادى. دۇكەن مەن مەيرامحاناسىن ءبىر ارناعا بىرىكتىرىپ, ءونىمنىڭ كوبى شوكولادتان جاسالعاندىقتان اتىن «براۋنيس» دەپ قويادى. بۇگىندە اتاعى الىسقا كەتكەن «براۋنيس» كوفەحانا جانە مەيرامحانالار جەلىسىنىڭ قىسقا قايىرعانداعى تاريحى وسى.
مۇنىڭ ءبارى ايتىلعانعا عانا وڭاي. ۇلكەن تابىسقا جەتۋ جانكەشتى ەڭبەكتەن بولەك, ىزدەنىستى, ءۇيرەنۋدى تالاپ ەتەدى. ايدوستىڭ باستى تالابى – ساپا. اقشانىڭ سوڭىنا تۇسپەي, ساپا جەتىستىگىنە جەتسەڭ, ىزدەگەن تابىسىڭ الدىڭنان ءوزى شىعادى. ايدوس كاسىپورنىنىڭ وندىرىستىك تەحنولوگياسىن جاقسارتۋ ءۇشىن «پرەكو قىزىلوردا» كونسالتينگتىك كومپانياسىنان «دامۋ» قورىنىڭ كاسىپكەرلەرگە قىزمەت كورسەتۋ ورتالىعى كەڭەسشىلەرىنىڭ كومەگىمەن گەرمانيادان SES ەكسپەرتىن شاقىرتادى. تاجىريبە الماسىپ, جاڭا, باسەكەگە قابىلەتتى ءونىم دايىنداۋدى ۇيرەنەدى. بۇگىندە 150-دەن استام ادامعا ناپاقا تاۋىپ بەرىپ وتىرعان سەرىكتەستىكتىڭ باسشىسى ولاردىڭ ارقايسىسىن تۋعان باۋىرىنداي كورەدى. سىيلاستىق, بىرلىك بار جەردە تىرلىك تە, تابىس تا بار.
ايدوس مەيرامبەك ۇلى تاپقان تابىسىن استىنا باسىپ وتىراتىن كوركەۋدە ەمەس. ونىڭ ۇجىمى جىل سايىن «مەكتەپكە جول» اكتسياسىندا تۇرمىسى تومەن وتباسىنىڭ بالالارىن وقۋ-قۇرالدارى جانە مەكتەپ فورماسىمەن قامتاماسىز ەتەدى. «ەل اراي» قوعامدىق قورىمەن بىرلەسىپ, ءتۇرلى اۋرۋعا شالدىققان بالالاردىڭ ەم الۋىنا دەمەۋشى بولىپ كەلەدى. جىل سايىن قالالىق دەمالىس پاركىندە بالالارعا ارناپ ۇلكەن تورت سىيعا تارتادى. سالماعى 80 كيلو, بيىكتىگى 2 مەتر بولاتىن ءتاتتى تورت بۇلدىرشىندەر ءۇشىن بالالىق شاقتىڭ ەستەن كەتپەس ەرتەگىسى.
قىزىلوردالىق كاسىپكەر بۇل جەتىستىكتەرىنە توقمەيىلسىگەن ەمەس. ول الماتى قالاسىندا «براۋنيس» جەلىسىن ىسكە قوستى. نۇر-سۇلتان قالاسىنىڭ دا تۇرعىندارىن قۋانتاتىن كۇندەر جوسپارىندا تۇر. بولاشاقتا شەتەلدىكتەر دە قازاقستاندىق «براۋنيس» ونىمدەرىن تۇتىناتىن بولادى.
ەڭ العاشقى تابىسىن داياشىلىقتان تاپقان وردا بۇزار وتىزداعى جىگىت جۇرتتىڭ قالاۋىمەن «قازاقستاننىڭ 100 جاڭا ەسىمى» تاڭداۋىندا جەڭىسكە جەتتى. كورگەندى جىگىت, جاقسى اكە-شەشەدەن ءتالىم العان ازامات وسىنىڭ ءبارىن ءوزىم جاسادىم دەمەيدى. تابىستى جاستاردى قولداپ, مەملەكەتتىك باعدارلامالاردى قابىلداعان قازاقستاننىڭ تۇڭعىش پرەزيدەنتى – ەلباسى ن.ءا.نازارباەۆقا العىسى شەكسىز. وبلىس اكىمى قىرىمبەك كوشەرباەۆ تا تالانتتى جاستى قولتىعىنان دەمەپتى. ەڭ باستىسى تابان اقى, ماڭداي تەرىمەن ۇلكەن قاسىپورىن قۇرعان ازامات تالاپ بولسا اركىمنىڭ-اق تابىسقا جەتەتىنىن ايتادى.
قىزىلوردا وبلىسى