Nur Otan پارتياسىنىڭ اتىنان پرەزيدەنتتىك سايلاۋعا ۇسىنىلعان كانديدات قاسىم-جومارت توقاەۆتىڭ ەلىمىزدىڭ بارلىق ايماعىندا 227 قوعامدىق سايلاۋالدى شتابى جۇمىس ىستەپ جاتىر. سونىڭ اياسىندا كەشە شتاب وكىلدەرى قاراعاندى وبلىسىنا باردى. جەرگىلىكتى حالىقپەن كەزدەسۋلەر كەزىندە مەتاللۋرگتەر مەن كەنشىلەر Nur Otan پارتياسىنىڭ كانديداتىن ءبىراۋىزدان قولدايتىندارىن ءبىلدىردى.
شتاب باسشىسى, Nur Otan پارتياسى توراعاسىنىڭ ءبىرىنشى ورىنباسارى ماۋلەن اشىمباەۆ باستاعان اتالعان رەسپۋبليكالىق قوعامدىق شتابتىڭ قۇرامىندا مەملەكەت جانە قوعام قايراتكەرلەرى, بەلگىلى كاسىپكەرلەر, مادەنيەت جانە سپورت جۇلدىزدارى جانە تاعى باسقا بەلسەندى ازاماتتار بار. ولار الدىمەن تەمىرتاۋ قالاسىنداعى «ارسەلورميتتال تەمىرتاۋ» اق كومبيناتىنىڭ الاڭىندا وتكەن كانديدات قاسىم-جومارت توقاەۆتى قولداۋعا ارنالعان ءىس-شاراعا قاتىستى. مەتاللۋرگتەر الدىندا ءسوز سويلەگەن ماۋلەن اشىمباەۆ «ساپارىمىزدى قاراعاندى وبلىسىنان, ءدال سىزدەردىڭ زاۋىتتارىڭىزدان باستاۋىمىز كەزدەيسوق ەمەس. سەبەبى بۇل زاۋىتتا تۇڭعىش پرەزيدەنتىمىز نۇرسۇلتان نازارباەۆتىڭ ەڭبەك جولى باستالدى. وسى جەردە ەلباسىمىز شىڭدالىپ, تۇلعا رەتىندە قالىپتاسىپ, قايرالىپ, قايراتتانىپ شىقتى. ەلباسىمىزدىڭ الەمدىك دەڭگەيدەگى ساياساتكەر بولۋىنىڭ نەگىزى دە وسى وڭىردە, وسى زاۋىتتا قالاندى», دەدى.
بۇعان قوسا ايماقتاردا كانديداتتىڭ سەنىم بىلدىرىلگەن وكىلدەرى ارقىلى سايلاۋشىلاردىڭ ۇسىنىستارى مەن تىلەكتەرىن جيناۋعا سەپ بولاتىن جالپىۇلتتىق «BIRGE» اكتسياسى باستالدى. الماتى وبلىسىندا وسى اكتسيا اياسىندا اتقارىلاتىن جۇمىستار بارىسىمەن وبلىستىق قوعامدىق شتاب توراعاسى عالياسقار سارىباەۆ تانىستىردى. ال تۇركىستان وبلىستىق قوعامدىق شتابىنىڭ توراعاسى ۇلاسبەك سادىبەك ۇلى ءوڭىر جۇرتىن اتالعان ءىس-شاراعا بەلسەندى قاتىسۋعا شاقىردى.* * *
«اۋىل» حالىقتىق-دەموكراتيالىق پاتريوتتىق پارتياسىنىڭ اتىنان پرەزيدەنتتىككە كانديدات تولەۋتاي راقىمبەكوۆتىڭ سايلاۋالدى باعدارلاماسىمەن تانىستىرۋ ماقساتىندا تاراز يننوۆاتسيالىق-گۋمانيتارلىق ۋنيۆەرسيتەتىندە سايلاۋشىلارمەن كەزدەسۋ ءوتتى. اتالعان جيىنعا پارتيا توراعاسى, پارلامەنت سەناتىنىڭ دەپۋتاتى ءالي بەكتاەۆ, پارتيانىڭ جامبىل وبلىستىق فيليالىنىڭ ساياسي كەڭەس مۇشەلەرى, وبلىستىق جانە اۋداندىق ءماسليحاتتىڭ دەپۋتاتتارى, قالالىق جانە اۋداندىق فيليالدارىنىڭ توراعالارى, كاسىپكەرلەر, پروفەسسور-وقىتۋشىلار قۇرامى مەن ستۋدەنتتەر قاتىستى.
اۋەلى «اۋىل» پارتياسىنىڭ توراعاسى ءالي بەكتاەۆ كانديدات تولەۋتاي راقىمبەكوۆتىڭ سايلاۋالدى باعدارلاماسىمەن تانىستىرىپ, پارتيانىڭ قازىرگى جۇمىستارىنا توقتالدى. سايلاۋالدى باعدارلامادا ايتىلعان قازاقستاننىڭ اگروونەركاسىپتىك كەشەنىن دامىتۋ – حالىقتىڭ ءال-اۋقاتىن ارتتىرۋدىڭ كىلتى, اۋىلدار مەن قالالاردىڭ الەۋمەتتىك تەڭدىگى – قوعامنىڭ وزەكتى ماسەلەلەرىن شەشۋ مۇمكىندىگى, ءداستۇرلى جانە رۋحاني قۇندىلىقتاردى ساقتاۋ – ەل دامۋىنىڭ سەنىمدى نەگىزى جانە اۋىلداعى جاستار ساياساتىنىڭ ءتيىمدى مودەلى – اۋىلدى وركەندەتۋدىڭ قۇرالى سىندى ماسەلەلەر دە كەڭىنەن تالقىلاندى.
بۇدان كەيىن «اۋىل» حالىقتىق-دەموكراتيالىق پاتريوتتىق پارتياسى جامبىل وبلىستىق فيليالىنىڭ ساياسي كەڭەس مۇشەسى, «قازاق سۋ شارۋاشىلىعى عىلىمي-زەرتتەۋ ينستيتۋتى» جاۋاپكەرشىلىگى شەكتەۋلى سەرىكتەستىگىنىڭ باس ديرەكتورى نۇرلان بالعاباەۆ جانە «اۋىل» پارتياسى تاراز قالالىق فيليالىنىڭ توراعاسى قايرات بايجانوۆ ءسوز الىپ, ەلىمىزدەگى ەڭ ءىرى ساياسي ناۋقانعا بايلانىستى ءوز ويلارىن جەتكىزدى. ءاربىر قاتىسۋشى باعدارلاماعا سايكەس پىكىرىن ءبىلدىرىپ, ونىڭ ماڭىزدىلىعىن اتاپ ءوتتى.
* * *
«اق جول» پارتياسىنان كانديدات دانيا ەسپاەۆا پارتيا توراعاسى ازات پەرۋاشەۆ باستاعان رەسپۋبليكالىق شتاب وكىلدەرىمەن بىرگە الماتى بازارىندا جۇمىس ىستەيتىن كاسىپكەرلەرمەن كەزدەستى. «جىبەك جولى» بازارىندا كاسىبىن دوڭگەلەتىپ وتىرعان جۇرتشىلىق كانديدات پەن پارتيا وكىلدەرىنەن قازاقستانداعى شاعىن جانە ورتا بيزنەستى دامىتۋ ماسەلەلەرى جونىندە سۇرادى. وسىعان وراي ءوز كەزەگىندە د.ەسپاەۆا سايلاۋالدى باعدارلاماسىنىڭ نەگىزگى باسىمدىقتارى تۋرالى بايانداپ, ونىڭ ىشىندە كاسىپكەرلىككە قاتىستى ماسەلەلەرىن شەشۋ باعىتى دا ايقىن كورسەتىلگەنىن اتاپ ايتتى.
سونىمەن قاتار پرەزيدەنتتىكتەن ۇمىتكەر د.ەسپاەۆا الماتىداعى «تەمىربەتون-1» جشس ۇجىمىمەن كەزدەستى. تەمىربەتوندى ونىمدەر مەن قۇرىلعىلاردى دايىنداۋدا ۇلكەن جەتىستىككە جەتكەن, 65 جىلدىق تاريحى بار بۇل كاسىپورىندا 400-گە جۋىق قىزمەتكەر جۇمىس ىستەيدى. ولار كانديداتتىڭ سايلاۋالدى باعدارلاماسىمەن تانىسىپ, وزدەرىن تولعاندىرعان ساۋالدارىن قويدى.
بۇدان كەيىن پارتيانىڭ رەسپۋبليكالىق شتابى ۇگىت-ناسيحات جۇمىسىن تالدىقورعاندا جالعاستىرىپ, وندا ەلىمىزدەگى ءىرى اككۋملياتور زاۋىتى «قاينار» جشس جۇمىسشىلارىمەن كەزدەستى. ا.پەرۋاشەۆ مۇنداي الەۋەتتى ءوندىرىس ورنىنا مەملەكەتتىك قولداۋدىڭ جاڭا مەحانيزمدەرىن ەنگىزۋ كەرەكتىگىن نازارعا الىپ, ونداي باسىمدىق د.ەسپاەۆانىڭ سايلاۋالدى باعدارلاماسىندا كورسەتىلگەنىن ايتتى.
* * *
قازاقستان كوممۋنيستىك حالىق پارتياسىنان پرەزيدەنتتىككە كانديدات جامبىل احمەتبەكوۆتىڭ رەسپۋبليكالىق سايلاۋالدى شتابىنىڭ وكىلدەرى اقمولا وبلىستىق اۋرۋحانا قىزمەتكەرلەرىمەن كەزدەستى. جيىندا «حالىق كوممۋنيستەرى» فراكتسياسىنىڭ دەپۋتاتى ۆلاديسلاۆ كوسارەۆ پەن ۇيىمنىڭ اقمولا وبلىستىق كوميتەتىنىڭ ءبىرىنشى حاتشىسى بەيسەنباي ءماجيتوۆ ءسوز سويلەدى.
ۆ.كوسارەۆ پارلامەنت ماجىلىسىندەگى «حالىق كوممۋنيستەرى» فراكتسياسىنىڭ 7 دەپۋتاتى ۇنەمى قاراپايىم حالىقتىڭ الەۋمەتتىك جاعدايىن جاقسارتۋعا قاتىستى باستامالارعا ۇيىتقى بولاتىنىن تىلگە تيەك ەتتى. بۇدان كەيىن ول ۇمىتكەر ج.احمەتبەكوۆتىڭ سايلاۋالدى تۇعىرناماسىنىڭ باسىم باعىتتارىنا توقتالىپ, مەديتسينا قىزمەتكەرلەرىنىڭ سۇراقتارىنا جاۋاپ بەردى. ءوز كەزەگىندە ب.ءماجيتوۆ مەديتسينا قىزمەتكەرلەرىنىڭ جالاقىسىن كوبەيتۋ وزەكتى ماسەلە ەكەنىن جانە بۇل سۇراق كوممۋنيستەردىڭ نازارىندا تۇراتىنىن اتاپ ءوتتى. «قكحپ اتىنان پرەزيدەنت سايلاۋىنا ءتۇسىپ جاتقان كانديداتتىڭ سايلاۋالدى تۇعىرناماسىندا «كەدەيشىلىكپەن كۇرەس» دەگەن باعىت بار. مىنە, ءدال وسى باعىت الەۋمەتتىك ماسەلەلەردى كۇن تارتىبىنە قويادى. ءبىزدىڭ كانديدات دەنساۋلىق ساقتاۋ سالاسىنا, ۇلت ساۋلىعىنا ەرەكشە كوڭىل ءبولىپ وتىر. مەديتسينا قىزمەتكەرلەرىنىڭ جالاقىسىن كوتەرۋ, زەينەتاقىمەن قامتاماسىز ەتۋ, تۇرعىن ءۇي ماسەلەسىن شەشۋ, ەڭبەك جاعدايىن جاقسارتۋ جانە باسقا دا الەۋمەتتىك-ەكونوميكالىق ماسەلەلەر وزەكتى بولىپ قالا بەرەدى. ءبىز وسىنىڭ بارلىعىن شەشۋگە كۇش سالامىز. سىزدەردى ج.احمەتبەكوۆتى قولداپ داۋىس بەرۋگە جانە جوعارى جالاقى الىپ, زامان تالابىنا ساي ءومىر سۇرۋگە شاقىرامىز!» دەدى ب.ءماجيتوۆ.* * *
قازاقستان رەسپۋبليكاسىنىڭ كاسىپوداقتار فەدەراتسياسىنان كانديدات امانگەلدى تاسپيحوۆتىڭ كەشە سايلاۋالدى تۇعىرناماسى جاريالانىپ, وبلىستىق شتابتارى ايماقتاردا ۇگىت-ناسيحات جۇمىستارىن جۇرگىزە باستادى.
كانديداتتىڭ رەسپۋبليكالىق قوعامدىق شتابىنىڭ سەنىمدى وكىلدەرى نۇر-سۇلتان قالاسىنداعى ونكولوگيالىق اۋرۋحانادا ەڭبەك ۇجىمىمەن كەزدەستى. كەزدەسۋگە 100-گە جۋىق مەديتسينا قىزمەتكەرى قاتىستى. شتابتىڭ تەڭ توراعاسى س.داۋلەتالين كانديداتتىڭ ەڭبەك جولى مەن ادامگەرشىلىك تۇلعاسىن بايانداپ, سايلاۋالدى تۇعىرناماسىمەن تانىستىردى.
سونداي-اق پرەزيدەنتتىكتەن ۇمىتكەر ماڭعىستاۋ وبلىسى بويىنشا سايلاۋالدى شتابى جاڭاوزەن قالاسىنىڭ ەڭبەك ۇجىمىمەن كەزدەسۋ وتكىزدى. دەلەگاتسيا قۇرامىندا وبلىستىق قوعامدىق شتابتىڭ باسشىسى, ماڭعىستاۋ وبلىسىنىڭ كاسىپوداق ورتالىعىنىڭ توراعاسى كيىكباي جاۋلين, توراعانىڭ ورىنباسارى تەلمان ماتاەۆ بولدى. وندا جۇمىس بەرۋشىلەردىڭ جاۋاپكەرشىلىگىن كۇشەيتۋ, قىزمەتكەرلەردىڭ ەڭبەك قۇقىقتارىن قامتاماسىز ەتۋ, قاۋىپسىز ەڭبەك جاعدايلارى, لايىقتى ەڭبەكاقى جانە ەڭبەك كوشى-قونىن رەتتەۋ سياقتى ماسەلەلەر كانديدات ا.تاسپيحوۆتىڭ العا قويعان ماقساتتارى ەكەنى ايتىلدى.* * *
«ۇلت تاعدىرى» ۇلتتىق-پاتريوتتىق قوزعالىسى اتىنان پرەزيدەنتتىككە كانديدات ءامىرجان قوسانوۆتىڭ سايلاۋالدى شتابى سولتۇستىك قازاقستان وبلىسىنىڭ بايتەرەك اۋىلىنا كەلدى. شتاب وكىلدەرى جەرگىلىكتى تۇرعىندارمەن كەزدەسىپ, كانديداتتىڭ سايلاۋالدى تۇعىرناماسىن تانىستىردى.
حالىقپەن كەزدەسۋدە ءا.قوسانوۆ ءوز سايلاۋالدى تۇعىرناماسىنىڭ نەگىزگى باعىتتارىن اتاپ ءوتىپ, تۇرعىنداردى تولعاندىرعان سۇراقتارعا جاۋاپ بەردى. ءىس-شارا بارىسىندا اۋىل تۇرعىندارى, اقساقالدار ءسوز سويلەپ, ءوز كوزقاراستارىمەن ءبولىستى, بىرقاتار ماسەلە كوتەرىلىپ, شەشۋ جولدارى تالقىلاندى. سونىمەن قاتار تالدىقورعان قالاسىنداعى ءىلياس جانسۇگىروۆ اتىنداعى مادەنيەت ۇيىندە ءا.قوسانوۆتى قولداۋعا ارنالعان دوڭگەلەك ۇستەل جيىنى ءوتتى. وبلىستىق سايلاۋ شتابىنىڭ ۇيلەستىرۋشىسى جۇكەل حاماي كانديداتتىڭ سايلاۋالدى تۇعىرناماسىندا كورسەتىلگەن «ۇلتتىق داستۇرلەردى دامىتۋ جانە ءداستۇرلى قۇندىلىقتاردى ساقتاۋ» تاقىرىبىندا ءسوز سويلەدى. كەزدەسۋگە كەلگەن وبلىستىق اقساقالدار كەڭەسىنىڭ وكىلدەرى مەن ارداگەرلەر جانە ستۋدەنتتەر ءسوز سويلەپ, ءوز ويلارىن ءبىلدىردى.* * *
نۇر-سۇلتان قالاسىنداعى «جەتىسۋ» ساياباعىندا « ۇلى دالا قىراندارى» رەسپۋبليكالىق قوزعالىسىنان پرەزيدەنتتىككە كانديدات سادىبەك تۇگەلدىڭ سايلاۋالدى شتابى ەكولوگيالىق اكتسيا وتكىزدى. 1991 جىلى 12 مامىر ەكولوگيالىق ءبىلىم كۇنى رەتىندە بەلگىلەنىپ, رەسەيدە جانە تمد ەلدەرىندە اتاپ ءوتىلىپ كەلەدى. وسىعان سايكەس اتالعان اكتسيا قورشاعان ورتاعا قامقورلىق جاساۋدى, جاس بۋىندى تۋعان جەرىنىڭ تابيعاتىنا جاناشىرلىقپەن قاراۋعا ەكولوگيالىق ءبىلىم بەرۋ ارقىلى تاربيەلەۋدى ماقسات ەتىپ الدى.
س.تۇگەل ءوزىنىڭ سايلاۋالدى باعدارلاماسىندا «جەر-انا – جانىمىز, انا ءتىلى – ارىمىز» دەپ ۇرپاق بويىنا ۇلتتىق قۇندىلىقتاردى ءسىڭىرۋ باستى ۇستانىمى ەكەنىن اتاپ كورسەتكەن. سوندىقتان بۇل شاراعا مەكتەپ وقۋشىلارى مەن رەسپۋبليكالىق كاراتە فەدەراتسياسىنىڭ جاس سپورتشىلارى جينالدى. ولار « ۇلى دالا قىراندارى» قوزعالىسىنىڭ كانديداتىنا قولداۋ كورسەتىپ, ساياباقتارداعى تاستالعان قوقىستاردى جيناپ, اكتسياعا بەلسەندى قاتىستى. وسىلايشا جاس ۇرپاق ادامنىڭ ساناسى تازارماي, قالاسى تازارمايتىنىن سەزىنىپ, ەكولوگيالىق ءىس-شارادان ەرەكشە اسەر الدى.
مەملەكەتتىك ءتىلدىڭ مارتەبەسىن كوتەرۋ مەن ۇرپاق تاربيەسىن العا قوياتىن س.تۇگەل وسى شارانىڭ الدىندا ەلورداداعى تۇنگى كلۋبتاردى ارالاپ, جاسوسپىرىمدەردى جات قىلىقتاردان بويىن اۋلاق ۇستاۋعا شاقىردى. بۇگىندە كانديداتتىڭ 3 قالادا جانە 15 وبلىستا 17 قوعامدىق سايلاۋالدى شتابى جۇمىس ىستەپ جاتىر.
دايىنداعان
ورىنبەك وتەمۇرات,
قالماحانبەت مۇقامەتقالي,
حاميت ەسامان,
«Egemen Qazaqstan»