– «جۋسان-2» وپەراتسياسىنىڭ ءناتيجەسىندە قۇتقارىلعان 231 وتانداسىمىزدىڭ 16-سى – ەر ادام, 59-ى – ايەل جانە 156-سى بالا. بۇل گۋمانيتارلىق شاراعا اقش تاراپى مەن سيريالىق دەموكراتيالىق كۇشتەر قولداۋ كورسەتتى, – دەدى ە.اشىقباەۆ.
ال وسى بريفينگتە ۇلتتىق قاۋىپسىزدىك كوميتەتىنىڭ دەپارتامەنت باستىعى باقىتبەك راحىمبەرديەۆ دايش جاعىندا قارۋلى قاقتىعىستارعا قاتىستى دەگەن كۇدىكپەن 16 ەر ادام مەن 4 ايەلدىڭ ەلىمىزگە جەتكىزىلگەن بويدا قاماۋعا الىنعانىن حابارلادى.
– ۇقك تاراپىنان ەلگە قايتارىلعاندار نۇر-سۇلتان, الماتى قالالارى مەن الماتى, اتىراۋ, باتىس قازاقستان, اقتوبە, اقمولا, قاراعاندى, تۇركىستان, ماڭعىستاۋ وبلىستارىنىڭ ازاماتتارى. ولار ەلگە ءوز ەرىكتەرىمەن ورالۋعا شەشىم قابىلداعان, وعان قوسا, بىرقاتارى ىستەگەن ىستەرى بويىنشا قىلمىستىق جازا وتكەرۋگە دايىن, – دەدى ب.راحىمبەرديەۆ.
ۇقك وكىلىنىڭ ايتۋىنشا, 55 ايەل مەن بالالار اقتاۋ قالاسىنىڭ توڭىرەگىندەگى بەيىمدەۋ ورتالىعىنا ورنالاستىرىلعان. سول جەردە مەديتسينالىق تەكسەرۋدەن ءوتكىزىلىپ, ولارعا پسيحولوگتار, تەولوگتار جانە ۇكىمەتتىك ەمەس ۇيىم وكىلدەرى كومەك كورسەتۋگە كىرىسكەن.
سونىمەن قاتار جەكە كۋالىكتەرىن جوعالتىپ العان بىرقاتارىنىڭ جەكە باسىن انىقتايتىن قۇجاتتارى قالپىنا كەلتىرىلۋدە. كارانتيندىك ورتالىقتاعى ءبىر اي ءىشىندە ولاردىڭ قانداي دا ءبىر قىلمىسقا قاتىسى بولماعانى دالەلدەنسە, بۇرىنعى تۇرعىلىقتى جەرلەرىنە جىبەرىلەدى.
تاعى ءبىر اتاپ وتەرلىگى, 156 بالانىڭ 107-ءسى – جەتى جاسقا دا تولماعان. ال 18 بالا تۇل جەتىم – اكە-شەشەلەرى سوعىس ايماعىندا ولگەن نەمەسە ءىز-ءتۇزسىز جوعالىپ كەتكەن. بالالاردىڭ باسىم بولىگى شەتەلدەردە دۇنيەگە كەلگەن.
سايىپ كەلگەندە, ءوز ەلى وزەككە تەپپەگەن جاندار قازىر تولىق مەملەكەت قاراۋىندا دەپ ايتۋعا بولادى.