«9 مامىر كۇنى 21:10-دا جول-پاترۋل پوليتسياسى باتالونىنىڭ پوليتسەيى, كىشى سەرجانت ازامات بەكتۇروۆ پەن ۇلتتىق گۆارديا اسكەري قىزمەتشىلەرى پاترۋل كەزىندە كوكشەتاۋ قالاسىنداعى تاشەنوۆ - اباي كوشەلەرىنىڭ قيىلىسىندا ادامداردىڭ جينالعانىن جانە جەردە جاتقان ادامدى بايقايدى. قالا تۇرعىندارىنىڭ ايتۋىنشا, ەر ادامنىڭ ەپيلەپسياسى ۇستاپ قالعان. ازامات جاعدايدى بىردەن باعالاپ, زارداپ شەگۋشىگە العاشقى مەديتسينالىق كومەك كورسەتەدى. وسى كەزدە جەدەل جاردەم شاقىرىلدى», - دەدى اقمولا وبلىستىق پوليتسيا دەپارتامەنتىنىڭ ءباسپاسوز قىزمەتىنەن.
«ەپيلەپسيا بەلگىلەرى ءار بەس مينۋت سايىن جالعاسقان جانە ءورشي تۇسكەن. ءبىر كەزدە ەر ادام تىنىس الماي قالدى», - دەدى ازامات.
پوليتسەي ابدىراپ قالماي, العاشقى كومەك كورسەتۋدى جالعاستىرا بەرگەن جانە وسىنىڭ ارقاسىندا ناۋقاس جىگىت ءتىرى قالعان.
«جەدەل جاردەم كەلگەنگە دەيىن پوليتسيا جاساعى زارداپ شەگۋشىنىڭ قاسىندا بولىپ, كەيىن ەر ادامدى مامانداردىڭ قولىنا تاپسىرعان», - دەدى ءوڭىردىڭ پوليتسيا دەپارتامەنتىنىڭ ءباسپاسوز قىزمەتىنەن.