9 مامىر مەرەكەسى تالدىقورعان قالاسىنىڭ ورتالىق مادەنيەت جانە دەمالىس ساياباعىنداعى «داڭق» وبەليسكىسىنە گۇل شوقتارىن قويۋ راسىمىنەن باستالدى. شاراعا وبلىس اكىمى اماندىق باتالوۆ باستاعان اسكەريلەر, ارداگەرلەر مەن قالا جۇرتشىلىعى ماڭگىلىك الاۋ الدىندا تاعزىم ەتتى.
مۇنان كەيىن قولدارىنا مايدانگەرلەردىڭ سۋرەتتەرىن ۇستاعان 1 مىڭعا جۋىق ادام «ماڭگىلىك پولك» شەرۋىنە شىعىپ, قالانىڭ ورتالىق كوشەلەرى ارقىلى «جاستار» ساياباعىنا دەيىن ءجۇرىپ ءوتتى. ال «جاستار» ساياباعىنا قۇرىلعان دالا ساحناسىندا «ۇرپاققا ۇران بولعان – ۇلى جەڭىس!» اتتى مەرەكەگە ارنالعان تەاترلىق كورىنىس قويىلدى. كورىنىستە وتان تۋرالى اندەر ايتىلىپ, مايدان دالاسىنداعى اسكەري ءومىر بەينەلەندى.
جەتىسۋداعى جەڭىس كۇنىن تويلاۋ «تالدىقورعان» يپپودرومىنداعى ات سپورتى جارىستارىنا ۇلاسىپ, كەشكىسىن مەرەكەلىك وتشاشۋمەن اياقتالدى.