پاتەر كىلتتەرىن وبلىس اكىمى بولات باقاۋوۆ تابىستادى. پاتەر العان سوعىس ارداگەرى اكىمبەك ءابدىرايىموۆ 95 جاستا. اتامىز مايدانعا 1942 جىلى شاقىرىلىپ, 60-شى اۆتوماتشىلار پولكىنىڭ 204-ءشى اتقىشتار ديۆيزياسىنىڭ قۇرامىندا بەلورۋسسيانىڭ ۆيتەبسك جانە سمولەنسك وبلىستارىنىڭ اۋماعىنداعى شايقاستارعا قاتىسىپ, ۋكراينانى ازات ەتۋگە قاتىسقان ەكەن.
ۇرىس دالاسىنداعى بىرنەشە جاراقاتتاردان كەيىن مۇگەدەكتىك العان اكىمبەك ءابدىرايىموۆ ەرلىگى مەن باتىرلىعى ءۇشىن ەكىنشى دارەجەلى «وتان» جانە «قىزىل جۇلدىز» وردەندەرىمەن ماراپاتتالدى. سوعىس ارداگەرى قاپسالياموۆ قۇدايبەرگەن مايدانعا 17 جاسىندا اتتانعان. اتامىز 34-ءشى تانكىگە قارسى اتقىشتار ديۆيزيونىندا ارتيلەريست-كوزدەۋشى رەتىندە شايقاستارعا قاتىستى.
قارت مايدانگەر ءۇشىنشى دارەجەلى داڭق وردەنىمەن, «ۆارشاۆانى ازات ەتكەنى ءۇشىن», «ەرلىك ىستەرى ءۇشىن» مەدالدەرىمەن, مەرەيتويلىق مەدالدەرمەن ماراپاتالادى. 1950 جىلى اسكەردەن قايتقان قۇدايبەرگەن قاپسالياموۆ تۋعان اۋىلىنا ورالىپ, ىشكى ىستەر ورگاندارىندا قىزمەت ەتتى. ەل تىنىشتىعىن قورعاۋداعى ەڭبەگى ءۇشىن ول «ءمىنسىز قىزمەتى ءۇشىن» مەدالىمەن جانە «ميليتسيا ۇزدىگى» ءتوس بەلگىسىمەن ماراپاتتالدى.
ال, ۆياچەسلاۆ چەرنىشەۆ اسكەر قاتارىنا 1944 جىلى شاقىرىلىپ, 76-شى گۆارديالىق اتقىشتار ديۆيزياسىندا سوعىستى. 1945 جىلدىڭ قاڭتارىندا جەڭىل جاراقات العان ول 1953 جىلى زاپاسقا شىعىپ, وقىتۋشىلىق قىزمەتپەن اينالىستى.
ۆياچەسلاۆ چەرنىشەۆ ەكىنشى دارەجەلى وتان وردەنىمەن, «گەرمانيانى جەڭگەنى ءۇشىن», «بەرليندى العانى ءۇشىن» مەدالدەرىمەن جانە مەرەيتويلىق ناگرادالارمەن ماراپاتتالعان.
– ۆياچەسلاۆ ۆلاديميروۆيچ ءومىرى پاتەر سۇراعان ەمەس, ماعان دا تىيىم سالدى. بۇگىن پاتەر العانىمىز ءبىز ءۇشىن توسىن سىي بولدى, – دەيدى ارداگەردىڭ زايىبى تاتيانا چەرنىشەۆا.
ءيا, ومىردە نامىسىن بارىنەن جوعارى قوياتىن, وتانى ءۇشىن وت كەشكەنىن پارىزىم دەپ جۇرەگىندە ساقتايتىن, قۇرباندارعا ماڭگى باس يىەتىن وسىنداي جىگەرلى مىنەزدى اتالاردىڭ بار ەكەنى قۋانتادى.