جيەننەن تۋعان جيەنشار دانيار قازىر سوقتالداي ازامات. وبلىس ورتالىعىنداعى ۋنيۆەرسيتەتتىڭ فيلولوگيا فاكۋلتەتىن بيىل بىتىرەدى. ساباعىن جاقسى وقيدى. تۇگەل ءسوزدىڭ ءتۇبىن تولايىم اقتارماسا دا, ايتەۋىر بىلمەككە قۇمار. اڭگىمەنىڭ اۋانى دانيارعا اۋعاندا ناعاشىلارىنا تارتقان دەپ مۇرتىمىز كوككە شانشىلىپ, كۇپىنىپ وتىرامىز. وتكەن دەمالىس كۇنى ەلگە جول تۇسكەن. دانيار الدىمەن ۇلى ناعاشى اجەسىنە سالەم بەردى. اجەسى قۋانىپ قالدى.
ۋنيۆەرسيتەتتىڭ فيلولوگيا فاكۋلتەتىن بيىل ءتامامدايتىن دانيار قازان شەگەلەۋدىڭ, كوگەنتۇپتىڭ نە ەكەندىگىن بىلە قويمايدى ەكەن. كەيۋانا ءتۇسىندىرىپ جاتىر.
– ەت جاقىن تۋىستاردىڭ بالالارىنا قوزى, لاق, بۇزاۋ, ق ۇلىن اتايدى. كوگەنتۇپ بەرۋ بۇرىننان كەلە جاتقان ءداستۇر. ءبىزدىڭ اۋلەتتە سەنىڭ دە سىباعاڭ بار, – دەيدى اجەسى. ءسوز لامىنە ساياتىن مازمۇن جالعىز سىباعا عانا ەمەس, جاناشىرلىق پەن قايىرىمدىلىق قاعيداتتارى. قازان شەگەلەۋدى دە شەگەلەپ ءتۇسىندىردى. سىباعالى دامنەن ءدام تاتىرۋ ەكەن. مەيمان بوساعادان اتتاعان سوڭ ءۇي يەسى «كەلگەنىڭ جاقسى بولدى عوي, قازان شەگەلەيتىن ادام تابا الماي وتىر ەدىك» دەسە, قوناقجايلىلىعىنىڭ بەلگىسى.تۇستەنىپ, شارۋامىزدى ءبىتىرگەن سوڭ كەيىن قايتقانبىز. باقانداي ۋنيۆەرسيتەت ءبىلىمىن بويىنا سىڭىرگەن دانيار ءوزىنىڭ ولقى تۇسىن ەندى اڭداپ, اجەسىنىڭ ادەمى الەمىنە ءالى دە ءتانتى بولىپ كەلەدى.
– ەڭ ۇلكەن ءبىلىم اۋىلدا ەكەن عوي, – دەيدى ول, – وسى جاز ادەيى كەلىپ وقىماسام.
شىنىندا دا, اجەسىنىڭ مەكتەبى ءايبات-اق قوي.