حالىققا جەدەل ءارى ساپالى قىزمەت كورسەتۋ ءۇشىن اتالعان قابىلداۋ ورىندارىنا 150-دەي ادام جۇمىلدىرىلىپ, ءساۋىر ايىندا 14 مىڭنان استام تۇرعىننىڭ ءوتىنىشى قابىلدانعان. ناتيجەسىندە 6 مىڭعا جۋىق وتباسىعا قارجىلاي كومەك تاعايىندالدى. بىلتىر شىمكەنتتە 10 مىڭنان استام وتباسى اتاۋلى الەۋمەتتىك كومەك العان بولاتىن. بيىل بۇل كورسەتكىشتىڭ سانى ارتا تۇسپەك.
مەملەكەت تاراپىنان بەرىلگەن الەۋمەتتىك كومەككە العاشقىلاردىڭ ءبىرى بولىپ 7 بالانىڭ اناسى مامراحان بەكمەتوۆا يە بولدى. قۋانىشى قوينىنا سىيماعان انا قۇجاتتارىن ەش قيىندىقسىز قابىلداعان جۇمىسپەن قامتۋ ورتالىعىنىڭ ماماندارىنا العىس ءبىلدىردى.
– شىمكەنت قالاسى بويىنشا اتاۋلى الەۋمەتتىك كومەككە ءوتىنىش بىلدىرگەن وتباسىلاردىڭ ءساۋىر ايىندا تاپسىرعان قۇجاتتارىنىڭ بارلىعى قامتىلادى. سونىمەن قاتار قالا تۇرعىندارىنىڭ الەۋمەتتىك كومەك الا الماي قالامىن دەگەن كۇدىگىن تۋدىرماۋ ءۇشىن ءوتىنىش بىلدىرگەن وتباسىلاردىڭ ءىس-قاعازدارىن تولىققاندى زاڭ اياسىندا قاراپ, نازارعا الامىز, – دەيدى قالا اكىمىنىڭ ورىنباسارى گۇلجان قۇرمانبەكوۆا.
كوپ بالالى انالار مەن الەۋمەتتىك جاعىنان از قامتىلاتىن وتباسىلار اتاۋلى الەۋمەتتىك كومەك جەتپەي قالۋى ءمۇمكىن دەپ الاڭداعان بولاتىن. الايدا سالاعا جاۋاپتى تۇلعالار ەلباسى تاپسىرماسىمەن ءبولىنگەن قارجىلاي كومەكتىڭ جەتكىلىكتى ەكەنىن ايتىپ, حالىقتىڭ الاڭداۋىنا نەگىز جوق ەكەنىن ءتۇسىندىردى.
شىمكەنت