جۇما, 24 مامىر 2013 1:23
قوستاناي كوممۋنالدىق كاسىپورنى باسشىسىنا قىلمىستىق ايىپ تاعىلدى
قوستاناي وبلىستىق پروكۋراتۋراسىندا ءباسپاسوز ءماسليحاتى وتكىزىلىپ, وندا قالالىق تۇرعىن ءۇي-كوممۋنالدىق كاسىپورنىنىڭ بۇرىنعى باستىعى الەكساندر ماكليۋككە قاتىستى ءىستىڭ تەرگەلۋ بارىسى حاباردار ەتىلدى.
ءباسپاسوز ءماسليحاتى بارىسىندا كوممۋنالدىق مەكەمەنىڭ بۇرىنعى باستىعىنا قاتىستى قوزعالعان 4 قىلمىستىق ءىستىڭ ءبىر وندىرىسكە جيناقتالعانى ايتىلدى.
جۇما, 24 مامىر 2013 1:23
قوستاناي كوممۋنالدىق كاسىپورنى باسشىسىنا قىلمىستىق ايىپ تاعىلدى
قوستاناي وبلىستىق پروكۋراتۋراسىندا ءباسپاسوز ءماسليحاتى وتكىزىلىپ, وندا قالالىق تۇرعىن ءۇي-كوممۋنالدىق كاسىپورنىنىڭ بۇرىنعى باستىعى الەكساندر ماكليۋككە قاتىستى ءىستىڭ تەرگەلۋ بارىسى حاباردار ەتىلدى.
ءباسپاسوز ءماسليحاتى بارىسىندا كوممۋنالدىق مەكەمەنىڭ بۇرىنعى باستىعىنا قاتىستى قوزعالعان 4 قىلمىستىق ءىستىڭ ءبىر وندىرىسكە جيناقتالعانى ايتىلدى.
«قىلمىستىق ءىس قوزعاۋدا ماكليۋكتىڭ 2009 جىلدىڭ 10 قاراشاسىندا «قوستاناي سۋ» مكك سۇزگىلەر بلوگى تۇندىرماسىنىڭ ءبىرىنشى كەزەكتەگى سۋ تازارتقىش قۇرىلىسىنا كۇردەلى جوندەۋ جۇرگىزۋ» نىسانىنىڭ جوبا-سمەتالىق قۇجاتتاماسىن جاساۋ تۋراسىندا «ۆيست» جشس-مەن كەلىسىم جاساسۋى نەگىز بولدى. كەلىسىمشارتقا سايكەس, جۇمىسقا اقى تولەۋ تاپسىرۋ-قابىلداۋ اكتىسىنەن, ورىندالعان جۇمىس پەن وعان مەملەكەتتىك ساراپتاما وڭ باعا بەرگەننەن كەيىن جۇرگىزىلۋى ءتيىس ەدى. وسىمەن بىرگە, «ۆيست» جشس جۇمىس جوباسىن 2010 جىلعى ساۋىردە دايىن ەتتى. ال «قوستاناي مەملەكەتتىك ساراپتاما» مەكەمەسى قورىتىندىنى 2010 جىلعى 22 ماۋسىمدا بەرىپ, جوبانى مەملەكەتتىك نورماتيۆكە ساي كەلمەيدى دەپ شەشتى. ساراپتاما جاڭا جوبا جاساۋدى ۇسىندى. سوعان قاراماستان, تۇرعىن ءۇي-كوممۋنالدىق كاسىپورنىنىڭ بۇرىنعى باستىعى «ۆيست» جشس-نا 11 050 000 تەڭگە اقشانى اۋدارىپ جىبەرگەن», – دەدى وبلىستىق پروكۋراتۋرانىڭ ءبولىم باستىعى ەركىن تايكەشوۆ.
بۇل فاكتىگە بايلانىستى قىلمىستىق ءىس اتالعان ماسەلە ەكونوميكالىق سوتتا قارالعاننان كەيىن قوزعالعان. ال الەكساندر ماكليۋك قالا اكىمدىگىندەگى باسقا جۇمىسقا اۋىستىرىلعان كەزدە, تۇرعىن ءۇي-كوممۋنالدىق ءبولىمى تولەنىپ كەتكەن اقشانى قايتارىپ الدىرۋ جونىندە تالاپ-ارىز بەرگەن. پروتسەسكە قاتىسىپ وتىرعان پروكۋرور ءىستىڭ ورىندالۋى مەن اقشا تولەۋ مەرزىمدەرىنىڭ سايكەس كەلمەيتىنىنە كوڭىل ءبولىپ, ماسەلە كوتەرگەن. الەكساندر ماكليۋككە قاتىستى قىلمىستىق ءىستىڭ ەكىنشى ەپيزودى ونىڭ قوستاناي قالاسى اكىمدىگى قۇرىلىس ءبولىمىنىڭ باستىعى بولعان كەزىندەگى جۇمىستارىنا قاتىستى. 2012 جىلى ول «TAUPROJEKT» جشس-نا اتقارماعان جۇمىستارى ءۇشىن جالعان اكت تولتىرىپ, كاسىپورىنعا 2 126 500 تەڭگە اقشا تولەگەن.
قۇرىش نۇرىمبەت.