بۇگىنگى تاڭدا قازاقستاننىڭ بارلىق ەلەكتر ستانتسيالارىنىڭ جالپى قۋاتى 21 گۆت-قا تەڭ. «قازاقستاندىق كۇن ەنەرگەتيكاسى قاۋىمداستىعى» زتب ديرەكتورلار كەڭەسىنىڭ توراعاسى نۇرلان قاپەنوۆ وسىلاي دەدى.
– 2018 جىلدىڭ قورىتىندىسى بويىنشا الەمدىك كۇن ەنەرگەتيكاسىنىڭ بەلگىلەنگەن قۋاتى 500 گۆت-دان استى. 2018 جىلدىڭ ىشىندە 100 گۆت-تان استام قۋات وندىرەتىن فوتوەلەكترلىك ستانسالار سالىندى, - دەدى ول.
ن.قاپەنوۆتىڭ ايتۋىنشا, عالامشاردا ەلەكتر ەنەرگياسىن ءوندىرۋ ءۇشىن كۇن ەنەرگياسىن پايدالاناتىن 90 ەل بار. 32 ەلدە 1 گۆت-تان استام قۋات وندىرەتىن ستانسالار ورناتىلعان. كۇننەن ەنەرگيا وندىرەتىن نىسانداردىڭ قۋاتىن 300-دەن 500 گۆت-كە كوبەيتۋگە 2-اق جىل ۋاقىت كەتىپتى. سالىستىرۋ ءۇشىن ايتار بولساق, اەس-تەردىڭ قۋاتى شامامەن 400 گۆت-تى قۇرايدى. بەدەلدى الەمدىك ساراپشىلار 2019 جىلى بۇكىل الەمدە 129 گۆت فوتوەلەكترلىك كۇن ەلەكتر ستانسالارى سالىنادى دەگەن بولجام جاساپ وتىر.
بىلتىر ەلىمىزدە وندىرىلگەن «جاسىل» ەنەرگيانىڭ كولەمى 1,35 ملرد كۆت-قا جەتىپ, ەلەكتر ەنەرگياسىنىڭ جالپى كولەمىندەگى ۇلەس سالماعى 1,27 %-دى قۇراعان بولاتىن. الداعى ۋاقىتتا بۇل كورسەتكىش قارقىندى تۇردە وسۋگە ءتيىس.
– جالپى سوماسى 100 ملرد تەڭگەنى قۇرايتىن كەلىسىمدەر مەن مەموراندۋمدارعا قول قويۋ ارقىلى جاڭعىرمالى ەنەرگيا كوزدەرى سەكتورىنا ينۆەستيتسيالار تارتۋ بويىنشا جۇمىستار جۇرگىزىلدى. ناتيجەسىندە, بۇگىنگى تاڭدا جاڭعىرمالى ەنەرگەتيكا سەكتورىندا جىل باسىنان بەرى 7 جاڭا نىسان سالىندى. بۇگىنگى تاڭدا رەسپۋبليكا اۋماعىندا جالپى قۋاتى 678,6 مۆت بولاتىن 74 جەك نىسانى بار, - دەدى ەنەرگەتيكا مينيسترلىگى جاڭعىرمالى ەنەرگيا كوزدەرى دەپارتامەنتىنىڭ ديرەكتورى اينۇر سوسپانوۆا.
ونىڭ ايتۋىنشا, 2018 جىلى جاڭعىرمالى ەنەرگيا كوزدەرى جوبالارى ءۇشىن العاشقى حالىقارالىق اۋكتسيوندىق ساۋدا-ساتتىقتىڭ ۇيىمداستىرىلىپ, وعان جەرگىلىكتى جانە حالىقارالىق قاتىسۋشىلار تاراپىنان ۇلكەن قىزىعۋشىلىق بايقالعان.
«قازاقستاندىق كۇن ەنەرگەتيكاسى قاۋىمداستىعى» زتب باسقارما توراعاسى كاليا حيساميدينوۆا 4-5 شىلدەدە بۋراباي كۋرورت ايماعىندا ەنەرگەتيكا سالاسىنىڭ بارلىق مۇددەلى قاتىسۋشىلارىنىڭ باسىن قوساتىن «Solar Fest Qazaqstan» ىسكەرلىك فەستيۆالى وتەتىنى تۋرالى حابارلادى.
قازاقستان جاڭعىرمالى ەنەرگيا كوزدەرىن ەنەرگەتيكالىق كەشەندى دامىتۋ ۆەكتورلارىنىڭ ءبىرى رەتىندە قارىستىراتىنىن ايتا كەتەيىك. 2017 جىلى ەلوردادا وتكەن ەكسپو كورمەسىندە ول باستى باستى تاقىرىبى رەتىندە كوتەرىلگەنى بەلگىلى. جەك سەكتورىن دامىتۋ جوسپارىنا سايكەس, وندىرىلەتىن ەلەكتر ەنەرگياسىنداعى ونىڭ ۇلەسى 2020 جىلى – 3 %-عا, 2025 جىلى - 6%-عا, 2030 جىلى - 10%-عا جەتىپ, 2050 جىلى بارلىق تۇتىنىلاتىن ەنەرگيا كوزدەرىنىڭ جيىنتىق ەنەرگيا تۇتىنۋدىڭ جارتىسىن قامتۋعا ءتيىس.