بۇگىندە ونىڭ الدىڭعى تىزبەگىندە ەۋرازيالىق توپ (ەurasian Resources Grop) كاسىپورىندارى تۇر. بۇل تابيعي رەسۋرستاردى ءوندىرۋ مەن وڭدەۋ ەنەرگەتيكا, لوگيستيكا جانە ماركەتينگ سالالارى بويىنشا الەمدەگى ارتاراپتاندىرىلعان جەتەكشى كومپانيالاردىڭ ءبىرى ەكەنىن ايتا كەتكەن ءجون. ءتورت قۇرلىقتاعى 15 ەلدە ورنالاسقان توپ كاسىپورىندارى ءوز سالالارى بويىنشا ءىرى جۇمىس بەرۋشىلەر بولا بىلۋىمەن ەرەكشەلەنەدى. ەلىمىزدەگى جوعارى ماركالى اليۋميني وندىرەتىن بالاماسى جوق جالعىز كاسىپورىن دا ەۋرازيالىق توپتىڭ قۇرامىندا ەكەنى ءمالىم. مىس پەن كوبالت ءوندىرۋ مەن وڭدەۋ ىسىندە دە ERG-دىڭ ۇلەسى جوعارى. سونداي-اق بۇكىلالەمدىك ەكونوميكالىق فورۋم تۇعىرناماسىندا قۇرىلعان اككۋمۋلياتورلى باتارەيالار سەكتورىنا ارنالعان جاھاندىق اليانستىڭ قۇرىلتايشى-سەرىكتەسى بولۋى دا ونىڭ زور الەۋەتىن اڭعارتادى.
ترانسۇلتتىق كومپانيا قۇرامىنداعى «قازحروم» اق مەتاللۋرگيا, تاۋ-كەن ءىسى, قۇرىلىس, اۆتوموبيل ءجانە جول قوزعالىسىن ۇيىمداستىرۋ ماماندىقتارى بويىنشا ق.جۇبانوۆ اتىنداعى اقتوبە وڭىرلىك مەملەكەتتىك ۋنيۆەرسيتەتىنىڭ 50 تۇلەگىن قىزمەتكە الۋ جونىندە شەشىم قابىلدادى. كومپانيانىڭ پرەزيدەنتى ارمان ەسەنجولوۆتىڭ ايتۋىنشا, ەكىجاقتى كەلىسىمگە سايكەس تۇلەكتەردى جۇمىسقا قابىلداۋدىڭ ارنايى باعدارلاماسى جاسالعان. ارتىقشىلىعى, اقىسى تولەنەتىن تالىمگەردىڭ تاعايىندالۋى. ونىڭ باستى قىزمەتى – جاس كادرلاردى ءوندىرىستىك ءتاجىريبەگە باۋلۋ. بۇعان قوسا تۇلەكتەردى جۇمىسقا ورنالاستىرۋ, ولاردىڭ قىزمەتتە ءوسۋ مەن ورلەۋ جولدارىنىڭ جوسپارىن ءازىرلەۋ جانە كادرلار لەگى مەن رەزەرۆىن ەنگىزۋ جونىندە دە ءتيىستى ءىس-شارالار بەلگىلەنگەن.
– ءبىز جوعارى وندىرىستىك مەجەگە كاسىبي بىلىكتىلىگى جوعارى ماماندارعا ارقا سۇيەگەن جاعدايدا عانا جەتە الاتىنىمىزدى جاقسى تۇسىنەمىز. ءارى مىڭداعان ادام قىزمەت ەتەتىن ىرگەلى كاسىپورىنعا ماقساتكەر, ءورشىل, تالابى بيىك, جاۋاپكەرشىلىگى جوعارى جاستاردى قابىلداۋعا قاشان دا ءازىرمىز, دەدى «قازحروم» اق پرەزيدەنتى ارمان ەسەنجولوۆ. كومپانيانىڭ ەڭ باستى قۇرىلىمدىق ءبولىمى 4300 ادام جۇمىس ىستەيتىن اقتوبە فەرروقورىتپا زاۋىتى بولسا, ونىڭ 800-دەن استامى ق.جۇبانوۆ ۋنيۆەرسيتەتىنىڭ تۇلەكتەرى ەكەن. بۇل – قىزمەتكەرلەردىڭ 20 پايىزى وسى جوعارى وقۋ ورنىن ءبىتىرىپ, جۇمىسقا ورنالاسقاندار دەگەن ءسوز, دەيدى زاۋىت ديرەكتورى جالعاسبەك مۇسابەكوۆ. ءتىپتى جالعاسبەك بەرەكەت ۇلىنىڭ دا جۇبانوۆ ۋنيۆەرسيتەتىنىڭ ءتۇلەگى ەكەنىن ايتا كەتەلىك. ول 2002 جىلى اتالعان جوعارى وقۋ ورنىن ينجەنەر-مەتاللۋرگ ماماندىعى بويىنشا ۇزدىك ديپلوممەن اياقتاپتى. سودان سوڭ ەڭبەك جولىن وسى وندىرىستىك ۇجىمدا فەرروقورىتپا بالقىتۋ قىزمەتىنەن باستاپ, ءوز شەبەرلىگى مەن بىلىكتىلىگىن كوتەرە وتىرىپ, كاسىپورىن باسشىسىنا دەيىن كوتەرىلدى. بۇل مىسالدىڭ ءوزى دە تۇلەكتەرگە وي سالارى انىق. سونداي-اق ءوندىرىس جەتەكشىلەرىمەن وي-پىكىر الماسۋ كەزىندە قىزمەتكە قابىلدانعان تۇلەكتەر ءتيىستى الەۋمەتتىك جەڭىلدىكتەرمەن قامتىلاتىنى جونىندەگى دەرەكتەرگە قانىقتىق. بۇل ولار ءۇشىن اسا ماڭىزدى ارتىقشىلىقتاردىڭ ءبىرى بولماق. اتاپ ايتقاندا, مەديتسينالىق ساقتاندىرۋ, تاماقتاندىرۋ, ارنايى بولىنگەن كولىك پەن تۇراقتى مەكەنجايى جانىنان جۇمىسقا تاسىمالداۋ جىل قورىتىندىسى بويىنشا بونۋستار بەرۋ, ءوندىرىس ەرەكشەلىگىنە سايكەس كەزەكتى ەڭبەك دەمالىسىنا قوسىمشا كۇندەر قوسۋ, سانيتارلىق-كۋرورتتىق كارتالاردى جەڭىلدەتىلگەن باعامەن ۇسىنۋ كىرەدى ەكەن. سونداي-اق ەۋرازيالىق توپ قۇرامىنداعى كاسىپورىنداردا قىزمەتكە قابىلدانعان جاس كادرلاردىڭ تۇرعىن-ءۇي باعدارلاماسىنا قاتىسۋ مۇمكىندىكتەرى جوعارى ەكەنى دە اتاپ ايتۋعا تۇرارلىق ماسەلە.
اقتوبە