ەستە جوق ەسكى كەزەڭنەن ەل ەسىندە قالعان دەرەك كوپ. جوڭعار شاپقىنشىلىعىنا ەل بولىپ قارسى تۇرعان الاساپىران كەزەڭدە اتقا مىنگەن ۇمبەتەي جىراۋ سول زاماننىڭ بەينەسىن جىر تىلىمەن ورگەن, تاريحي ناقتى وقيعالاردى جىرلاعان. اق الماستاي جارقىلداعان جىرلارىندا شىنشىلدىق, ادىلدىك, اقيقاتتىڭ ايبىنى الپىس ەكى تامىرىڭداعى قىزىل قاندى قىزدىرادى.
ۇمبەتەي جىراۋ – ديداكتيكالىق پوەزيانىڭ ايتۋلى شەبەرلەرىنىڭ ءبىرى. سيقىرلى ءسوز ونەرىنە جاستايىنان دەن قويعان. بۇل جولداعى ۇستازى ءوز اكەسى. ەل تاريحىن زەردەلى جادىنا توقىعان, ارىداعى اسىلداردىڭ شەشەندىك سوزدەرىنەن, ەل اۋزىنداعى ەرلىك, باتىرلىق داستاندارىنان تاعىلىم العان. جىراۋ ءوزى دە ەل قورعاعان باتىرلاردى جالىندى جىرىنا ارقاۋ ەتكەن. «بوگەنباي ولىمىنە», «بوگەنباي ءولىمىن ابىلاي حانعا ەستىرتۋ» اتتى تولعاۋلارىندا كوزسىز ەرلىكتى دارىپتەپ, الاشتىڭ ءور مىنەزدى ورەندەرىن كەيىنگى ۇرپاققا ونەگە ەتكەن. اسىرەسە بوگەنباي باتىردىڭ ەر بەينەسىن تاماشا سيپاتتايدى. اسقار تاۋعا تەڭەيدى, قىران بۇركىتكە بالايدى. «بولماشىداي انادان بولات تۋدىڭ بوگەنباي» دەپ قاستەرلەيدى. باياناۋىل, قىزىلتاۋ, ابىرالى, شىڭعىستاۋ – بۇكىل سارىارقا اتىرابىن قۇبا قالماقتان امان الىپ قالعان بوگەنباي باتىردىڭ ەرەن ەرلىگىن سۇيسىنە جىرلايدى.
قالماقتى قۋىپ قاشىردىڭ,
قارا ەرتىستەن وتكىزىپ,
التاي تاۋعا اسىردىڭ.
اقشاۋىلگە قوس تىگىپ,
اۋىر قول جيدىرىپ الدىردىڭ,
قالماققا ويران سالدىردىڭ,–دەپ ەرلىگىن ەرەكشە اتاپ كورسەتەدى. جىراۋ جالعىز بوگەنبايدى عانا ەمەس, ابىلاي زامانىنداعى الاشتىڭ اسىپ تۋعان ەرلەرى قاراكەرەي قابانباي, قازداۋىستى قازىبەك, جانىبەك, بايان باتىرلاردىڭ ەرلىكتەرىن دە ولەڭمەن ورگەن.
سايىن ساقارانى جىرعا بولەگەن, جالىندى سوزىمەن دەم بەرگەن ۇمبەتەي جىراۋ بەيىتى سوناۋ ءبىر الاعاي دا بۇلاعاي كۇننىڭ وشپەس بەلگىسىندەي ەرەيمەننىڭ ەتەگىندە, قورجىنكولدىڭ قويناۋىندا جاتىر.
اقمولا وبلىسى,
ەرەيمەنتاۋ اۋدانى