جىل سايىن ءوتىپ كەلە جاتقان ءداستۇرلى جارمەڭكە جاستارعا ءبىلىم بەرۋ وشاقتارىندا قاي سالا ماماندارىنا سۇرانىس كوپ نەمەسە تاپشى ەكەندىگىن جانە ەڭبەك ءوتىلىنسىز جۇمىسقا ورنالاسۋعا بولاتىنىن انىقتاۋعا سەپتەسەدى. ءبىر كۇن بويى مەگاپوليستىڭ جاياۋ جۇرگىنشىلەرگە ارنالعان تانىمال كوشەسى جۇمىس بەرۋشىلەر مەن ىزدەنۋشىلەرگە ارنالعان ديالوگ الاڭىنا اينالدى. جوعارى وقۋ ورىندارىنىڭ تۇلەكتەرى مەن جۇمىسسىز جاستارعا ارنالعان بوس ورىندار جارمەڭكەسىن الماتى قالاسى «اتامەكەن» ۇلتتىق كاسىپكەرلەر پالاتاسىنا قاراستى «Jas Qadam» قوعامدىق قورى ۇيىمداستىردى. جارمەڭكەگە 300-دەن استام جۇمىس بەرۋشى كومپانيا قاتىستى. ولاردىڭ ساپىندا «Magnum Cash Carry» ساۋدا جەلىسى, CRATA حالىقارالىق زاڭ فيرماسى, DHL, HCK, Creetgo IT-كومپانياسى ءتارىزدى كوپتەگەن ىرگەلى ۇجىمدار بار. شارا اياسىندا 200-گە تارتا ءبىتىرۋشى تۇلەك اتالعان كومپانيالاردا تاعىلىمدامادان وتۋگە مۇمكىندىك الدى. وعان قوسا جاستاردىڭ بيزنەسكە دەگەن ىنتاسىن ارتتىرۋعا باعىتتالعان سەمينار ساباقتار وتكىزىلدى. جوبا شەڭبەرىندە كاسىپكەرلىكتى دامىتۋ, تۇرعىن ءۇي ماسەلەلەرىن شەشۋ, پسيحولوگيالىق جانە زاڭگەرلىك كومەك كورسەتۋ شارالارى ۇيىمداستىرىلدى.
«تۇڭعىش پرەزيدەنتىمىز نۇرسۇلتان نازارباەۆ 2019 جىلدى جاستار جىلى دەپ جاريالاپ, جاستاردى جان-جاقتى قولداۋعا باعىتتالعان ءىس-شارالار تىزبەگىن سارالاپ بەردى. وسى ماقساتتا جاستارعا ارنالعان ءتۇرلى جوبالار لەگى ىسكە اسۋدا. كاسىپورىندار ءۇشىن-بۇل ەڭبەككە قابىلەتتى حالىقتىڭ ەڭ ۇزدىك وكىلدەرى اراسىنان بولاشاعى بار مامانداردى تاڭداپ الۋدىڭ بىرەگەي مۇمكىندىگى. ستۋدەنتتەر ءۇشىن ءوزىن الەۋەتتى جۇمىس بەرۋشىلەرگە ۇسىنۋدىڭ وڭتايلى جولى. ءبىزدىڭ ميسسيامىز قازاقستانداعى جۇمىسسىزدىق دەڭگەيىن تومەندەتۋ», دەيدى «SelfMade» جوباسىنىڭ ۇيلەتىرۋشىسى ايگۇل نيسۋپوۆا.
بوس جۇمىس ورىندار جارمەڭكەسىن ۇيىمداستىرۋ جاس ماماندارعا عانا ەمەس, جۇمىس بەرۋشىلەر ءۇشىن دە ماڭىزدى. «جاستار وزدەرىن قىزىقتىراتىن بوس ورىندار تۋرالى مالىمەت الۋعا, ال ءبىز ءۇشىن تۇلەكتەردىڭ ىسكەرلىك قاسيەتىن باعالاۋعا زور مۇمكىندىك تۋدىرادى» دەيدى جۇمىس بەرۋشى ۇيىمداردىڭ وكىلدەرى.