«ءاسانالى ءاشىموۆتىڭ ونەر مەن مادەنيەتتى قولداۋ قورى» كەڭ-بايتاق رەسپۋبليكامىزدىڭ ايماقتارىندا, ونىڭ ىشىندە الماتى قالاسىندا بىرقاتار ۇيىمداستىرۋ ءىس-شارالارىن جۇزەگە اسىرۋعا ۇيىتقى بولىپ جاتىر. قوردىڭ بيىك ماقساتى – ەلىمىزدەگى مادەنيەت پەن ونەردى دامىتۋمەن قاتار جاس تالانتتارعا قولداۋ كورسەتۋ جانە قوعامنىڭ اسا كورنەكتى قايراتكەرلەرىنىڭ ەڭبەگىن دارىپتەپ, ساقتاۋ. وسى سالادا اسا كورنەكتى مادەنيەت قايراتكەرى ءاسانالى ءاشىموۆتىڭ سىڭىرگەن ەڭبەگىن قوعامدىق قور ارقىلى مەملەكەتىمىزدىڭ مۇراسىنا اينالدىرۋ. وسى باعىتتا قوعامدىق قوردىڭ جۇزەگە اسىرىپ جاتقان بىرقاتار ىرگەلى ءىس-شارالارىن اتاپ وتۋگە بولادى. قوعامدىق قوردىڭ العا قويعان باستى ماقساتتارىنىڭ ءبىرى – الماتى قالاسىنان «ءاسانالى ورتالىعىن» سالۋ. اتالعان ورتالىقتا اشىلاتىن «ءاسانالى تەاترى», «ءاسانالى مۋزەيى», «ءاسانالى اكتەرلىك مەكتەبى» دە ۇلتتىق ونەرىمىزدىڭ ءورىسىن كەڭەيتۋدى كوزدەيدى. تەاتر جانە كينو ونەرىنە ەڭبەگى سىڭگەن كوريفەيلەرگە كومەك كورسەتۋ, قولداۋ ءبىلدىرۋدى دە اتالعان قوعامدىق قور قاسيەتتى پارىز سانايدى. ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ ۇزدىك دەپ تانىلعان ستۋدەنتىنە قوردىڭ اتىنان ءبىر جىلدىق شاكىرتاقى تاعايىندايدى. ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ ۇزدىك دەپ تانىلعان ستۋدەنتىن الىس-جاقىن شەتەلدىك وقۋ ورىندارىنا تاجىريبە الماسۋعا جىبەرۋ قوعامدىق قوردىڭ جوسپارلاعان مۇرات-ماقساتتارىنىڭ ءبىرى بولىپ تابىلادى. قازاقستاندا وتكىزىلەتىن 5 كينوفەستيۆال جانە تەاتر فەستيۆالىنىڭ «ەڭ ۇزدىك ەر ادام» اتالىمى بويىنشا جۇلدەگەرلەرىن ماراپاتتاۋدى اتالعان قور ادەمى داستۇرگە اينالدىرماق. سونداي-اق, قور حالىقارالىق ايتىس جۇلدەگەرلەرىن دە ماراپاتتاپ, ۇلتتىق ونەردىڭ جالاۋىن جەلبىرەتىپ جۇرگەن اقىنداردى بيىككە ۇمتىلۋعا قۇلشىندىرعىسى ءارى قاناتتاندىرعىسى كەلەدى. الەمگە ايگىلى اكتەر ءاسانالى ءاشىموۆتىڭ شىعارماشىلىعىن قولداۋ – قوعامدىق قوردىڭ باستى باعىتىنىڭ ءبىرى.
قوردىڭ قۇرىلتايشىلارى – «ارنا Group» قۇرىلتايشىسى مەيىرجان ورازباەۆ, «Kusto Group» قۇرىلتايشىسى ەركىن تاتىشەۆ, «كاتەك» جشس-ءنىڭ پرەزيدەنتى قۇندىز نۋپوۆ. قوعامدىق قوردىڭ ءتورايىمى – باعدات ءاشىموۆا. قوردىڭ ديرەكتورى – دينارا ابسالىق. قوعامدىق قوردىڭ اقىلداستار القاسىنىڭ مۇشەلەرى – ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ رەكتورى اسحات ماەميروۆ, اقىن, قازاقستاننىڭ ەڭبەك سىڭىرگەن قايراتكەرى ءجۇرسىن ەرمان.
ونەر مەن مادەنيەت – ۇلتتىڭ ۇلىلىعىن ايشىقتايتىن حالىقتىڭ اسىل مۇراسى, پاراساتى مەن بەت-بەينەسى. وركەنيەتتى مەملەكەت, ەڭ الدىمەن, الەمدىك مادەنيەتتىڭ التىن قورىنا قوسقان قوماقتى ۇلەسىمەن وزگەلەردەن ءباسى باسىم بولماق. قازاق تەاترى مەن كينوسىنىڭ كوريفەيى, قازاقستاننىڭ ەڭبەك ەرى, كسرو جانە قازاقستاننىڭ حالىق ءارتيسى, مەملەكەتتىك سىيلىقتاردىڭ لاۋرەاتى ءاسانالى ءاشىموۆ شىعارماشىلىق دارا جولىندا تالعامى جوعارى كورەرمەن قاۋىمدى قالىپتاستىرىپ, سان بۋىندى ءوسىردى, ءۇمىت سىيلادى, تالاي ونەرپازدىڭ جولىن اشتى. ونىڭ كينو مەن تەاترداعى كەيىپكەرلەرىنە ەلىكتەپ كەيىنگى ۇرپاق ءوستى. بۇگىنگى كۇنى قازاق ونەرىنىڭ ابىز اقساقالى اتانعان, اڭىز اكتەردىڭ باتاسىن الىپ بوي تۇزەيتىن, شاپاعاتىن كورىپ شىڭ باعىندىرۋعا بەكىنگەن ونەرپازدار لەگى ءوسىپ كەلەتىنى اقيقات.
قوعامدىق قوردىڭ اشىلۋ راسىمىندە ءاسانالى ءاشىم ۇلىنىڭ «مەنىڭ جانرىم – كۇندەلىك» اتتى جاڭا كىتابىنىڭ تۇساۋكەسەرى بولدى. تەاتر تارلانىنىڭ جان-دۇنيەسىنە, كوڭىل تەرەزەسىنە ءبىر ساتكە ۇڭىلدىرەتىن بۇل كىتاپ «ARNA-B» باسپاسىنان جارىق كورگەن. ءاسانالى ءاشىم ۇلى ستۋدەنت كەزدەن باستاپ كۇندەلىك جازۋدى داعدىعا اينالدىرعان. وكىنىشكە قاراي, سول كەزدەگى جازىپ جۇرگەن ونشاقتى داپتەرى قولدى بولىپ كەتكەن. تالانتىمەن كۇللى الەمدى تامساندىرعان الەمگە ايگىلى اكتەردىڭ سوڭعى 50 جىلعا جۋىق جازعان كۇندەلىكتەرى بۇگىندە بىرنەشە رەت جەكە كىتاپ بولىپ جارىققا شىعىپ, وقىرمان سۇرانىسىن ارتتىرىپ كەلەدى. وقىرمانعا جول تارتقان جاڭا كىتاپتا سول كۇندەلىكتەردىڭ سوڭعى 7 جىلداعى جازباسىمەن قوسا تولىق نۇسقاسى جاريالانعان.
قوعامدىق قوردىڭ اشىلۋ سالتاناتىندا قازاقستاننىڭ ەڭبەك ەرى, كسرو جانە قازاقستاننىڭ حالىق ءارتيسى, مەملەكەتتىك سىيلىقتاردىڭ لاۋرەاتى ءاسانالى ءاشىم ۇلى جاڭا قۇرىلعان قوعامدىق قورعا اق باتاسىن بەرىپ, اق جول تىلەدى.
«ءاسانالى ءاشىموۆتىڭ ونەر مەن مادەنيەتتى قولداۋ قورى» — ەلىمىزدىڭ ءتول تاريحىنداعى ەلەۋلى وقيعا. قوعامدىق قور تۋعان جەرىن, تۋعان ەلىن سۇيەتىن ازاماتتاردىڭ قاجىرلى ەڭبەگىمەن شاراپاتتى شارالارعا ىزگى باستاما بولادى. عيبراتتى عۇمىر كەشكەن ءاسانالى ءاشىم ۇلى – ونەردىڭ باعى مەن قۇدىرەتى قوس يىعىنا قونعان ارداقتى ازامات.
بۇل كۇن قازاقتىڭ مادەني كەڭىستىگىندە, ەلىمىزدىڭ رۋحانيات الەمىندە ەرەكشە قۋانىشتى كۇن. حالىق پەن ونەر الىمساقتان ەگىز ۇعىم. ۇلتتىق ونەر مەن مادەنيەتىمىزدى قولداۋ قورىنىڭ قۇرىلۋى – ۇلكەن جۇمىس. قازاقستاننىڭ ەڭبەك ەرى ولجاس سۇلەيمەنوۆ باستاعان ەل اعالارى, ونەر مايتالماندارى باس قوسقان جيىن - ەل مادەنيەتىندەگى ايتۋلى وقيعاعا اينالعانى انىق. ماقساتى ايقىن, بولاشاعى جارقىن قور وسىنداي تىڭ باستامامەن, ءوز جۇمىسىن باستاپ كەتتى.