ءسوز سايىسىنا قازاقستاننان سەگىز اقىن قاتىسقان. سەمەيدىڭ ەرەن جۇيرىگى فارحات مۇرات ۇلى, كەرەكۋدىڭ كەلىستى اقىندارى اڭساعان زارىق ۇلى مەن ايشۋاق قالاميا ۇلى. وڭكەي كوكىرەگىن كوركەم جىردىڭ كەرۋەنى كەرگەن, بولاشاعىنان ءۇمىت كۇتتىرەتىن جاس اقىندار. جىر دوداسىنا بارلىعى 29 اقىن قاتىسىپتى. التايدىڭ قوساعاشىنان دا كوركەم ءسوزدىڭ كورىگىن قىزدىرعالى جەتكەندەر بار. ال, اتا مۇراسىن ساعىنعان تىڭداۋشى قاۋىمدا ءتىپتى ەسەپ جوق. ءۇش كۇنگە سوزىلعان, موڭعول ەلىنىڭ اسپانىن قازاقتىڭ كوركەم جىرىمەن كومكەرگەن ايتىستا الدىمەن وزدەرىنىڭ رەسپۋبليكالىق ءسوز سايىسى وتكىزىلىپتى. سودان سوڭ حالىقارالىق ايتىس.
–حالىقارالىق ايتىستىڭ ءبىر ەرەكشەلىگى, شىنايىلىلىعى بولدى,–دەيدى قۇرمەت قۇرالحان,–كەيبىر ايتىستاعىداي قارسىلاسىڭ كۇنى بۇرىن بەلگىلى بولىپ, الدىن-الا دايىندالۋ جوق. سوندىقتان جاتتاندىلىقتان ادا, سۋىرىپسالما ونەردىڭ جارقىن مىسالىن جارقىراتىپ كورسەتۋگە مۇمكىندىك تۋدى. ءسوز ءلامىن باعالاۋلارى دا قىزىق. جالعىز قازىلار القاسى ەمەس, مۇقيات تىڭداپ, مەيلىنشە ءتۇيسىنىپ وتىرعان ونەر سۇيگەن قاۋىمنىڭ دا كوزقاراسى ەسەپكە ەنەدى ەكەن.
ايتىسكەر اقىنداردىڭ اۋزىنان شىققان ءسوز اجارىن جازا باسپاي تانيتىن قازىلار القاسى مەن ءسوز قادىرىن بىلەتىن قالىڭ كورەرمەن ءبىراۋىزدان كوكشەتاۋلىق قۇرمەت اقىندى دارا دەپ تانىعان. ارشالى اۋدانىنىڭ بۇلاقساي اۋىلىندا مادەنيەت ءۇيىنىڭ مەڭگەرۋشىسى بولىپ قىزمەت ىستەيتىن جەرلەس اقىننىڭ جەتىستىگىن جالعىز اقىنعا عانا ەمەس, مايەكتى ءسوزدىڭ ءمانىن ساقتاپ قالعان ەلگە دەگەن ىقىلاس دەپ تۇيسىندىك.
حالىقارالىق ايتىستا قوبدا اكىمشىلىگى ۇيىمداستىرعان. شولىركەگەن دالاعا اق جاۋىن بولىپ مەيىرىن قاندىرعانداي تۇلا بويىنداعى تاماشا تالانتتارىمەن حالقىنا قىزمەت كورسەتكەن ايتىسكەرلەردى القالاعان العىس-قۇرمەتتە شەك جوق دەسەدى. شالعايداعى قانداستارىمىزدىڭ ۇلت مۇراسىنا دەگەن ىقىلاسى قازاقستاننان بارعان اقىنداردىڭ كوكىرەگىن قولامتانىڭ شوعىنداي ءالى قىزدىرىپ ءجۇر.