سەنات دەپۋتاتتارى جوعارعى سوتتىڭ سۋديالارى عاليا اققۋوۆا, ءادىل قۇرىقباەۆ, امانگەلدى سارسەنباەۆ, مورياك شەگەنوۆتى ورنىنان تۇسۋىنە بايلانىستى, ەلىس ابدىقادىروۆتى باسقا قىزمەتكە تاعايىندالۋىنا وراي قىزمەتىنەن بوساتتى.
وتىرىستا قازاقستان مەن رەسەي ۇكىمەتتەرى اراسىنداعى م.ۆ. لومونوسوۆ اتىنداعى ماسكەۋ مەملەكەتتىك ۋنيۆەرسيتەتىنىڭ قازاقستاندىق فيليالىنىڭ جۇمىس ىستەۋى تۋرالى كەلىسىم راتيفيكاتسيالاندى.
كەلىسىم بويىنشا فيليالدا «ماتەماتيكا», «قولدانبالى ماتەماتيكا جانە اقپاراتتانۋ», «فيلولوگيا», «ەكولوگيا جانە تابيعاتتى پايدالانۋ», «ەكونوميكا» باعىتتارىنداعى دايارلىقتا قازاقستان تاريحى مەن قازاق ءتىلى مىندەتتى تۇردە وقىتىلادى; فيليالداعى وقۋ كۇندىزگى جانە كۇندىزگى-سىرتتاي وقىتۋ نىساندارى بويىنشا جۇزەگە اسادى جانە ورىس تىلىندە جۇرگىزىلەدى; قازاقستان رەسپۋبليكاسىنىڭ مەملەكەتتىك ءبىلىم بەرۋ تاپسىرىسىنىڭ نەگىزىندە فيليالدا وقۋدى تامامداعان ماسكەۋ ۋنيۆەرسيتەتىنىڭ تۇلەكتەرى قازاقستان رەسپۋبليكاسىنىڭ زاڭناماسىنا سايكەس جۇمىس ىستەپ وتەۋى مىندەتتى; فيليالدىڭ ءبىلىم بەرۋ جانە قارجىلىق-شارۋاشىلىق قىزمەتىنە كەلىسىمنىڭ ماقساتتارى مەن مىندەتتەرىن ىسكە اسىرۋ جانە قازاقستان تاراپىنا بەكىتىلىپ بەرىلگەن م ۇلىكتى فيليالدىڭ پايدالانۋى تۇرعىسىنان بىرلەسكەن تەكسەرۋدى جۇزەگە اسىرۋ ءۇشىن مەكەمەارالىق كوميسسيا قۇرىلادى; فيليالدىڭ قىزمەتىن قارجىلاندىرۋ قازاقستان رەسپۋبليكاسىنىڭ رەسپۋبليكالىق بيۋدجەتىنەن مەملەكەتتىك ءبىلىم بەرۋ تاپسىرىسى اياسىندا جوعارى جانە جوعارى وقۋ ورنىنان كەيىنگى ءبىلىمى بار ماماندار دايارلاۋعا بولىنگەن قاراجات ەسەبىنەن, سونداي-اق قازاقستان رەسپۋبليكاسىنىڭ زاڭناماسىندا تىيىم سالىنباعان وزگە دە كوزدەر ەسەبىنەن جۇزەگە اسادى.
سەنات اۆتورلىق جانە ساباقتاس قۇقىقتاردى ۇجىمدىق نەگىزدە باسقارۋ ءتارتىبى تۋرالى كەلىسىمدى راتيفيكاتسيالادى.
كەلىسىم اۆتورلاردىڭ, ورىنداۋشىلاردىڭ, فونوگرامما دايىنداۋشىلاردىڭ (جاساۋشىلاردىڭ), اۆتورلىق جانە ساباقتاس قۇقىقتاردى وزگە دە يەلەنۋشىلەردىڭ اۆتورلىق جانە ساباقتاس قۇقىقتاردى ءىس جۇزىندە جەكە تۇردە جۇزەگە اسىرۋ قيىن بولعاندا نەمەسە مۇشە مەملەكەتتەردىڭ زاڭنامالارىندا وسى قۇقىقتاردىڭ وبەكتىلەرىن قۇقىق يەلەنۋشىلەردىڭ كەلىسىمىنسىز, بىراق سىياقى تولەي وتىرىپ پايدالانۋعا جول بەرىلەتىن جاعدايلاردا, ەاەو-عا مۇشە مەملەكەتتەردىڭ اۋماقتارىندا اۆتورلىق جانە ساباقتاس قۇقىقتاردى ۇجىمدىق نەگىزدە باسقارۋ ءتارتىبىن بەلگىلەيدى.
مۇشە مەملەكەتتەردىڭ زاڭناماسىندا ايقىندالاتىن اۆتورلىق جانە ساباقتاس قۇقىقتاردى ۇجىمدىق باسقارۋ سالالارىندا قۇقىقتاردى ۇجىمدىق باسقارۋ جونىندەگى ۇيىمداردى قۇرۋ مۇمكىندىگى كوزدەلەدى.
پالاتا ءبىر تاراپتان ەۋرازيالىق ەكونوميكالىق وداق پەن وعان مۇشە مەملەكەتتەر جانە ەكىنشى تاراپتان يران يسلام رەسپۋبليكاسى اراسىنداعى ەركىن ساۋدا ايماعىن قۇرۋعا الىپ كەلەتىن ۋاقىتشا كەلىسىمدى راتيفيكاتسيالادى.
قۇجات 2018 جىلعى 17 مامىردا استانا قالاسىندا جاسالعان كەلىسىمدى راتيفيكاتسيالاۋعا ارنالعان.
كەلىسىمدە ەۋرازيالىق ەكونوميكالىق وداققا مۇشە مەملەكەتتەر مەن يران يسلام رەسپۋبليكاسى اراسىندا بىرقاتار بەكىتىلگەن تاۋارلارعا قاتىستى 3 جىل مەرزىمگە پرەفەرەنتسيالىق ساۋدا رەجيمىن بەلگىلەۋ جانە ءوزارا ساۋداداعى يمپورتتىق كەدەن باجدارىن ازايتۋ كوزدەلگەن.
وتىرىس بارىسىندا سەناتور سارسەنباي ەڭسەگەنوۆتىڭ اتىراۋ-ورال-سامارا تەمىرجول باعىتىنىڭ قۇرىلىسىن قارجىلاندىرۋ تۋرالى; تولەۋبەك مۇقاشەۆتىڭ بەلارۋس رەسپۋبليكاسىمەن بىرلەسە وتىرىپ «ۇشقىشسىز ۇشاق» ءوندىرىسىن ۇيىمداستىرۋ ماسەلەلەرى بويىنشا; دۋلات قۇسداۋلەتوۆتىڭ قورشاعان ورتانى قورعاۋ جونىندە شارالار قابىلداۋ قاجەتتىگى تۋرالى دەپۋتاتتىق ساۋالدارى تىڭدالدى.
وتىرىس سوڭىندا سەنات باسشىسى دەپۋتاتتاردى ەكولوگيالىق كودەكستى ازىرلەۋگە بەلسەندى قاتىسۋعا شاقىرىپ, بۇل سالاداعى پروبلەمالاردى شەشۋ قوعام ءۇشىن ەرەكشە ماڭىزدى ەكەنىن اتاپ ءوتتى.